மாவட்ட ஆட்சியர் மற்றும் மாவட்ட அளவிலான அலுவலர்கள் மக்களை தேடிச்சென்று குறைகளைக் கேட்டறியவும், பல்வேறு துறைகளின் மூலம் செயல்படுத்தப்படும் திட்டங்கள், செயல்பாடுகளை விரைவுபடுத்தவும் மற்றும் வழங்கப்படும் சேவைகளின் தரத்தை மேம்படுத்தவும், மக்களை நாடி மக்கள் குறைகளைக் கேட்டு, உடனுக்குடன் தீர்வு காண அரசு இயந்திரம் களத்திற்கே சென்று ஆய்வு செய்திட "உங்களைத் தேடி உங்கள் ஊரில்" என்ற புதிய திட்டம் தமிழ்நாடு முதலமைச்சர் அவர்களால் அறிவிக்கப்பட்டு, செயல்படுத்தப்பட்டு வருகிறது.அதன்படி, விருதுநகர் மாவட்டம், இராஜபாளையம் வட்டத்தில் “உங்களைத் தேடி உங்கள் ஊரில்” என்ற திட்டமானது 20.11.2024 ஆம் தேதியன்று காலை 09.00 மணி முதல் மறுநாள் 21.11.2024 ஆம் தேதியன்று காலை 09.00 மணி வரை நடைபெறவுள்ளது.மேலும் 20.11.2024 ஆம் தேதியன்று காலை 09.00 மணி முதல் மாலை 04.30 மணி வரை மாவட்ட ஆட்சியர் மற்றும் மாவட்ட அளவிலான அனைத்து மாவட்ட நிலை அலுவலர்களும் கள ஆய்வில் ஈடுபட்டு, இராஜபாளையம் வட்டத்தில் உள்ள மக்களின் குறைகளைக் கேட்டறிந்து அரசின் அனைத்து நலத்திட்டங்களும் மற்றும் சேவைகளும், தங்கு தடையின்றி மக்களைச் சென்று அடைவதை ஆய்வு செய்ய உள்ளனர்.அதன் ஒரு பகுதியாக, 20.11.2024 ஆம் தேதியன்று மாலை 04.30 மணி முதல் 06.00 மணி வரை இராஜபாளையம் வட்டார வளர்ச்சி அலுவலகத்தில் வைத்து மக்களை சந்தித்து குறைகளைக் கேட்பதும், மாலை 06.00 மணி முதல் மாவட்ட அளவிலான முதல் நிலை அலுவலர்களுடன் திட்டப்பணிகள் குறித்து ஆய்வு செய்து இரவில் தங்கி பணியாற்றவும் உள்ளனர். அன்றைய தினம் நடைபெறும் முகாமில் பொது மக்களிடமிருந்து கோரிக்கை மனுக்கள் பெறவும் நடவடிக்கை எடுக்கப்பட்டுள்ளன. எனவே, இராஜபாளையம் வட்டத்தில் உள்ள பொதுமக்கள் தங்களது பகுதிகளில் உள்ள குறைகளை மாவட்ட ஆட்சியர் அவர்களிடம் நேரில் தெரிவித்து, அரசின் திட்டங்கள் அனைத்தும் தங்கள் பகுதிக்கு முழுமையாக கிடைத்திட இந்த அரிய வாய்ப்பினை பயன்படுத்திக் கொள்ளுமாறு மாவட்ட ஆட்சித்தலைவர் முனைவர் வீ.ப.ஜெயசீலன்.,I A S., அவர்கள் தெரிவித்துள்ளார்கள்.
