25 YEARS OF EXCELLENCE
Weather: -
Monday Nov 02, 2026
05:57:58pm
Weather: -
Monday Nov 02, 2026
05:57:58pm
தமிழ்நாடு அரசு பணியாளர் தேர்வாணையம் நடத்திய தொழில்நுட்ப பணியாளர் பணியிடங்களுக்கு விருதுநகர் நகராட்சிக்குட்பட்ட கே.வி.எஸ்.பள்ளி தேர்வு மையத்தில் மாவட்ட ஆட்சித்தலைவர் திருமதி ஷரண்யா அறி I A S., அவர்கள் (19.09.2026) பார்வையிட்டு ஆய்வு செய்தார்.விருதுநகர் மாவட்டத்தில் தமிழ்நாடு அரசு பணியாளர் தேர்வாணையம் நடத்திய தொழில்நுட்ப பணியாளர் பணியிடங்களுக்கான தேர்வுகள் 10 மையங்களில் நடைபெற்றது.இத்தேர்வு மையங்களில் மொத்தம் 2,709 தேர்வர்கள் தேர்வு எழுதுவதற்கு அனுமதிக்கப்பட்டிருந்தனர். இதில் 1,492 தேர்வர்கள் தேர்வில் பங்கேற்று தேர்வு எழுதினர். 1,217 தேர்வர்கள் தேர்வில் பங்கேற்கவில்லை.அதன்படி, விருதுநகர் இந்து நாடார் செந்திகுமார நாடார் கல்லூரியில் அமைக்கப்பட்ட 3 தேர்வு மையங்களில் அனுமதிக்கப்பட்ட 769 தேர்வர்களில் 436 தேர்வர்கள் வருகை புரிந்து, 333 பேர் வருகை புரியவில்லை. க்ஷத்திரியா பெண்கள் மேல்நிலைப்பள்ளி மையத்தில் அனுமதிக்கப்பட்ட 300 தேர்வர்களில் 163 தேர்வர்கள் வருகை புரிந்து, 137 பேர் வருகை புரியவில்லை. ஸ்ரீ வித்யா பொறியியல் கல்லூரி மையத்தில் அனுமதிக்கப்பட்ட 300 தேர்வர்களில் 170 தேர்வர்கள் வருகை புரிந்து, 130 பேர் வருகை புரியவில்லை. விருதுநகர் எஸ்.வெள்ளைச்சாமி நாடார் பாலிடெக்னிக் கல்லூரியில் அமைக்கப்பட்ட 2 தேர்வு மையங்களில் அனுமதிக்கப்பட்ட 560 தேர்வர்களில் 303 தேர்வர்கள் வருகை புரிந்து, 257 பேர் வருகை புரியவில்லை. விருதுநகர் கே.வி.எஸ். மேல்நிலைப்பள்ளியில் அமைக்கப்பட்ட 3 தேர்வு மையங்களில் அனுமதிக்கப்பட்ட 780 தேர்வர்களில் 420 தேர்வர்கள் வருகை புரிந்து, 360 பேர் வருகை புரியவில்லை.தேர்வு மையங்களில் தேர்வர்களுக்குத் தேவையான அடிப்படை வசதிகள், பாதுகாப்பு ஏற்பாடுகள் மற்றும் கண்காணிப்பு நடவடிக்கைகள் மேற்கொள்ளப்பட்டிருந்தன. தேர்வு தொடங்குவதற்கு முன்னதாக தேர்வர்கள் கடைப்பிடிக்க வேண்டிய விதிமுறைகள் குறித்தும் உரிய அறிவுறுத்தல்கள் வழங்கப்பட்டிருந்தன என மாவட்ட ஆட்சித்தலைவர் அவர்கள் தெரிவித்தார்.
