25 YEARS OF EXCELLENCE
Weather: -
Tuesday Nov 03, 2026
11:45:25pm
Weather: -
Tuesday Nov 03, 2026
11:45:25pm
விருதுநகர் மாவட்ட ஆட்சியர் அலுவலகக் கூட்டரங்கில் மக்கள் குறைதீர்க்கும் நாள் கூட்டம் மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் (02.11.2026) நடைபெற்றது.இக்கூட்டத்தில், பொதுமக்கள் மற்றும் மாற்றுத்திறனாளிகளிடமிருந்து இலவச வீட்டுமனைப்பட்டா, பட்டா மாறுதல், புதிய குடும்ப அட்டை, வேலைவாய்ப்பு, விபத்து நிவாரணம், மாற்றுத்திறனாளிகள் மற்றும் நலிந்தோர் நல உதவித்திட்டங்கள், விதவை உதவித்தொகை, திருமண உதவித்தொகை மற்றும் முதியோர் உதவித்தொகை உள்ளிட்ட பல்வேறு கோரிக்கைகள் குறித்தான மனுக்கள் பெறப்பட்டன.மேலும், மாவட்ட ஆட்சித்தலைவர் அவர்கள் மாற்றுத்திறனாளிகள் மற்றும் மூத்த குடிமக்களுக்காக அமைக்கப்பட்டுள்ள சிறப்பு அமருமிடத்திற்கு நேரடியாகச் சென்று, அவர்களின் கோரிக்கை மனுக்களைப் பெற்று பரிசீலித்தார். பொதுமக்களிடமிருந்து பெறப்பட்ட இம்மனுக்கள் அனைத்தையும் சம்பந்தப்பட்ட துறை அலுவலர்களிடம் ஒப்படைத்து, அவற்றின் மீது உரிய மற்றும் விரைவான நடவடிக்கை எடுக்கவும், முதலமைச்சரின் தனிப்பிரிவு மனுக்கள் மீது கூடுதல் கவனம் செலுத்தி விரைந்து தீர்வு காணவேண்டும் என உத்தரவிட்டார்.இக்கூட்டத்தில், 5 பயனாளிகளுக்கு மின்னணு குடும்ப அட்டையினையும், மாற்றுத்திறனாளிகள் நலத்துறையின் மூலம் 5 மாற்றுத்திறனாளிகளுக்கு ரூ. 74,995 மதிப்பில் செயலிகளுடன் கூடிய திறன்பேசியினையும் மாவட்ட ஆட்சித்தலைவர் அவர்கள் வழங்கினார்.தொடர்ந்து, பொதுமக்களிடமிருந்து 569 மனுக்கள் பெறப்பட்டன. இம்மனுக்கள் சம்மந்தப்பட்ட துறை அலுவலர்களிடம் உரிய நடவடிக்கை எடுக்க ஒப்படைக்கப்பட்டது.முன்னதாக மாற்றுத்திறனாளிகளுக்கு வேலை வாய்ப்பு பயிற்சி வழங்கிடும் வகையில் சுயதொழில் வழிகாட்டு மையத்தினை குத்துவிளக்கேற்றி தொடங்கி வைத்தார்.இக்கூட்டத்தில், மாவட்ட வருவாய் அலுவலர் திருமதி சசிகலா, மாவட்ட ஆட்சியரின் நேர்முக உதவியாளர் (நிலம்) திரு.சையது முகமது, தனித்துணை ஆட்சியர் (ச.பா.தி) திருமதி மோகனா, மாவட்ட ஆட்சியரின் நேர்முக உதவியாளர் (பொது) திரு.சோமசுந்தர சீனிவாசன், மாவட்ட வழங்கல் அலுவலர் திரு.அமர்நாத், மாவட்ட பிற்படுத்தப்பட்டோர் நல அலுவலர் திரு.ஜான்சன் தேவசகாயம், மாற்றுத்திறனாளிகள் நலத்துறை அலுவலர் திரு.பிரம்ம நாயகம், அரசுத் துறை அலுவலர்கள் மற்றும் பொதுமக்கள் உட்பட பலர் கலந்து கொண்டனர்.