மாண்புமிகு தமிழ்நாடு முதலமைச்சர் அவர்கள் தலைமையிலான அரசு, தமிழ்நாட்டின் பல்வேறு பகுதிகளில் வாழும் மக்களின் வாழ்க்கை முறைக்கு ஏற்றார் போல், பல்வேறு நலத்திட்டங்களை அறிமுகப்படுத்தி, சமூகத்தில் அனைத்துப் பிரிவினரை பாதுகாத்து அனைத்து தரப்பு மக்களும் பயன்பெறும் வகையில் நலத்திட்டங்களை வகுத்து செயல்படுத்தி வருகிறது.அதன்படி, நான் முதல்வன் திட்டம், ஒரு இலட்சம் விவசாயிகளுக்கு புதிய மின் இணைப்பு வழங்கும் திட்டம், முதலமைச்சரின் காலை உணவுத் திட்டம், கலைஞரின் வருமுன் காப்போம் திட்டம், பெண்களுக்கு இலவச பேருந்து பயணம் திட்டம், மூவலூர் ராமாமிர்தம் அம்மையார் நினைவு புதுமைப்பெண் திட்டம், தமிழ்புதல்வன், மீண்டும் மஞ்சப்பை, நம்ம ஊரு சூப்பரு, 48 மணி நேரம் நம்மை காக்கும் இன்னுயிர் காப்போம் திட்டம், மக்களைத் தேடி மருத்துவம், இல்லம் தேடி கல்வி திட்டம், பசுமை தமிழகம், நம்ம School, TNGCC, ஆடுகளம், தமிழ்ப் பரப்புரைக் கழகம், எண்ணும் எழுத்தும், மகளிர் சுய உதவிக்குழுக்களுக்கான இ.மதி திட்டம், Startup TN, கல்லூரி கனவு, நம் பள்ளி நம் பெருமை, வானவில் மன்றம், அயலக தமிழர் நலன் மறுவாழ்வுத்துறை, Tamilnadu Climate Change Mission உள்ளிட்ட பல்வேறு திட்டங்களை செயல்படுத்தி வருகிறது.இவ்வாறு அரசால் செயல்படுத்தப்படும் மக்கள் நலத்திட்டங்கள் அனைத்தும் உரியவர்களுக்குச் சென்றடைவதை உறுதி செய்யும் நோக்குடன், மக்களுக்கும் அரசிற்கும் இடைவெளியைக் குறைத்திடும் வகையில் மக்களின் கருத்துகள் மற்றும் பின்னூட்டங்களைப் பெறுவதும் முக்கியமானதாகும்.அதனடிப்படையில் இலவச வீட்டுமனைப்பட்டா பெற்ற 4 பயனாளிகளிடம் மாவட்ட ஆட்சித்தலைவர் அவர்கள் நலத்திட்டம் பெற்றதை உறுதி செய்து, கலந்துரையாடி அவர்களின் கருத்துகள் மற்றும் அரசு நலத்திட்டங்கள் மூலம் பெற்று வரும் பயன்கள் குறித்து கேட்டறிந்தார்.மேலும், கடந்த மக்கள் குறைதீர்க்கும் நாள் கூட்டத்தில், விண்ணப்பம் அளித்த சிவகாசி திருத்தங்கல்லைச் சேர்ந்த மாற்றுத்திறனாளி மனுதாரர் திருமதி ரெபேக்காள் என்பவருக்கு இன்று மாற்றுத்திறனாளி அட்டை மற்றும் குடும்ப அட்டையினை மாவட்ட ஆட்சித்தலைவர் அவர்கள் வழங்கி கலந்துரையாடி, அவரின் கருத்துகளை கேட்டறிந்தார்.மனு அளித்த ஒரு வாரத்தில் எனக்கு மாற்றுத்திறனாளி அட்டை மற்றும் குடும்ப அட்டை கிடைத்ததாகவும், பட்டா பெற்ற எங்களை மாவட்ட ஆட்சித்தலைவர் அவர்கள் நேரில் அழைத்து கலந்துரையாடி நலத்திட்டம் பெற்றதை உறுதி செய்ததற்காவும் தமிழ்நாடு முதலமைச்சர் அவர்களுக்கும், மாவட்ட நிர்வாகத்திற்கும் நன்றிகளை பயனாளிகள் தெரிவித்தனர்.
கைம்பெண்கள், கணவனால் கைவிடப்பட்ட பெண்கள், நலிவுற்ற பெண்கள், ஆதவரவற்ற பெண்கள், முதிர்கன்னிகள் மற்றும் பேரிளம் பெண்கள் ஆகியோர்களிடமிருந்து வறுமைக்கோட்டிற்கு கீழ் உள்ள பயனாளிகளை தேர்வு செய்து அவர்கள் சுயதொழில் செய்து சுயமரியாதையுடன் சமூதாயத்தில் வாழ நடமாடும் உணவகங்கள், பழங்கள் மற்றும் காய்கறி வியாபாரம், நடமாடும் சிற்றுண்டி கடைகள், நடமாடும் பழச்சாறு கடைகள், சலவைக் கடைகள் போன்ற சுயதொழில்கள் மூலமாக நிலையான வருமானம் பெற, அவர்களின் வாழ்வாரத்தை மேம்படுத்தும் வண்ணம் கைம்பெண்கள் மற்றும் ஆதரவற்ற மகளிர் நல வாரியத்தின் மூலம் ஒரு பயனாளிக்கு ரூ.50,000/- வீதம் வழங்க அரசாணை வெளியிடப்பட்டுள்ளது.