மாவட்ட ஆட்சியர் மற்றும் மாவட்ட அளவிலான அலுவலர்கள் மக்களைத் தேடிச் சென்று குறைகளைக் கேட்டறியவும், பல்வேறு துறைகளின் மூலம் செயல்படுத்தப்படும் திட்டங்கள், செயல்பாடுகளை விரைவுபடுத்தவும் மற்றும் வழங்கப்படும் சேவைகளின் தரத்தை மேம்படுத்தவும், மக்களை நாடி மக்கள் குறைகளைக் கேட்டு, உடனுக்குடன் தீர்வு காண மக்கள் தொடர்பு திட்டம் மாவட்ட ஆட்சியர் தலைமையில் ஒவ்வொரு மாதமும் 2 ஆவது புதன் கிழமை நடத்தப்பட்டு வருகிறது. அதன்படி 09.09.2026 அன்று நடைபெற இருந்த முகாம் நிர்வாக காரணங்களுக்காக ஒத்திவைக்கப்பட்டது.தற்போது, விருதுநகர் மாவட்டம், "சிவகாசி வட்டம் நாரணாபுரம் கிராமத்தில்" அமைந்துள்ள "லலிதா மஹாலில்" வைத்து 22.09.2026 தேதியன்று காலை 11.00 மணி முதல் மதியம் 01.00 மணி வரை மாண்புமிகு தொழில், முதலீட்டு ஊக்குவிப்பு மற்றும் வர்த்தகத் துறை அமைச்சர் மற்றும் மாவட்ட ஆட்சியர் தலைமையில் நடைபெற உள்ளது. இம்முகாமில் அனைத்து துறையினை சேர்ந்த அலுவலர்களும் கலந்து கொள்ள உள்ளனர்.மேற்படி, முகாமில் பொது மக்களிடமிருந்து கோரிக்கை மனுக்கள் பெறவும் நடவடிக்கை எடுக்கப்பட்டுள்ளது. எனவே "சிவகாசி வட்டம் நாரணாபுரம் கிராமத்தில்" உள்ள பொதுமக்கள் தங்களது கோரிக்கைகளை மனுக்களாக நேரில் அளித்து குறைகளை நிவர்த்தி செய்துகொள்ளவும் அரசின் திட்டங்களை முழுமையாக பெற்று பயனடையவும் இந்த அரிய வாய்ப்பினை பயன்படுத்திக் கொள்ளுமாறு மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
விருதுநகர் மாவட்டம், சிவகாசி வட்டத்தில் உள்ள ஆனைக்குட்டம் அணையினை மாவட்ட ஆட்சித்தலைவர் திருமதி ஷரண்யா அறி I A S., அவர்கள்(18.09.2026) பார்வையிட்டு ஆய்வு செய்தார்.விருதுநகர் மாவட்டம் சிவகாசி வட்டத்திற்குட்பட்ட ஆனைக்குட்டம் கிராமத்தில் அர்ஜீனா நதியின் குறுக்கே 1987-ஆம் ஆண்டு கட்டப்பட்டுள்ள அணை ஆனைக்குட்டம் அணையாகும். இந்த அணையானது 591 ச.கி.மீ நீர்வரத்துப்பகுதி உடனும், 2,940 மீ நீளத்தில் 9 நீர் வெளியேற்றும் மதகுகளுடன் அமைக்கப்பட்டுள்ளது. இந்த அணையின் மொத்த நீர்பிடிப்பு பரப்பானது 795.26 சதுர கிலோமீட்டர் ஆகும். இந்த அணையில் 125.752 மில்லியன் கனஅடி நீர் தேக்கி வைக்க முடியும். இந்த அணையின் மூலம் அதிகபட்சமாக 1,708 க.மீ நீரினை வெளியேற்ற இயலும்.இந்த அணையின் கீழ் பகுதியில் 5.1 கி.மீ நீளத்தில் அமைக்கப்பட்டுள்ள பிரதான கால்வாயின் வாயிலாக சிவகாசி வட்டம், கீழத்திருத்தங்கல் கிராமத்தைச் சேர்ந்த 771.77 ஹெக்டர் விவசாய நிலங்களும், விருதுநகர் வட்டம், முத்துலிங்காபுரத்தில் 356.48 ஹெக்டர் நிலங்களும், வாடி கிராமத்தில் 45.82 ஹெக்டர் நிலங்கள் என 1174.07 ஹெக்டர் நிலங்கள் பாசன வசதி பெறுகிறது. இதில் முதல் போகத்திற்கு 1,500 ஏக்கர் நிலமும், இரண்டாம் போகத்தில் 3,000 ஏக்கர் நிலமும் பாசன வசதி பெறும்.இந்த அணையில் பராமரிக்கப்படும் மதகுகள், நீர்த்தேக்கப்பகுதிகள், பிரதான கால்வாய் பகுதிகளை மாவட்ட ஆட்சித்தலைவர் அவர்கள் பார்வையிட்டு ஆய்வு செய்தார்.ஆய்வின் போது, நீர்வள ஆதாரத்துறை செயற்பொறியாளர் திருமதி மலர்விழி, (வைப்பார் வடி நில கோட்டம்) உதவி செயற்பொறியாளர் திரு.கார்த்திகேயன், உதவி பொறியாளர் திரு.கண்ணன் உட்பட பலர் கலந்து கொண்டனர்.