சமூக நீத்துறை அமைச்சர் திரு.ர.வன்னிஅரசு அவர்கள், சமூக நலன் மற்றும் மகளிர் உரிமைத்துறை அமைச்சர் திருமதி கு.ஜெகதீஸ்வரி அவர்கள் ஆகியோர் மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் காரியாபட்டி வட்டம், அயன்ரெட்டியாபட்டி அரசு துவக்கப்பள்ளியில் சுற்றுச்சுவர் அமைக்கும் பணிகளுக்கு(02.11.2026) அடிக்கல் நாட்டினார்கள்.தமிழக அரசுப்பள்ளி மாணவர்கள் சிறந்த கல்வியினை பாதுகாக்கப்பட்ட சூழலில் கற்றிட வேண்டும் என்பதற்காக பள்ளிக்கல்வித்துறையின் மூலம் ஏராளமான உட்கட்டமைப்பு வசதிகள் மேம்படுத்தப்பட்டு வருகின்றன. அயன் ரெட்டியாபட்டி அரசு துவக்கப்பள்ளியானது நான் கல்வி பயின்ற பள்ளி ஆகும்.தமிழக அமைச்சரவையின் சமூக நீதித்துறை அமைச்சராக பொறுப்பேற்ற பின் பிறந்த ஊரான அயன்ரெட்டியாபட்டிக்கு நான் வந்த போது பெரும்பான்மையான பொதுமக்கள் என்னிடம் வைத்த கோரிக்கை இப்பள்ளிக்கு சுற்றுச்சுவர் வேண்டும் என்பது தான். அதனை நிறைவேற்றிடும் விதமாக ஆதிரை அறக்கட்டளையின் மூலம் அதனை நிறைவேற்றுவதில் மிகுந்த மகிழ்ச்சி ஏற்பட்டுள்ளது. நான், மாவட்ட ஆட்சித்தலைவர் மற்றும் சமூக நலன் மற்றும் மகளிர் உரிமைத்துறை அமைச்சர் ஆகியோர் தமிழ் வழியில் பயின்றவர்கள் தான். அரசுப்பள்ளியில் பயின்றால் உயர்ந்த நிலையினை அடைந்திட முடியாது என்ற தவறாக எண்ணத்தினை விடுத்து பெற்றோர்கள் தங்களது குழுந்தைகளை அரசுப்பள்ளியில் சேர்த்து பயில வைக்க வேண்டும்.அரசுப்பள்ளிகளில் பயிலும் மாணவர்கள் அரசின் திட்டங்களை பெறுவதற்கு சாதிச்சான்றிதழ் மிகுந்த அவசியமானதாகும். அதை அனைவருக்கும் கிடைத்துள்ளதை அலுவலர்கள் உறுதி செய்திட வேண்டும். அதேபோல் பொதுமக்களுக்கு இணையவழி பட்டா பெறுவதில் காலதாமதம் ஏற்படுவதாக கோரிக்கைகள் பெறப்பட்டுள்ளன. அதனை விரைந்து அதற்கு தீர்வு காண்டு உரியவர்களுக்கு இணையவழி பட்டா கிடைப்பதனை துறை அலுவலர்கள் உறுதி செய்திட வேண்டும் என சமூக நீதித்துறை அமைச்சர் திரு.ர.வன்னிஅரசு அவர்கள் தெரிவித்தார். தமிழ்நாடு முதலமைச்சர் அவர்கள் தமிழக பொதுமக்களை உற்ற உறவுகளாக எண்ணி அவர்களின் வாழ்வாதார மேம்பாட்டிற்காக பல்வேறு திட்டங்களை குறைந்த காலத்திலேயே ஏற்படுத்தி செயல்படுத்தி வருகிறார்கள். தேர்தல் காலங்களில் தமிழ்நாடு முதலமைச்சர் அவர்கள் அறிவித்த பல்வேறு கோரிக்கைகளை ஒவ்வொன்றாக நிறைவேற்றி வருகிறார். கூடிய விரைவில் அனைத்து வாக்குறுதிகளையும் நிறைவேற்றித் தருவார்.பெற்றோர்கள் பெண் குழந்தைகளையும், ஆண் குழந்தைகளையும் முழு கவனத்துடனும், விழிப்புணர்வுடனும் வளர்க்க வேண்டும். குழந்தைகளுக்கு நல்ல தொடுதல் மற்றும் கூடா தொடுதல் பற்றிய விழிப்புணர்வுகளை ஏற்படுத்த வேண்டும். பெற்றோர்கள் பள்ளி செல்லும் மாணவர்களை முறையாக தலைவாரி செல்ல அறிவுறுத்த வேண்டும். சீருடையில் கால்சட்டையும் பள்ளி கல்வித்துறை அறிவித்துள்ள வழிகாட்டி நெறிமுறைகளை பின்பற்றி அணிந்து செல்ல அறிவுறுத்த வேண்டும். ஒவ்வொரு பெற்றோரும் தங்களது குழந்தைகளை சமூக பொறுப்புகளுடன் வளர்க்கும் பட்சத்தில் மாணவர்கள் வழிமாறி செல்ல மாட்டார்கள். ஆசிரியர்கள் பள்ளி மாணவர்களை மிகுந்த பொறுப்புணர்வுடன் கண்காணித்து வழிநடத்திட வேண்டும்.விருதுநகர் மாவட்டம் தேர்ச்சி விகிதத்தில் கடந்த ஆண்டுகளில் முதல் இடங்களில் இருந்து வந்த நிலையில் தற்போது அதில் சிறு தொய்வு ஏற்பட்டுள்ளது. அதனை சரிசெய்து கல்வி என்றாலே விருதுநகர் மாவட்டம் தான் என்ற உயர்ந்த நிலையினை அடைந்திட ஆசிரியர்கள் கடுமையாக உழைக்க வேண்டும்.தமிழக அரசு பள்ளிக்கல்வித்துறைக்கு அதிக முக்கியத்துவம் அளித்து பல்வேறு திட்டங்களை செயல்படுத்தி வருகிறது. அதனை அனைத்து மாணவர்களும் நல்ல முறையில் பயன்படுத்தி தங்களது கல்வி தரத்தினை மேம்படுத்திக் கொள்ள வேண்டும் என சமூக நலன் மற்றும் மகளிர் உரிமைத்துறை அமைச்சர் திருமதி கு.ஜெகதீஸ்வரி அவர்கள் தெரிவித்தார்.முன்னதாக, அயன்ரெட்டியாபட்டியில் மருத்துவ முகாமினை துவக்கி வைத்து அங்கு வழங்கப்படும் சிகிச்சைகள் குறித்து பொதுமக்களுக்கு எடுத்துரைத்தார்.நிகழ்ச்சியில் அருப்புக்கோட்டை வருவாய் கோட்டாட்சியர் திரு.மாரிமுத்து, முதன்மை கல்வி அலுவலர் திரு.அரவிந்தன், திருச்சுழி வட்டாரக் கல்வி அலுவலர் திரு.செல்வக்குமார், அயன்ரெட்டியாபட்டி முன்னாள் பள்ளி மாணவர் திரு.வீரபாண்டியன், ஆதிரை அறக்கட்டளை நிர்வாகிகள் உட்பட பலர் கலந்து கொண்டனர்.
தீபாவளி பண்டிகை காலத்தில் இனிப்பு மற்றும் கார வகை பலகாரங்களின் தயாரிப்பாளர்களும், விற்பனையாளர்களும் கீழே குறிப்பிட்டுள்ள உணவு பாதுகாப்பு நெறிமுறைகளைத் தவறாது பின்பற்றி, தரமான மற்றும் பாதுகாப்பான உணவை நுகர்வோருக்கு விற்பனை செய்ய வேண்டியது உணவு வணிகர்களின் பொறுப்பாகும். தற்காலிகம் & நிரந்தரக் கடைகள் உள்ளிட்ட அனைத்து இனிப்பு மற்றும் கார பலகாரத் தயாரிப்பாளர்கள்/விற்பனையாளர்கள், https://foscos.fssai.gov.in என்ற இணையதளத்தில் விண்ணப்பித்து, உணவு பாதுகாப்பு உரிமம் பெற வேண்டியதும், அதனைக் காட்சிபடுத்த வேண்டியதும் அவசியமாகும். பலகாரப் பொருட்களைத் தயாரிப்பவர்கள், உணவு பாதுகாப்பு உரிமம் பெற்ற தரமான மூலப்பொருட்களைக் கொண்டு, ஈக்கள் மொய்க்காத மற்றும் அசுத்தம் இல்லாத சுகாதரமான சூழலில் அவற்றைத் தயாரிக்க வேண்டும். அனுமதிக்கப்படாத செயற்கை நிறமிகளை பலகாரத்தில் சேர்க்கக்கூடாது. மேலும், சில உணவுப் பொருட்களுக்கு அனுமதிக்கப்பட்ட நிறமிகளைக்கூட அனுமதிக்கப்பட்ட அளவில் மட்டுமே பயன்படுத்திட வேண்டும். சமையல் எண்ணெயை ஒருமுறை மட்டுமே பயன்படுத்திடல் வேண்டும். பயன்படுத்தி மீதமான ஆறிய நிலையில் உள்ள எண்ணெயை மீண்டும் பயன்படுத்தக்கூடாது. ஒருமுறை பயன்படுத்தி மீதமான சமையல் எண்ணெயை பயோ-டீசல் தயாரிப்பிற்கு விற்றுவிட வேண்டும்.பலகாரங்களை பேக்கிங் செய்தாலும், கிஃப்ட் பாக்ஸாக தயாரித்தாலும், அதன் தயாரிப்பு நாள், காலாவதி நாள், உணவு பாதுகாப்பு உரிமம் எண் உள்ளிட்ட லேபிள் விபரங்களை அவசியம் அச்சிடுதல் வேண்டும். உணவு தயாரிக்கப் பயன்படுத்தும் நெய் மற்றம் சமையல் எண்ணெய் விபரங்களை நுகர்வோர்களின் பார்வைக்குத் தெரியுமாறு கடையில் காட்சிப்படுத்த வேண்டும். கட்டாயம் இல்லை எனினும், பொது சுகாதார நலனைக் கருத்தில்கொண்டு, சில்லறை விற்பனைக்காக காட்சிபடுத்தப்பட்டுள்ள அனைத்து பலகார வகைகளையும், தயாரிப்பு தேதி மற்றும் காலாவதிக் காலம் ஆகிய விபரங்களை வணிகர்கள் சுயமாக முன்வந்து காட்சிப்படுத்த வேண்டும். பலகாரத் தயாரிப்பு மற்றும் விற்பனையில் ஈடுபடும் அனைத்துப் பணியாளர்களும் டைஃபாய்டு மற்றும் மஞ்சள்காமாலைக்கு எதிராகத் தடுப்பூசி போட்டுக்கொண்டு, “தொற்றுநோய்த் தாக்கமற்றவர்களாக” இருக்க வேண்டும். என்பதுடன், அவர்கள் கையுறை, முடிக் கவசம் போன்ற பாதுகாப்பு கவசங்களை அணிந்திருக்க வேண்டும். தமிழ்நாடு அரசால் தடைசெய்யப்பட்ட ஒருமுறை மட்டும் பயன்படுத்தக்கூடிய ப்ளாஸ்டிக் மற்றும் உணவு பாதுகாப்பு மற்றும் தரங்கள் சட்டத்தின் கீழ் அனுமதியற்ற ப்ளாஸ்டிக்குளைப் பயன்படுத்தக்கூடாது. அனைத்துப் பலகாரத் தயாரிப்பாளர்களும், பலகாரம் தயாரிக்கப் பயன்படுத்தும் தண்ணீரை, அரசு (குடிநீர் வடிகால் வாரியம்/பொது சுகாதாரத் துறை பகுப்பாய்வுக்கூடம்) அல்லது தனியார் பகுப்பாய்வுக்கூடத்தில் பகுப்பாய்வு செய்து, பகுப்பாய்வறிக்கை வைத்திருக்க வேண்டும்.மேலும், தீபாவளி பலகாரத் தயாரிப்பில் ஈடுபடும் உணவு வணிகர்களுக்கு, உணவு பாதுகாப்பு குறித்து விழிப்புணர்வு வழங்க வேண்டும் எனவும், பலகாரங்கள் தயாரிப்பு மற்றும் விற்பனை செய்யும் கடைகளில் திடீர் ஆய்வு மேற்கொண்டு, உணவு மாதிரி எடுக்கவும், தரமற்ற அல்லது பாதுகாப்பற்ற பலகாரங்களைத் தயாரிப்பவர்கள் மீது உரிய சட்ட நடவடிக்கை எடுக்கவும், அதுகுறித்தான அறிக்கையை சமர்ப்பிக்க வேண்டும் எனவும் உணவு பாதுகாப்புத் துறைக்கு உத்திரவிடப்பட்டுள்ளது. எனவே, பலகாரத் தயாரிப்பாளர்கள் மற்றும் விற்பனையாளர்கள் சட்ட நடவடிக்கைகளிலிருந்து தங்களைப் பாதுகாத்துக்கொள்ளும் வகையில், உணவு பாதுகாப்பு மற்றும் தரங்கள் சட்டம், 2006-ல் உள்ள உணவு பாதுகாப்பு நெறிமுறைகளை மிகுந்த கவனமுடன் பின்பற்ற வேண்டுமாய் எச்சரிக்கப்படுகின்றது.மேலும், உணவு பாதுகாப்பு துறையில் பதிவு பெற்ற கடைகளில் மட்டும் பலகாரங்களை வாங்குமாறும், விபரச்சீட்டு உள்ள பலகாரங்களை மட்டும் வாங்கி உபயோகிக்குமாறும் நுகர்வோர்கள் கேட்டுக் கொள்ளப்படுகிறார்கள். மேலும், பலகாரங்களின் தரம் குறைபாடு அல்லது சுகாதாரமற்ற கடைகள் குறித்து நுகர்வோர்கள் புகார் தெரிவிக்க விரும்பினால், 04562-225255 என்ற மாவட்ட உணவு பாதுகாப்புத் துறை அலுவலகத்தின் எண்ணிற்கு அழைத்தோ அல்லது 9444042322 என்ற மாநில உணவு பாதுகாப்புத் துறை ஆணையர் அலுவலக எண்ணிற்கு வாட்ஸ்அப் மூலமாகவோ புகார் தெரிவிக்கலாம் என்றும், புகார் அளிப்பவரது ரகசியம் காக்கப்படும் என்றும் தெரிவிக்கப்படுகின்றது என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
1972-ம் ஆண்டு தமிழ்நாடு தொழிலாளர் நல நிதி சட்டத்தின்படி தொழிற்சாலைகள் கடைகள், மோட்டார் போக்குவரத்து நிறுவனங்கள், உணவு நிறுவனங்கள் மற்றும் தோட்ட நிறுவனங்கள் போன்ற அமைப்பு சார்ந்த நிறுவனங்களில் பணிபுரியும் தொழிலாளர்களுக்கு ஒவ்வொரு ஆண்டும் தொழிலாளர் பங்கு ரூ.20/- மற்றும் நிறுவனத்தின் பங்கு ரூ.40/-ஆக மொத்தம் ஒவ்வொரு தொழிலாளிக்கும் ரூ.60/- என கணக்கிட்டு நிறுவனத்தில் பணிபுரியும் தொழிலாளர்களின் எண்ணிக்கைக்கேற்ப தொழிலாளர் நல நிதி தொகையினை தமிழ்நாடு தொழிலாளர் நல வாரியத்திற்கு செலுத்த வேண்டும். அதன்படி நடப்பு 2026-ம் ஆண்டிற்கான தொழிலாளர் நல நிதியினை 31.01.2027-க்குள் செலுத்த வேண்டும்.அவ்வாறு தொழிலாளர் நல நிதி செலுத்தும் தொழிலாளர்கள் மற்றும் அவர்களைச் சார்ந்தோர்களுக்கு வாரியத்தின் மூலம் கல்வி உதவித் தொகை - மழலையர் பள்ளி முதல் பட்ட மேற்படிப்பு வரை, கல்வி ஊக்கத் தொகை, பாடநூல் உதவித் தொகை, திருமண உதவித் தொகை, இயற்கை மரண உதவித் தொகை, விபத்து மரண உதவித் தொகை, மூக்குக் கண்ணாடி உதவித் தொகை, தையல் இயந்திர உதவித் தொகை, அடிப்படை கணினி பயிற்சி உதவித் தொகை, உயர்கல்விக்கான நுழைவுத் தேர்வு உதவித் தொகை, மாவட்ட அளவிலான விளையாட்டு உதவித் தொகை போன்ற பல்வேறு நலத்திட்ட உதவித் தொகைகள் வழங்கப்பட்டு வருகிறது. நலத்திட்ட உதவித் தொகையினைப் பெற தொழிலாளரின் மாத ஊதியம் (Pay. DA) ரூ.35,000/-க்குள் இருக்க வேண்டும். 2026-27ஆம் ஆண்டிற்கு கல்வி உதவித் தொகை மாவட்ட அளவில் முதல் 10 இடங்களுக்குள் வரும் மாணவர்களுக்கு, கல்வி ஊக்கத் தொகை மற்றும் பாடநூல் உதவித் தொகை திட்டங்களுக்கு விண்ணப்பங்கள் வரவேற்கப்படுகிறது. விண்ணப்பங்களை www.lwb.tn.gov.in என்ற தமிழ்நாடு தொழிலாளர் நல வாரிய இணையதளத்தில் பதிவிறக்கம் செய்து கொள்ளலாம். பூர்த்தி செய்யப்பட்ட விண்ணப்பங்கள் ”செயலாளர், தமிழ்நாடு தொழிலாளர் நல வாரியம், சென்னை-06” என்ற முகவரிக்கு 31.12.2026-க்குள் நேரிடையாகவோ அல்லது தபாலிலோ கிடைக்கும்படியாக அனுப்பி வைக்கப்பட வேண்டும் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
மாவட்ட ஆட்சித்தலைவர் திருமதி ஷரண்யா அறி I A S., அவர்கள் விருதுநகர் சூலக்கரை கே.வி.எஸ்.பள்ளி மற்றும் வே.வ.வன்னிய பெருமாள் பெண்கள் கல்லூரி ஆகிய தேர்வு மையங்களில் தமிழ்நாடு அரசு பணியாளர் தேர்வாணையம் நடத்திய தொகுதி-2/2அ பணியிடங்களுக்கான தேர்வுகளை (01.11.2026) பார்வையிட்டு ஆய்வு செய்தார்.விருதுநகர் மாவட்டத்தில் தமிழ்நாடு அரசு பணியாளர் தேர்வாணையம் நடத்திய தொகுதி-2/2அ பணியிடங்களுக்கான தேர்வுகள் 55 மையங்களில் நடைபெற்றது.இத்தேர்வு மையங்களில் மொத்தம் 16,829 தேர்வர்கள் தேர்வு எழுதுவதற்கு அனுமதிக்கப்பட்டிருந்தனர். இதில் 13,957 தேர்வர்கள் தேர்வில் பங்கேற்று தேர்வு எழுதினர். 2,872 தேர்வர்கள் தேர்வில் பங்கேற்கவில்லை. அதன்படி,விருதுநகர் வட்டத்தில் 10 தேர்வு மையங்களில் அனுமதிக்கப்பட்டிருந்த 3,222 தேர்வர்களில் 2,649 தேர்வர்கள் வருகை புரிந்து, 573 பேர் வருகை புரியவில்லை.அருப்புக்கோட்டை வட்டத்தில் 12 தேர்வு மையங்களில் அனுமதிக்கப்பட்டிருந்த 3,257 தேர்வர்களில் 2,750 தேர்வர்கள் வருகை புரிந்து, 507 பேர் வருகை புரியவில்லை.