மேற்படி, சுயதொழில் தொடங்க விருப்பம் உள்ள கீழ்கண்ட தகுதிகளை உடைய பயனாளிகளிடமிருந்து கருத்துருக்கள் வரவேற்கப்படுகின்றன. மேலும் இ-சேவை மையம் அல்லது கைபேசி வாயிலகவோ tnwidowwelfareboard.tn.gov.in என்ற இணையதளத்தின் மூலம் முதலில் கீழ்கண்ட அசல் சான்றிதழ்களை இணைத்து பதிவு செய்ய வேண்டும். பின்பு அசல் கருத்துரு நகலினை விருதுநகர் மாவட்ட ஆட்சியர் வளாகத்திலுள்ள மாவட்ட சமூக நல அலுவலகத்தில் சமர்ப்பிக்க விருதுநகர் மாவட்ட ஆட்சியரால் தெரிவித்துக் கொள்ளப்படுகிறது.1. tnwidowwelfareboard.tn.gov.in என்ற இணைய முகப்பினை வாரியத்தில் பதிவு செய்து உறுப்பினராக இருக்க வேண்டும்2. வறுமைக் கோட்டிற்கு கீழ் இருப்பவர்களுக்கு முன்னுரிமை வழங்கப்படும்3. 25 - 45 வயதிற்குள்ளாக இருக்க வேண்டும்4. குடும்ப வருமானம் ரூ.1,20,000/-க்கு மிகாமல் இருக்க வேண்டும்5. குடும்ப அட்டை6. ஆதார் நகல்7. முகவரி சான்று8. கைம்பெண்கள்,கணவனால் கைவிடப்பட்ட பெண்கள், நலிவுற்ற பெண்கள், ஆதரவற்ற பெண்கள், முதிர்கன்னிகள் மற்றும் பேரிளம் பெண்கள் என்பதற்கான சுய அறிவிப்பு சான்று (Self Declaration Certificate).மேற்கண்ட இணையத் தளத்தில் பயனாளிகள் விண்ணப்பிக்கும் பொழுது, ஏதேனும் சந்தேகம் இருப்பின், தொடர்பு கொள்ள வேண்டிய முகவரி மாவட்ட சமூக நல அலுவலகம், மாவட்ட ஆட்சியர் வளாகம், விருதுநகர். 04562- 252 701 / 86808-88634 என்ற தொலைபேசி எண்களை தொடர்பு கொள்ளலாம் என மாவட்ட ஆட்சித்தலைவர் முனைவர் வீ.ப.ஜெயசீலன்,I A S, அவர்கள் தெரிவித்துள்ளார்.
விருதுநகர் மாவட்டத்திற்கு உட்பட்ட 450 கிராம ஊராட்சிகளில் உள்ளாட்சிகள் தினமான 01.11.2024 - அன்று நடைபெற இருந்த கிராம சபைக் கூட்டம் நிர்வாக காரணங்களுக்காக ஒத்திவைக்கப்பட்டது - மேற்படி ஓத்திவைக்கப்பட்ட கிராம சபைக் கூட்டமானது 23.11.2024 - அன்று நடைபெறவுள்ளது. இக்கூட்டத்தில் கீழ்க்காணும் கூட்டப் பொருள்கள் குறித்து விவாதிக்கப்பட உள்ளது. கிராம ஊராட்சியில் சிறப்பாக பணிபுரிந்த ஊழியர்களை சிறப்பித்தல் குறித்து விவாதித்தல். கிராம ஊராட்சியில் சிறப்பாக செயல்பட்டு கொண்டிருக்கும் மகளிர் சுய உதவிக் குழுக்களை கௌரவித்தல் குறித்து விவாதித்தல். வடகிழக்கு பருவமழை முன்னெச்சரிக்கை நடவடிக்கைகள் எடுத்தல் குறித்து விவாதித்தல். தூய்மை பாரத இயக்க(ஊரகம்) திட்டம் குறித்து விவாதித்தல். மகாத்மா காந்தி தேசிய ஊரக வேலை உறுதித் திட்டம் குறித்து விவாதித்தல்.ஜல் ஜீவன் இயக்கம் குறித்து விவாதித்தல். தீன்தயாள் உபாத்யாய கிராமப்புற திறன் மேம்பாட்டு திட்டம் குறித்து விவாதித்தல். கூட்டாண்மை மற்றும் ஒருங்கிணைப்பு பிரிவு குறித்து விவாதித்தல். கூட்டாண்மை வாழ்வாதாரம்குறித்து விவாதித்தல். இதர பொருட்கள் குறித்து விவாதித்தல். எனவே, 23.11.2024 அன்று நடைபெறவுள்ள கிராம சபை கூட்டத்தில் பொதுமக்கள் அனைவரும் தவறாது கலந்து கொள்ள வேண்டுமென மாவட்ட ஆட்சித்தலைவர் முனைவர் வீ.ப.ஜெயசீலன்,I A S, அவர்கள் தெரிவித்துள்ளார்.