விருதுநகர் மாவட்ட ஆட்சியர் அலுவலக கூட்டரங்கில், சட்டம், ஒழுங்கு மற்றும் சாலை பாதுகாப்பு குறித்து மாவட்ட ஆட்சித்தலைவர் திருமதி ஷரண்யா அறி I A S.,அவர்கள் தலைமையில் அனைத்துத் துறை அலுவலர்களுடன் (18.09.2026) ஆய்வுக்கூட்டம் நடைபெற்றது.விருதுநகர் மாவட்டத்தில் பொதுமக்கள் எவ்வித இடையூறுமின்றி இயல்பு நிலையினை தொடர்ந்து செயல்படுத்திட மாதந்தோறும் சட்டம். ஒழுங்கு தொடர்பாக ஆய்வுக்கூட்டம் நடத்தப்பட்டு தேவையான இடங்களில் கூடுதல் நடவடிக்கைகள் மேற்கொள்ளப்பட்டு வருகிறது. பொது இடங்களில் சுவர் விளம்பரங்கள் மற்றும் பேனர் செய்தல், நீர்வழித்தடங்களின் ஆக்கிரமிப்புகளை அகற்றுதல், மயானப் பாதையினை மறைத்து ஆக்கிரமிப்பு செய்தல், கோவில் இடங்களில் ஆக்கிரமிப்பு ஏற்படுத்தி பொது போக்குவரத்திற்கு இடையூறு ஏற்படுத்துதல், சமூக நல்லிணக்கத்தினை சீர்குலைக்கும் வகையில் செயல்படும் தரப்பினர்கள் மீது நடவடிக்கை மேற்கொள்ளுதல், தேவையான இடங்களில் பாதுகாப்பு கருதி உயர்கோபுர மின்விளக்குகள் ஏற்படுத்துதல், பேருந்து நிறுத்தம் தொடர்பாக எழும் கருத்து வேறுபாடுகள், இறைவழிபாட்டு தளங்களில் உருவாகும் பிரச்சனைகளுக்கு இருதரப்பினருக்கும் ஏற்படும் கருத்து வேறுபாடுகள் குறித்தும் ஆய்வு மேற்கொள்ளப்பட்டது.எவ்வித பொதுமக்களின் பாதுகாப்பினை உறுதி செய்திடவும். இடையூறுமின்றி பொதுமக்கள் தங்களின் இயல்பு நிலையினை மேற்கொள்ள தகுந்த நடவடிக்கை எடுக்க வேண்டும்.பொதுமக்களின் பாதுகாப்பான சாலை போக்குவரத்தினை உறுதி செய்திடவும், நகரின் முக்கிய வீதிகளில் இரண்டு சக்கரம் மற்றும் நான்கு சக்கர வாகனங்களை பொதுமக்களுக்கு எவ்வித இடையூறுமின்றி நிறுத்துவதற்கும், சரியான நிறுத்தங்களில் பேருந்துகளை நிறுத்தி பொதுமக்களை ஏற்றி செல்லவேண்டும்.சாலைகளில் வேகத்தடைகள், வாகனத் தடுப்புகள் இருப்பது வாகன ஓட்டிகளுக்கு எளிதில் தெரியும் வகையில் ஒளிரும் பட்டைகள் அமைத்திட வேண்டும். வாகன விபத்தினை தடுத்திடும் வகையில் ஒளிரும் ஒட்டு வில்லைகளை முக்கிய இடங்களில் அமைத்திடவும், பொதுமக்களுக்கு இடையூறு ஏற்படாத வண்ணம் போக்குவரத்தினை சீர்படுத்திட துறை அலுவலர்கள் நடவடிக்கை மேற்கொள்ள வேண்டும் என கூட்டத்தில் அறிவுறுத்தப்பட்டது.ஆய்வுக்கூட்டத்தில் மாவட்ட வருவாய் அலுவலர் திருமதி ஆனந்தி, சிவகாசி சார் ஆட்சியர் திரு.முகமது இர்பான்,I A S., உதவி ஆணையர் (கலால்) திரு.சோமசுந்தர சீனிவாசன், சிவகாசி மாநகராட்சி ஆணையாளர் திரு.கண்ணன், உட்பட பலர் கலந்து கொண்டனர்.
தமிழ்நாட்டில் உள்ள நியாயவிலைக் கடைகளில் e-KYC பதிவு மேற்கொள்ளாத அனைத்து குடும்ப அட்டை பயனாளிகளுக்கும் 19.09.2026 அன்று அனைத்து நியாயவிலைக் கடைகளிலும் விற்பனை முனைய இயந்திரம் மூலமாக விரல் ரேகை/ கண் கருவிழி சரிபார்ப்பின் மூலம் e-KYC பதிவு மேற்கொள்ள தமிழ்நாடு அரசால் அறிவுறுத்தப்பட்டுள்ளது. அதன்படி, விருதுநகர் மாவட்டத்தில் e-KYC பதிவினை 100% நிறைவு செய்யும் பொருட்டு 19.09.2026 அன்று அனைத்து நியாயவிலைக் கடைகளிலும் சிறப்பு முகாம் நடைபெறவுள்ளது. எனவே, விருதுநகர் மாவட்டத்தில் உள்ள e-KYC பதிவு மேற்கொள்ளாத குடும்ப அட்டைதாரர்கள் அனைவரும் அருகில் உள்ள நியாயவிலைக் கடைகளுக்கு 19.09.2026 அன்று நேரில் சென்று e-KYC பதிவு செய்யமாறு கேட்டுக் கொள்ளப்படுகின்றனர். மேலும் குடும்ப அட்டையில் உள்ள உறுப்பினர்களில் e-KYC பதிவு செய்யாத எவரேனும் பணிநிமித்தமாக தமிழ்நாட்டின் வேறு பகுதிகளில் தற்காலிகமாக வசிப்பவர் எனில், அவர்களும் தற்போது வசிக்கும் பகுதிக்கு அருகில் உள்ள நியாயவிலைக் கடைகளுக்கு தமது குடும்ப அட்டை விபரத்துடன் சென்று e-KYC பதிவு செய்யலாம். எனவே, e-KYC பதிவு செய்யாமல் உள்ள குடும்ப அட்டை உறுப்பினர்கள் அனைவரும் 19.09.2026 அன்று நடைபெறும் சிறப்பு முகாமில் அவசியம் e-KYC பதிவு மேற்கொண்டு விருதுநகர் மாவட்டத்தில் e-KYC பதிவு செய்யும் பணி 100% நிறைவு பெற்றிடுவதற்கு ஒத்துழைப்பு நல்குமாறு மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
விருதுநகர் மாவட்டத்தில் சிவகாசி, அருப்புக்கோட்டை மற்றும் சாத்தூர் வருவாய் கோட்டங்களில் 22.09.2026 அன்று முற்பகல் 11.00 மணி அளவில் கோட்ட அளவிலான விவசாயிகள் குறைதீர்க்கும் நாள் கூட்டம் உதவி ஆட்சியர் சிவகாசி, வருவாய் கோட்டாட்சியர் அருப்புக்கோட்டை மற்றும் சாத்தூர் அவர்களின் தலைமையில் கோட்டாட்சியர் அலுவலகத்தில் நடைபெற உள்ளது. கோட்ட அளவிலான கூட்டத்தில் விவசாய பெருமக்கள் கலந்து கொள்வதுடன், விவசாயம் மற்றும் தனி நபர் தொடர்பான மனுக்களை வருவாய் கோட்டாட்சியர்களிடம் நேரடியாக அளித்து தீர்வு காணவும், வட்டார அளவிலான விவசாயம் மற்றும் விவசாயம் சாராத மனுக்களுக்கு விரைந்து தீர்வு காணப்பட்டு, அந்த மனு மீதான நடவடிக்கை விபரத்தினை மனுதாரருக்கு தெரிவித்திடவும் அனைத்து துறை அலுவலர்களை மாவட்ட ஆட்சித்தலைவர் திருமதி ஷரண்யா அறி I A S., அவர்கள் அறிவுறுத்தியுள்ளார்.
விருதுநகர் மாவட்டம், சிவகாசி வட்டம், செங்கமலப்பட்டி ஊராட்சி, கீழத்திருத்தங்கல் கிராமத்தில் இயங்கி வரும் தனியார் பட்டாசு தொழிற்சாலையினை மாவட்ட ஆட்சித்தலைவர் திருமதி ஷரண்யா அறி I A S., அவர்கள், (17.09.2026) பார்வையிட்டு ஆய்வு செய்தார்.விருதுநகர் மாவட்டம் பட்டாசு தொழில்களில் தமிழகத்தில் முன்னனி மாவட்டமாகவும், பட்டாசு தொழிலானது அதிகப்படியான நபர்களுக்கு வேலை வாய்ப்பு அளிக்க கூடிய தொழிலாகவும், அதிகமானோர் பட்டாசுத் தொழிலை சார்ந்துள்ள மாவட்டமாகவும் விருதுநகர் உள்ளது. இதில் பல்வேறு சூழ்நிலையில் எதிர்பாராத காரணங்களாலும், இயற்கை சூழ்நிலைகளின் மாறுபாட்டாலும் எதிர்பாராத நிலையில் விபத்துகள் ஏற்படும் அபாயமும் உள்ளது.பட்டாசு உற்பத்தியாளர்கள், தொழிலாளர்களை பாதுகாத்திடவும், விபத்தில்லாத தொழிலாக பட்டாசு உற்பத்தியினை உருவாக்கிடும் வகையில் தொழில்நுட்ப வல்லுநர் குழு மூலம் ஆராய்ந்து, தகுந்த வழிமுறைகளையும், விதிமுறைகளையும் உருவாக்கி இத்தொழிலை மேம்படுத்திட நடவடிக்கைகள் மேற்கொள்ளப்பட்டு வருகின்றன.அதனடிப்படையில், கீழத்திருத்தங்கலில் இயங்கும் தனியார் தொழிற்சாலையில் பட்டாசு தொழிலுக்கு தேவையான மூலப்பொருட்களை கலக்கும் விதம், நிர்ணயிக்கப்பட்ட அளவு, பணியாளர்கள் பணியாற்றிட தேவையான இட அளவு, பாதுகாப்பான சூழ்நிலை குறித்தும், பட்டாசு தொழிற்சாலையில் கடைபிடிக்கப்படும் பாதுகாப்பு விதிமுறைகள் குறித்தும் ஆய்வு செய்யப்பட்டது என மாவட்ட ஆட்சித்தலைவர் அவர்கள் தெரிவித்தார்.இந்த ஆய்வின் போது, மாவட்ட வருவாய் அலுவலர் திருமதி ஆனந்தி, சிவகாசி சார் ஆட்சியர் திரு.முகமது இர்பான்,I A S., அரசுத்துறை அலுவலர்கள் உட்பட பலர் கலந்து கொண்டனர்.
விருதுநகர் கே.வி.எஸ். ஆண்கள் மேல்நிலைப் பள்ளியில், குழந்தைகள் பாதுகாப்பு, குழந்தைகள் உளவியல் மற்றும் பள்ளி மாணவ, மாணவியர்களிடையே போதைப்பொருள் பயன்பாட்டினைத் தடுப்பது தொடர்பாக பள்ளித் தலைமையாசிரியர்களுக்கான திறன் வளர்ப்புப் பயிற்சி வகுப்பினை மாவட்ட ஆட்சித்தலைவர் திருமதி ஷரண்யா அறி I A S., அவர்கள் (17.09.2026) தொடங்கி வைத்தார்.ஆசிரியர்களின் பணி மகத்துவத்தினை நன்கு அறிவேன். ஏனெனில் எனது பெற்றோரும் ஆசிரியர்களாக பணிபுரிந்து வருகின்றனர். குழந்தைகளின் பாதுகாப்பு மற்றும் நலனை உறுதி செய்வது அனைவரது முக்கியப் பொறுப்பாகும். பள்ளி என்பது மாணவர்கள் பாதுகாப்பாகவும், அச்சமின்றியும் கல்வி கற்கக்கூடிய சூழலை வழங்கும் இடமாக இருக்க வேண்டும். மாணவர்களின் கல்வி வளர்ச்சியுடன் அவர்களின் உடல், மன மற்றும் சமூக நலனிலும் தலைமையாசிரியர்கள் தனிப்பட்ட கவனம் செலுத்த வேண்டும்.பள்ளிகளில் மாணவர்களின் பாதுகாப்பு தொடர்பான பிரச்சினைகளை ஆரம்ப நிலையிலேயே கண்டறிந்து, உரிய முறையில் கையாள்வதற்கான திறனை தலைமையாசிரியர்கள் பெற்றிருக்க வேண்டும். மாணவர்கள் தங்களுக்கு ஏற்படும் பிரச்சினைகளை தயக்கமின்றி ஆசிரியர்களிடம் தெரிவிக்கும் வகையில் நம்பிக்கையான சூழலை பள்ளிகளில் ஏற்படுத்த வேண்டும்.குழந்தைகள் உளவியல் தொடர்பாக, ஒவ்வொரு மாணவரின் தனிப்பட்ட மனநிலை, குடும்பச் சூழல், கல்வி சார்ந்த அழுத்தம் மற்றும் அவர்களின் நடத்தை மாற்றங்களை ஆசிரியர்கள் புரிந்துகொள்வது அவசியமாகும். மாணவர்களின் பிரச்சினைகளை வெறுமனே ஒழுக்கப் பிரச்சினையாகக் கருதாமல், அவர்களின் பின்னணியைப் புரிந்துகொண்டு அன்புடனும், பொறுமையுடனும் அணுக வேண்டும். தேவையான சந்தர்ப்பங்களில் பெற்றோர்கள் மற்றும் உரிய நிபுணர்களின் ஆலோசனையைப் பெற்றுத் தீர்வு காண நடவடிக்கை மேற்கொள்ள வேண்டும்.போதைப்பொருள் பயன்பாட்டைத் தடுப்பதில் பள்ளிகளுக்கு முக்கியப் பங்கு உள்ளது. மாணவர்களுக்கு போதைப்பொருட்களின் உடல் மற்றும் மனநல பாதிப்புகள் குறித்தும், அதனால் கல்வி மற்றும் எதிர்கால வாழ்க்கையில் ஏற்படக்கூடிய பாதிப்புகள் குறித்தும் தொடர்ந்து விழிப்புணர்வு ஏற்படுத்த வேண்டும். மாணவர்கள் தவறான பழக்கங்களுக்கு ஆளாகாமல் இருப்பதற்கான நேர்மறையான வழிகாட்டுதல்கள், ஆலோசனைகள் மற்றும் விழிப்புணர்வு நிகழ்ச்சிகளை பள்ளிகளில் தொடர்ந்து நடத்த வேண்டும்.மாணவர்களின் நடவடிக்கைகளில் திடீர் மாற்றங்கள், பள்ளிக்கு வருகையில் குறைவு, கல்வியில் ஆர்வம் குறைதல் அல்லது வேறு கவலைக்குரிய அறிகுறிகள் தென்பட்டால், அவற்றை கவனமாக அணுகி, மாணவர்களை குற்றம் சாட்டாமல் அவர்களின் நலனை கருத்தில் கொண்டு தேவையான உதவிகளை வழங்க வேண்டும்.அதன்படி, இன்று நடைபெறும் இத்திறன் வளர்ப்புப் பயிற்சியின் மூலம் தலைமையாசிரியர்களுக்கு குழந்தைகள் பாதுகாப்பு, குழந்தைகள் உளவியல் மற்றும் போதைப்பொருள் தடுப்பு நடவடிக்கைகள் தொடர்பான நடைமுறை அறிவு மற்றும் திறன்களை மேம்படுத்துவதற்கான பயிற்சிகள் வழங்கப்படுகின்றன.எனவே, இந்த பயிற்சி வகுப்பினை தலைமையாசிரியர்கள் நல்ல முறையில் பயன்படுத்திக் கொண்டு, தங்களது பள்ளிகளில் பாதுகாப்பான, போதைப்பொருள் இல்லாத, மாணவர்களின் மனநலத்தை மதிக்கும் சூழலை உருவாக்குவதில் முன்னுதாரணமாக செயல்பட வேண்டும் என மாவட்ட ஆட்சித்தலைவர் அவர்கள் தெரிவித்தார்.இந்நிகழ்ச்சியில், முதன்மைக் கல்வி அலுவலர் திரு.அரவிந்தன், மாவட்ட குழந்தைகள் பாதுகாப்பு அலுவலர் திருமதி இல.மீனாட்சி, மாவட்ட கல்வி அலுவலர்கள், பள்ளி தலைமையாசிரியர்கள், அரசு அலுவலர்கள் உட்பட பலர் கலந்து கொண்டனர்.
விருதுநகர், கே.வி.எஸ்.ஆண்கள் மேல்நிலைப்பள்ளியில், (17.09.2026) தந்தை பெரியார் பிறந்த நாளை முன்னிட்டு ‘சமூக நீதி நாள்” உறுதிமொழியினைமாவட்ட ஆட்சித்தலைவர் திருமதி ஷரண்யா அறி I A S., அவர்கள், தலைமையில் அனைத்து பள்ளி தலைமையாசிரியர்கள் ஏற்றுக்கொண்டனர்.தமிழக அரசின் உத்தரவின்படி தந்தை பெரியார் பிறந்த தினமான செப்டம்பர் -17 ம் தேதி ஆண்டுதோறும் ‘சமூக நீதி நாளாக“ அனுசரிக்கப்படுகிறது.அதன்படி, இன்று ‘பிறப்பொக்கும் எல்லா உயிர்க்கும் என்ற அன்பு நெறியையும்-யாதும் ஊரே யாவரும் கேளிர் என்ற பண்பு நெறியையும்,எனது வாழ்வியல் வழிமுறைகளாகக் கடைபிடிப்பேன். சுயமரியாதை ஆளுமைத் திறனும் – பகுத்தறிவுப் பார்வையும் கொண்டவையாக என்னுடைய செயல்பாடுகள் அமையும். சமத்துவம், சகோதரத்துவம், சமதர்மம் ஆகிய கொள்கைகளுக்காக என்னை ஒப்படைத்துக் கொள்வேன். மானுடத்தின் மீது பற்றையும் மனிதாபிமானத்தையும் என்றும் போற்றுவேன். சமூக நீதியையே அடித்தளமாகக் கொண்ட சமுதாயம் அமைத்திட இந்த நாளில் உறுதியேற்கிறேன்”. என்ற உறுதிமொழியினை அனைத்து பள்ளி தலைமையாசிரியர்கள் ஏற்றுக்கொண்டனர்.அதனைத்தொடர்ந்து மாவட்ட ஆட்சியர் அலுவலக கூட்டரங்கில் அனைத்து துறை அரசு அலுவலர்கள் சமூக நீதி நாள் உறுதிமொழியினை ஏற்றுக்கொண்டனர்.இந்த நிகழ்வின் போது, முதன்மைக் கல்வி அலுவலர் திரு.அரவிந்தன், மாவட்ட குழந்தைகள் பாதுகாப்பு அலுவலர் திருமதி இல.மீனாட்சி, மாவட்ட பிற்படுத்தப்பட்டோர் நலத்துறை அலுவலர் திரு.ஜான்சன் தேவசகாயம், உதவி ஆணையர் (கலால்) திரு.சோமசுந்தர சீனிவாசன், தனித்துணை ஆட்சியர் (சமூக பாதுகாப்பு திட்டம்) திருமதி மோகனா, மாவட்ட கல்வி அலுவலர்கள், பள்ளி தலைமையாசிரியர்கள், அரசு அலுவலர்கள் உட்பட பலர் கலந்து கொண்டனர்.
மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில், விருதுநகர் மாவட்ட ஆட்சியர் அலுவலக கூட்டரங்கில் தேர்தல் கல்வி அறிவுக் குழு கலந்தாய்வுக் கூட்டம் (15.09.2026) நடைபெற்றது.தேர்தல் கல்வியறிவு குழு(ELC) என்பது இந்திய தேர்தல் ஆணையத்தின் ஒரு சிறப்பு முயற்சியாகும். இது மாணவர்களுக்கு பல்வேறு செயல்பாடுகள் மற்றும் பயிற்சிகள் மூலம் தேர்தல் உரிமைகளை அறிந்து கொள்ளவும் வாக்குப்பதிவு மற்றும் வாக்களிக்கும் முறைகளை எளிதாக புரிந்து கொள்ளவும் உதவுகிறது.நேர்மையான மற்றும் விழிப்புணர்வுடன் கூடிய வாக்களிப்பில் வாக்காளர்களை பங்கேற்க செய்தல், தேர்தல் உரிமைகள் மற்றும் வாக்காளர் பதிவு பற்றிய விழிப்புணர்வை ஏற்படுத்துதல், 18 வயது பூர்த்தி அடைவதற்கு முன்பே மாணவர்களைப் பொறுப்புள்ள வாக்காளர்களாக தயார்படுத்துதல், ஜனநாயகம் மற்றும் தேர்தல் நடைமுறைகளை தெளிவாக புரிந்து கொள்ளச் செய்தல் ஆகியவை தேர்தல் கல்வியறிவு குழுவின் முக்கிய நோக்கங்கள் ஆகும்.அதன்படி, இந்த குழுக்கள் மூலம் மாணவர்களுக்கு விழிப்புணர்வு ஏற்படுத்தும் வகையில் மாதிரி வாக்குப்பதிவுகள், வாக்குப்பதிவு இயந்திரம் மற்றும் வி.வி.பேட் செயல் விளக்கங்கள், வாக்காளர் பதிவு குறித்த விழிப்புணர்வு விவாதங்கள், போட்டிகள், இளையோர் நாடாளுமன்றம் உள்ளிட்டவை மூலம் விழிப்புணர்வு ஏற்படுத்தப்பட்டு வருகிறது.அதன்படி தேர்தல் கல்வி அறிவுக் குழுவில் உறுப்பினர்களை சேர்த்து, பள்ளி, கல்லூரி மாணவர்கள், இளம் வாக்காளர்கள், பெண்கள், மாற்றுத்திறனாளிகள் மற்றும் பொதுமக்கள் உள்ளிட்ட அனைத்து தரப்பினரையும் தேர்தல் செயல்பாடுகளில் ஆர்வத்துடன் பங்கேற்கச் செய்வதற்கான விழிப்புணர்வு நிகழ்ச்சிகள் மேற்கொள்வதற்கான நடவடிக்கைகளை மேற்கொள்ள வேண்டும் என மாவட்ட ஆட்சித்தலைவர் அவர்கள் தெரிவித்தார்.இக்கூட்டத்தில் மாவட்ட வருவாய் அலுவலர் திருமதி ஆனந்தி, முதன்மைக் கல்வி அலுவலர் திரு.அரவிந்தன், மாவட்ட ஆட்சியரின் நேர்முக உதவியாளர்(பொது) திருமதி பிர்தௌஸ் பாத்திமா, கல்வி அறிவு குழு ஒருங்கிணைப்பாளர்கள் உட்பட பலர் கலந்து கொண்டனர்.