இராஜபாளையம் வட்டத்தில் 10 தேர்வு மையங்களில் அனுமதிக்கப்பட்டிருந்த 3,153 தேர்வர்களில் 2,618 தேர்வர்கள் வருகை புரிந்து, 535 பேர் வருகை புரியவில்லை.சாத்தூர் வட்டத்தில் 5 தேர்வு மையங்களில் அனுமதிக்கப்பட்டிருந்த 1,491 தேர்வர்களில் 1,252 தேர்வர்கள் வருகை புரிந்து, 239 பேர் வருகை புரியவில்லை.சிவகாசி வட்டத்தில் 9 தேர்வு மையங்களில் அனுமதிக்கப்பட்டிருந்த 2,884 தேர்வர்களில் 2,358 தேர்வர்கள் வருகை புரிந்து, 526 பேர் வருகை புரியவில்லை.திருவில்லிபுத்தூர் வட்டத்தில் 9 தேர்வு மையங்களில் அனுமதிக்கப்பட்டிருந்த 2,822 தேர்வர்களில் 2,330 தேர்வர்கள் வருகை புரிந்து, 492 பேர் வருகை புரியவில்லை.தேர்வு மையங்களில் தேர்வர்களுக்குத் தேவையான அடிப்படை வசதிகள், பாதுகாப்பு ஏற்பாடுகள் மற்றும் கண்காணிப்பு நடவடிக்கைகள் மேற்கொள்ளப்பட்டிருந்தன. தேர்வு தொடங்குவதற்கு முன்னதாக தேர்வர்கள் கடைப்பிடிக்க வேண்டிய விதிமுறைகள் குறித்தும் உரிய அறிவுறுத்தல்கள் வழங்கப்பட்டிருந்தன என மாவட்ட ஆட்சித்தலைவர் ,அவர்கள் தெரிவித்தார்.
விருதுநகர் மாவட்டத்தில் இயங்கி வரும் டாஸ்மாக் சில்லறை விற்பனைக் கடைகளில் மதுபானங்களை வாங்கும்போது எழும் தேவையற்ற புகார்களை தவிர்க்கவும், ரொக்கமாக அதிகளவிலான பணத்தினை கையாளுவதை தவிர்க்கவும் நுகர்வோருக்கு ஏற்படும் இடையூறுகளை தவிர்க்கவும், மின்னணு பணப்பரிவர்த்தனை முறையில் மட்டுமே பணம் செலுத்திட வாடிக்கையாளர்கள் கேட்டுக்கொள்ளப்படுகிறார்கள்.அதன்படி, 01.11.2026 முதல் ஒரு விற்பனையில் ரூ.1000/- க்கும் மேல் மின்னனு முறையில் மட்டுமே விற்பனை அனுமதிக்கப்படும் .01.01.2027 முதல் ஒரு விற்பனையில் ரூ.500/- க்கும் மேல் மின்னனு முறையில் மட்டுமே விற்பனை அனுமதிக்கப்படும் .நுகர்வோர் எளிமையாக இணையவழி மதுபான முன்பதிவு முறையின் மூலமும் தொகையினை செலுத்தி கடைக்கு நேரில் வந்து மதுபானங்களை பெற்றுக்கொள்ளலாம்.மேலும் நுகர்வோர்களின் புகார்களுக்கு 1800 889 2015 என்ற கட்டணமில்லா தொலைபேசி எண்ணை தொடர்பு கொள்ளலாம் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
விருதுநகர் மாவட்ட அளவிலான ஓய்வூதியர்கள் குறைதீர்க்கும் நாள் கூட்டம் விருதுநகர் மாவட்ட ஆட்சியர் அவர்களின் தலைமையில் 12.11.2026 அன்று பிற்பகல் 4.00 மணியளவில் விருதுநகர் மாவட்ட ஆட்சியர் அலுவலக புதிய கட்டிடத்தின் தரைதளத்தில் உள்ள மக்கள் குறைதீர்க்கும் கூட்டரங்கில் நடைபெறவுள்ளது.விருதுநகர் மாவட்டத்திலுள்ள அரசு அலுவலகங்கள் மற்றும் அரசு, அரசு உதவி பெறும் கல்வி நிலையங்களில் பணிபுரிந்து ஓய்வு பெற்ற ஓய்வூதியர்கள்/குடும்ப ஓய்வூதியர்கள் ஆகியோர் தங்களது ஓய்வூதியம் மற்றும் இதர ஓய்வூதிய பலன்கள் பெறுவதில் குறைபாடுகள் ஏதும் இருப்பின் அது தொடர்பான கோரிக்கை மனுக்களை 02.11.2026 முதல் 05.11.2026 -முடிய விருதுநகர் மாவட்ட ஆட்சியருக்கு இரட்டைப் பிரதிகளில் அனுப்பி வைக்கலாம். விண்ணப்பங்களில் ஓய்வூதியர் குறைதீர்க்கும் நாள் மனு எனக் குறிப்பிட்டு அனுப்பப்பட வேண்டும். விண்ணப்பத்தில் மனுதாரர் கோரிக்கை விவரத்துடன், ஓய்வூதியர் பெயர், குடும்ப ஓய்வூதியர் என்றால் உறவுமுறை, பணியிலிருந்து ஓய்வு பெற்ற நாள், கடைசியாக பணிபுரிந்த அலுவலகம், ஓய்வூதிய கொடுவை எண் மற்றும் ஓய்வூதியம் பெறும் கருவூலம் ஆகிய விவரங்கள் குறிப்பிட வேண்டும். ஓய்வூதியம் பெறுவதில் உள்ள குறைபாடுகள் குறித்து மாநிலக் கணக்காயருக்கு அனுப்பப்பட்டு அது தொடர்பான பதில் ஏதும் பெற்றிருப்பின் அதன் விவரங்களும் இணைக்கப்பட வேண்டும்.ஓய்வூதியர்களுக்கு/ குடும்ப ஓய்வூதியர்களுக்கு உள்ள குறைகள் குறித்து சம்பந்தப்பட்ட துறை அலுவலர்களுடன் விவாதித்து, ஓய்வூதியர்களின் குறைகளை தீர்க்க தேவையான நடவடிக்கை எடுக்கப்படும் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
பிரதம மந்திரி பயிர் காப்பீட்டுத் திட்டம் (PMFBY) 2016-ம் ஆண்டு முதல் தமிழகத்தில் செயல்படுத்தப்பட்டு வருகிறது. விருதுநகர் மாவட்டத்தில் இந்த ஆண்டு (2026-2027) முதல் ஸ்டேட் பாங்க் ஆப் இந்தியா ஜெனரல் இன்ஸ்யூரன்ஸ் கம்பெனி லிட். மூலம் பயிர் காப்பீடு திட்டம் செயல்படுத்தப்பட உள்ளது.சிறப்பு பருவம் சம்பா நெல் - II பயிர் செய்யவுள்ள விவசாயிகள் அனைவரும் வங்கிகள்/ தொடக்க வேளாண்மை கூட்டுறவு சங்கங்கள் மூலமாகவோ, பொது சேவை மையங்கள் (Common Service Centres (CSC)) மூலமாகவோ பயிர்களை காப்பீடு செய்து கொள்ள வேண்டும். வேளாண் பயிர் சிறப்பு பருவம் சம்பா நெல் - II பயிருக்கு பயிர் காப்பீடு கட்டணம் ஏக்கருக்கு ரூ. 270/- நிர்ணயிக்கப்பட்டுள்ளது. எனவே, விவசாயிகள் கடைசி நேர தாமதத்தை தவிர்த்து உடனடியாக பயிர் காப்பீடு செய்து பயன் அடையுமாறு கேட்டுக் கொள்ளப்படுகிறார்கள். விருதுநகர் மாவட்டத்தில் 2026-27 ஆம் ஆண்டில் சிறப்பு பருவம் சம்பா நெல் II பயிருக்கு பயிர் காப்பீடு செய்ய கடைசி நாள் 16.12.2026 ஆகும்.விவசாயிகள் இத்திட்டத்தின் கீழ் பதிவு செய்யும் போது முன்மொழிவு விண்ணப்பத்துடன், பதிவு விண்ணப்பம், கிராம நிர்வாக அலுவலர் வழங்கும் அடங்கல்/விதைப்பு அறிக்கை, வங்கிக் கணக்கு புத்தகத்தின் (Bank Pass book) முதல் பக்க நகல், ஆதார் அட்டை (Aadhar Card) நகல் ஆகியவற்றை இணைத்து, கட்டணத் தொகையை செலுத்திய பின் அதற்கான இரசீதையும் பொதுச் சேவை மையங்கள்/ தொடக்க வேளாண்மை கூட்டுறவு சங்கங்கள், வங்கிகளில் பெற்றுக் கொள்ளலாம்.எனவே, விவசாயிகள் எதிர்பாராமல் ஏற்படும் இயற்கை பேரிடர்களையும், பூச்சி நோய் தாக்குதலால் ஏற்படும் இழப்பு உள்ளிட்ட பல்வேறு காரணிகளையும் கருத்தில் கொண்டு தங்களது பயிர்களுக்கான காப்பீடை (Crop Insurance) அருகிலுள்ள பொதுச்சேவை மையங்களிலோ (CSC) தொடக்க வேளாண்மை கூட்டுறவு சங்கங்களிலோ (PACCS) அல்லது தேசிய மயமாக்கப்பட்ட வங்கிகளிலோ உரிய காப்பீடு கட்டணம் (Premium) செலுத்தி தங்களது பயிர்களை காப்பீடு செய்து பயன் அடையலாம் என மாவட்ட ஆட்சித்தலைவர் திருமதி ஷரண்யா அறி I A S ., அவர்கள் தெரிவித்துள்ளார்.
விருதுநகர் ஊராட்சி ஒன்றியத்துக்கு உட்பட்ட மீசலூர் ஊராட்சியில், செய்தி மக்கள் தொடர்பு துறையின் சார்பாக வைக்கப்பட்ட தமிழக அரசின் சாதனைகள் விளக்க புகைப்பட கண்காட்சிகளை பொதுமக்கள் பார்வையிட்டனர்.
விருதுநகர் மாவட்ட ஆட்சியர் அலுவலகக் கூட்டரங்கில், (30.10.2026) திங்கள் குறைதீர்க்கும் நாள் கூட்டத்தில் பொதுமக்களிடமிருந்து பெறப்படும் கோரிக்கை மனுக்களைச் செயற்கை நுண்ணறிவு தொழில்நுட்பத்தின் மூலம் பரிசீலித்தல் தொடர்பான பயிற்சியினை மாவட்ட ஆட்சித்தலைவர் திருமதி ஷரண்யா அறி I A S., அவர்கள் தொடங்கி வைத்து உரையாற்றினார்.பொதுமக்களிடமிருந்து பெறப்படும் கோரிக்கை மனுக்களை விரைவாகவும், திறம்படவும் பரிசீலித்து, அவற்றின் மீது உரிய நடவடிக்கைகள் மேற்கொள்வதை உறுதி செய்வது மாவட்ட நிர்வாகத்தின் முக்கியப் பணியாகும். இப்பணிகளை மேலும் எளிமைப்படுத்தவும், மனுக்களின் விவரங்களைத் துல்லியமாகப் பகுப்பாய்வு செய்யவும், செயற்கை நுண்ணறிவு தொழில்நுட்பத்தைப் பயன்படுத்துவது தொடர்பாக இப்பயிற்சி அளிக்கப்படுகிறது.மாவட்டத்தில், ஒவ்வொரு வாரமும் திங்கட்கிழமை அன்று, மக்கள் குறை தீர்க்கும் நாள் முகாம் நடைபெற்று வருகிறது. இம்முகாமில் பொதுமக்களிடமிருந்து சராசரியாக 500 முதல் 800 வரை கோரிக்கை மனுக்கள் பெறப்படுகின்றது.இத்தொழில்நுட்பத்தின் மூலம் மனுக்களின் உள்ளடக்கங்களை வகைப்படுத்துதல், தொடர்புடைய துறைகளுக்கு அனுப்புதல், மனுக்களின் நிலையைத் தொடர்ந்து கண்காணித்தல் மற்றும் மனுக்கள் மீது உரிய காலத்திற்குள் நடவடிக்கை மேற்கொள்வதை மேம்படுத்துதல் போன்ற பணிகளைச் சிறப்பாக மேற்கொள்ள முடியும். மேலும், மனுக்களைப் பரிசீலிக்கும் பணியில் அலுவலர்களின் பணி நேரம் குறைவதோடு, நேரத்தையும் மிச்சப்படுத்தவும், விரைவாக தீர்வு காணவும் முடியும்.எனவே, இப்பயிற்சியில் பங்கேற்கும் அலுவலர்கள் செயற்கை நுண்ணறிவு தொழில்நுட்பத்தைப் பொறுப்புடனும், உரிய வழிகாட்டுதல்களைப் பின்பற்றியும் பயன்படுத்தி, பொதுமக்களின் குறைகளை விரைவாகத் தீர்ப்பதற்கான நடவடிக்கைகளை மேற்கொள்ள வேண்டும் எனத் தெரிவித்தார்.இந்நிகழ்வில் தனித்துணை ஆட்சியர் திருமதி மோகனா உட்பட அரசு அலுவலர்கள் மற்றும் பணியாளர்கள் கலந்து கொண்டனர்.