விருதுநகர் மாவட்டம், திருவில்லிபுத்தூர் வனச்சரக எல்கைக்கு உட்பட்ட செண்பகத்தோப்பு முதல் வ.புதுப்பட்டி வரை 9 கி.மீ தூரம் உள்ள மலையேற்ற திட்டத்தின் கீழ், துணை இயக்குநர் (மேகமலை புலிகள் காப்பகம், திருவில்லிபுத்தூர்) திரு.ப.தேவராஜ்,இ.வ.ப., அவர்கள் முன்னிலையில், மாவட்ட ஆட்சித்தலைவர் முனைவர் வீ.ப.ஜெயசீலன்.,I A S அவர்கள் மலையேற்றத்தினை தொடங்கி வைத்து, மலையேற்றத்தில் கலந்து கொண்டார்.தமிழ்நாடு துணை முதலமைச்சர் அவர்கள் கடந்த 24.10.2024 அன்று தலைமைச்செயலகத்தில் தமிழ்நாட்டில் உள்ள 40 அழகிய மலையேற்ற வழித்தடங்களை உள்ளடக்கிய தமிழ்நாடு மலையேற்றத் திட்டத்தினை தொடங்கிவைத்தார். மேலும் இத்திட்டத்தின் இலச்சினையினை வெளியிட்டு, இணையவழி முன்பதிவிற்காக (றறற.வசநமவயஅடையெனர.உழஅ) என்ற வலைதளத்தை துவங்கி வைத்தார்.இத்திட்டம் தமிழ்நாட்டின் வனம் மற்றும் வன உயிரினப் பகுதிகளில் நிலையான முறையில் மலையேற்றம் மேற்கொள்வதை ஒரு நோக்கமாகக் கொண்டு செயல்பட்டு வரும் தமிழ்நாடு வன அனுபவக்கழகம் மற்றும் தமிழ்நாடு வனத்துறையின் கூட்டு முன்னெடுப்பில் உருவாக்கப்பட்டுள்ளது.இயற்கை பாதுகாப்பு குறித்த விழிப்புணர்வை பொதுமக்களிடையே ஏற்படுத்தவும் வனப்பகுதியை ஒட்டியுள்ள உள்;ர் மக்களுக்கு நிலையான வாழ்வாதாரத்தை ஏற்படுத்தவும், வனம் மற்றும் வன உயிரின பாதுகாப்பிற்கு வலுசேர்க்கும் விதமாக இந்த 'தமிழ்நாடு மலையேற்றத் திட்டம்' வடிவமைக்கப்பட்டுள்ளது. அதனை தொடர்ந்து 01.11.2024 ஆம் தேதி முதல் இணையவழியில் முன்பதிவு நடைபெற்று வருகிறது. தற்போது மலையேற்ற திட்டம் ஒவ்வொரு வாரமும் வெள்ளி, சனி மற்றும் ஞாயிறு ஆகிய கிழமைகளில் நடைபெறும்.அதன்படி விருதுநகர் மாவட்டத்தில், திருவில்லிபுத்தூர் வனச்சரக எல்கைக்கு உட்பட்ட செண்பகத்தோப்பு முதல் வ.புதுப்பட்டி வரை 9 கி.மீ தூரம் உள்ள மலையேற்ற திட்டத்தில், இணையதளம் வாயிலாக பதிவு செய்து மலையேற்றம் செய்து கொள்ளலாம்.அதன்படி, இணையதளத்தில் பதிவு செய்தவர்கள் திருவில்லிபுத்தூர் வனச்சரக அலுவலகத்தில் இருந்து வாகனம் மூலம் செண்பகத்தோப்பு வரை அழைத்து செல்லப்பட்டு, செண்பகத்தோப்பு முதல் வ.புதுப்பட்டி வரை மலையேற்றத்தில் கலந்து கொண்ட பின்பு, வ.புதுப்பட்டியில் இருந்து வாகனம் மூலம் வனச்சரக அலுவலகத்தில் மீண்டும் அழைத்து வரப்படுவார்கள்.மேலும், இந்த வனப்பகுதியில், செண்பகத்தோப்பில், அடர்ந்த மரங்கள் சூழ்ந்த வனப்பகுதி வழியே நடந்தபடி, சுத்தமான காற்றை சுவாசித்தபடி, இயற்கை அழகை ரசித்தபடி மலை மீது ஏறும் அந்த பயணம் ஆனந்த அனுபவத்தை கொடுக்கும். கூடவே உடல் ரீதியாகவும், மன ரீதியாகவும் ஏராளமான நன்மைகளை பெற்றுத்தரும்.இது போன்று மலையேற்றம் செய்வதால், காடுகளில் பூஞ்சைகள், தாவரங்கள், பூச்சிகள், பறவைகள், ஊர்வன பாலூட்டிகள் போன்றவை சுற்றுச்சூழலை எவ்வாறு வடிவமைக்கின்றன என்பது குறித்து அறிந்து கொள்வதற்கும், காடுகளின் முக்கியத்துவம் குறித்து அறிந்து கொள்வதற்கும் ