25 YEARS OF EXCELLENCE
Weather: -
Tuesday Oct 27, 2026
06:26:06pm
Weather: -
Tuesday Oct 27, 2026
06:26:06pm
17 வயதுக்கு உட்பட்ட பெண்களுக்கான ஆசிய கோப்பை கால்பந்து தொடருக்கு இந்திய அணி தகுதி பெற்றுள்ளது. 2027-ம் ஆண்டு மார்ச் 31 முதல் ஏப்ரல் 17 வரை சீனாவில் இந்தத் தொடர் நடைபெற உள்ளது.இதற்கான தகுதிச்சுற்றில் இந்திய அணி ‘ஈ’ பிரிவில் இடம் பெற்றிருந்தது. முதல் போட்டியில் ஈராக் அணியை 14-0 என்ற கோல் கணக்கிலும், அடுத்த போட்டியில் சிரியா அணியை 2-0 என்ற கோல் கணக்கிலும் வீழ்த்தியது.மூன்றாவது மற்றும் கடைசி போட்டியில் மலேசியாவை எதிர்கொண்ட இந்திய அணி, 4-0 என்ற கோல் கணக்கில் வெற்றி பெற்றது.மூன்று போட்டிகளிலும் வெற்றி பெற்ற இந்திய அணி, 9 புள்ளிகளுடன் பட்டியலில் முதலிடம் பிடித்து, தொடர்ந்து இரண்டாவது முறையாக ஆசிய கோப்பை தொடருக்கு தகுதி பெற்றது. கடந்த 2025-ம் ஆண்டு தொடரில் இந்திய அணி காலிறுதிச் சுற்றுடன் வெளியேறியது.
டென்மார்க்கில் ‘சூப்பர் 750’ அந்தஸ்து பெற்ற டென்மார்க் ஓபன் பாட்மின்டன் தொடர் இன்று தொடங்குகிறது. இதில் இந்தியாவின் முன்னணி வீராங்கனை பி.வி. சிந்து மற்றும் லக்சயா சென் ஆகியோர் கடினமான பிரிவில் இடம் பெற்றுள்ளனர்.பெண்கள் ஒற்றையர் பிரிவில் முதல் சுற்றில் இந்தியாவின் சிந்து, நடப்பு சாம்பியனும் உலகின் முதல்நிலை வீராங்கனையுமான தென்கொரியாவின் ஆன் சே-யங்கை எதிர்கொள்கிறார். தென்கொரிய வீராங்கனைக்கு எதிராக கடைசியாக விளையாடிய 10 போட்டிகளிலும் சிந்து தோல்வியடைந்துள்ளார்.பெண்கள் ஒற்றையர் பிரிவில் இந்தியா சார்பில் தான்வி சர்மா, அஷ்மிதா, தேவிகா சிகாக், உன்னதி ஹூடா ஆகியோரும் பங்கேற்கின்றனர்.ஆண்கள் ஒற்றையர் பிரிவில் இந்தியாவின் லக்சயா சென், உலகின் மூன்றாம் நிலை வீரரான சீனதைபேயின் சோ டியென் செனை சந்திக்கிறார். மற்ற இந்திய வீரர்களான ஆயுஷ் ஷெட்டி, ஸ்ரீகாந்த் ஆகியோரும் களமிறங்குகின்றனர்.இரட்டையர் பிரிவில் இந்தியாவின் சாத்விக்சாய்ராஜ் - சிராக் ஷெட்டி ஜோடியும், காயத்ரி கோபிசந்த் - திரீசா ஜோடியும் பங்கேற்கின்றன.
ஹரியானா மாநிலம் பஞ்ச்குலாவில் நடைபெற்ற தேசிய ரேங்கிங் டேபிள் டென்னிஸ் சாம்பியன்ஷிப் தொடரில், இந்திய வீராங்கனைகள் மணிகா பத்ரா மற்றும் ஸ்ரீஜா அகுலா ஆகியோர் மூன்றாவது சுற்றுக்கு முன்னேறினர்.ஸ்ரீஜா அகுலா வெற்றிபெண்கள் ஒற்றையர் பிரிவின் முதல் சுற்றில் இந்திய ரிசர்வ் வங்கி (ஆர்.பி.ஐ.) அணிக்காக விளையாடிய ஸ்ரீஜா அகுலா, கர்நாடகாவின் வன்ஷிகா தேஷனாவை 12-10, 11-7, 11-5 என்ற செட் கணக்கில் வீழ்த்தினார்.இரண்டாவது சுற்றில் பெங்காலைச் சேர்ந்த சான்வி ராயை 11-4, 11-4, 11-7 என்ற செட் கணக்கில் தோற்கடித்தார். இதையடுத்து மூன்றாவது சுற்றில் ஸ்ரீஜா, சிண்ட்ரெலா தாஸை எதிர்கொள்கிறார்.மணிகா பத்ராவும் அடுத்த சுற்றுக்கு முன்னேற்றம்பெட்ரோலிய விளையாட்டு மேம்பாட்டு ஆணையம் (பி.எஸ்.பி.பி.) அணிக்காகக் களமிறங்கிய மணிகா பத்ரா, முதல் சுற்றில் கனரா வங்கியின் மரியா ரோனியை 16-14, 11-2, 9-11, 11-7 என்ற செட் கணக்கில் வென்றார்.இரண்டாவது சுற்றில் இந்திய உணவுக் கழகத்தின் (எப்.சி.ஐ.) தனுஜாவை 6-11, 11-5, 11-6, 12-10 என்ற செட் கணக்கில் வீழ்த்தினார்.இதன் மூலம் மூன்றாவது சுற்றுக்கு முன்னேறிய மணிகா பத்ரா, அடுத்த போட்டியில் தியா சிடாலேவை எதிர்கொள்கிறார்.
இந்தியாவுக்கு வந்துள்ள வெஸ்ட் இண்டீஸ் அணி, 5 போட்டிகள் கொண்ட டி20 கிரிக்கெட் தொடரில் பங்கேற்று வருகிறது. முதல் இரண்டு போட்டிகளில் இரு அணிகளும் தலா ஒரு வெற்றியைப் பெற்றிருந்தன.மூன்றாவது போட்டி நேற்று மத்தியப் பிரதேச மாநிலம் இந்தூரில் உள்ள ஹோல்கர் மைதானத்தில் நடைபெற்றது. இதில் டாஸ் வென்ற வெஸ்ட் இண்டீஸ் கேப்டன் ஷாய் ஹோப், பந்துவீச்சைத் தேர்வு செய்தார்.முதலில் பேட்டிங் செய்த இந்திய அணி, 20 ஓவர்களில் 223 ரன்களுக்கு அனைத்து விக்கெட்டுகளையும் இழந்தது. கடினமான இலக்கை நோக்கி விளையாடிய வெஸ்ட் இண்டீஸ் அணி, தொடக்கம் முதலே தடுமாறியது. இறுதியில் அந்த அணி 20 ஓவர்களில் 7 விக்கெட் இழப்புக்கு 209 ரன்கள் மட்டுமே எடுத்து தோல்வியடைந்தது.இதன் மூலம் இந்திய அணி 14 ரன்கள் வித்தியாசத்தில் வெற்றி பெற்று, தொடரில் 2-1 என்ற கணக்கில் முன்னிலை பெற்றது.
எகிப்து தலைநகர் கெய்ரோவில் உலகக் கோப்பை துப்பாக்கிச் சுடுதல் போட்டிகள் நடைபெற்று வருகின்றன. இதில் ஆண்களுக்கான 10 மீட்டர் ஏர் பிஸ்டல் பிரிவில் இந்திய வீரர் உதய்வீர் சித்து தங்கப் பதக்கம் வென்றார்.இந்தியாவின் சார்பில் அஜேந்திரா சிங் சவுகான், சரப்ஜோத் சிங், உதய்வீர் சித்து உள்ளிட்ட வீரர்கள் தகுதிச் சுற்றில் பங்கேற்றனர். இதில் உதய்வீர் 585.19 புள்ளிகளுடன் மூன்றாவது இடத்தைப் பிடித்து இறுதிப்போட்டிக்கு முன்னேறினார்.அஜேந்திரா சிங் சவுகான் 580.23 புள்ளிகளுடன் 14-வது இடத்தையும், சரப்ஜோத் சிங் 574.15 புள்ளிகளுடன் 31-வது இடத்தையும் பிடித்தனர். மற்ற இந்திய வீரர்களான ஜோனாதன் கவின் அந்தோணி, யோகேஷ் குமார் ஆகியோர் தரவரிசைப் புள்ளிகளுக்காகப் பங்கேற்றனர்.இறுதிப்போட்டியில் சிறப்பாகச் செயல்பட்ட உதய்வீர், 240.6 புள்ளிகளுடன் முதலிடம் பிடித்து தங்கப் பதக்கத்தைக் கைப்பற்றினார். இதன் மூலம் இத்தொடரில் இந்தியாவுக்கான முதல் பதக்கத்தைப் பெற்றுத் தந்தார்.மேலும், 10 மீட்டர் ஏர் பிஸ்டல் பிரிவில் தனது முதல் சர்வதேசப் பதக்கத்தையும், சீனியர் உலகக் கோப்பைப் போட்டியில் தனது முதல் பதக்கத்தையும் வென்று சாதனை படைத்தார்.
ஐக்கிய நாடுகள் சபையின் குழந்தைகள் நல அமைப்பான யுனிசெப் நிறுவனத்தின் இந்தியப் பிரிவு தூதராக, இந்திய கிரிக்கெட் வீராங்கனை ஸ்மிருதி மந்தனா நியமிக்கப்பட்டுள்ளார்.இந்திய பெண்கள் கிரிக்கெட் அணியின் கேப்டனாகப் பொறுப்பேற்றுள்ள ஸ்மிருதி மந்தனா, குழந்தைகளின் பாதுகாப்பு, உடல்நலம் மற்றும் பெண் குழந்தைகளுக்கான வாய்ப்புகளை மேம்படுத்தும் பணிகளில் ஈடுபட உள்ளார்.இதுகுறித்து ஸ்மிருதி மந்தனா கூறுகையில், “இந்தப் பொறுப்பை பெருமையாகக் கருதுகிறேன். மன உறுதியுடன் போராடினால் வாழ்க்கையில் சாதிக்க முடியும் என்பதை கிரிக்கெட் எனக்குக் கற்றுக் கொடுத்துள்ளது. ஒவ்வொரு குழந்தையும் பெரிய கனவுகளைக் காணவும், அந்தக் கனவுகளை நனவாக்குவதற்கான வாய்ப்புகளைப் பெறவும் தகுதியுடையவர்கள்” என்றார்.தெற்காசியாவுக்கான யுனிசெப் தூதராக உள்ள இந்திய கிரிக்கெட் ஜாம்பவான் சச்சின் டெண்டுல்கர், மந்தனாவை யுனிசெப் குடும்பத்திற்கு வரவேற்பதாகத் தெரிவித்துள்ளார். மேலும், குழந்தைகளின் உரிமைகளுக்காகச் சிறந்த குரலாக அவர் திகழ்வார் என்றும் குறிப்பிட்டுள்ளார்.
போர்ச்சுகலில் நடைபெற்று வரும் ஐ.டி.எப். மகளிர் டென்னிஸ் தொடரில், இந்திய வீராங்கனை மாயா ரேவதி அரையிறுதிக்கு முன்னேறினார்.போர்ச்சுகலின் லாகோஸ் நகரில் நடைபெறும் இத்தொடரின் ஒற்றையர் பிரிவு காலிறுதிப் போட்டியில், மாயா ரேவதி, எட்டாம் நிலை வீராங்கனையான சீனாவின் தியன் ஜியாலினை எதிர்கொண்டார்.தொடக்கம் முதலே சிறப்பான ஆட்டத்தை வெளிப்படுத்திய மாயா, முதல் செட்டை 6-2 எனக் கைப்பற்றினார். தொடர்ந்து ஆதிக்கம் செலுத்திய அவர், இரண்டாவது செட்டையும் 6-1 என தன்வசப்படுத்தினார்.ஒரு மணி நேரம் 42 நிமிடங்கள் நடைபெற்ற இப்போட்டியில், 6-2, 6-1 என்ற நேர் செட் கணக்கில் வெற்றி பெற்ற மாயா ரேவதி, அரையிறுதிக்கு தகுதி பெற்றார்.அரையிறுதிப் போட்டியில், மூன்றாம் நிலை வீராங்கனையான நெதர்லாந்தின் பிரிட்டு பிரீயை மாயா எதிர்கொள்ள உள்ளார்.
ஐ.எஸ்.எல்., கால்பந்து தொடரின் 13வது சீசன் இன்று பெங்களூருவில் தொடங்குகிறது. இதில் ஈஸ்ட் பெங்கால், சென்னை, மும்பை, கேரளா உள்ளிட்ட 13 அணிகள் பங்கேற்கின்றன.இன்று நடைபெறும் முதல் போட்டியில் பெங்களூரு, டில்லி அணிகள் மோதுகின்றன. லீக் சுற்றில் ஒவ்வொரு அணியும் மற்ற அணிகளுடன் இருமுறை மோதும். புள்ளிப்பட்டியலில் முதலிடம் பெறும் அணி ஷீல்டு வெல்லும். முதல் 6 இடங்களைப் பிடிக்கும் அணிகள் பிளே ஆப் சுற்றில் பங்கேற்கும்.
ஆசிய விளையாட்டுப் போட்டிகள் மற்றும் சர்வதேச ஒலிம்பியாட் செஸ் போட்டிகளில் பதக்கங்களை வென்ற தமிழக வீரர், வீராங்கனைகளுக்கு ஊக்கத்தொகை வழங்கும் நிகழ்ச்சி சென்னையில் நடைபெற்றது. லீலா பேலஸ் ஹோட்டலில் நடந்த விழாவில் முதல்வர் விஜய் பங்கேற்று, சாதனை படைத்த வீரர்களுக்கு உயரிய ஊக்கத்தொகைகளை வழங்கினார்.மேலும், ஒலிம்பிக் போட்டிகளில் பங்கேற்கும் நோக்கில் வீரர்களைத் தயார்படுத்தும் 'டிரீம் ஒலிம்பிக்' திட்டத்தையும் அவர் தொடங்கி வைத்தார்.தமிழக வீரர்கள் சர்வதேச அளவிலான போட்டிகளில் சிறப்பாகச் செயல்படுவதற்காக, வெளிநாடுகளுக்குச் சென்று பயிற்சி பெறும் வாய்ப்புகள் ஏற்படுத்தப்பட்டு வருகின்றன. விளையாட்டுத் துறையின் வளர்ச்சிக்குத் தேவையான முதலீடுகளை மேற்கொள்ளவும் முக்கியத்துவம் அளிக்கப்படுகிறது.போதைப் பழக்கத்தைத் தடுப்பதில் விளையாட்டுக்கு முக்கியப் பங்கு இருப்பதால், பள்ளி, கல்லூரிகளில் விளையாட்டுக்கு அதிக முக்கியத்துவம் அளிக்க வேண்டும் என வலியுறுத்தப்பட்டது. பள்ளிகளில் தினமும் 45 நிமிடங்கள் உடற்கல்வி வகுப்புகளை நடத்தத் திட்டமிடப்பட்டுள்ளது. இதேபோல், கல்லூரிகளிலும் 45 நிமிட உடற்கல்வி வகுப்புகளைக் கட்டாயமாக்குவது குறித்து பரிசீலிக்க வேண்டும் என்றும் தெரிவிக்கப்பட்டது.மேலும், திருநங்கையர்களுக்காக மாநில அளவிலான விளையாட்டுப் போட்டிகளை நடத்தவும் திட்டமிடப்பட்டுள்ளது.
சீனாவின் பீஜிங்கில் நடைபெற்று வரும் சீன ஸ்மாஷ் டேபிள் டென்னிஸ் தொடரில், இந்தியாவின் மானவ் தாக்கர் – மானுஷ் ஷா ஜோடி அரையிறுதிக்கு முன்னேறியது.ஆண்கள் இரட்டையர் பிரிவு காலிறுதியில், சீனாவின் ஜிங்குன் லியாங் – பெங்ஜியாங் ஜோடியுடன் இந்திய அணி மோதியது. இதில் ஆதிக்கம் செலுத்திய மானவ் – மானுஷ் ஜோடி, 11-9, 11-5, 11-4 என்ற கணக்கில் தொடர்ந்து மூன்று கேம்களையும் கைப்பற்றியது. இதன் மூலம் 3-0 என்ற நேர் கேம் கணக்கில் வெற்றி பெற்று அரையிறுதிக்குள் நுழைந்தது.
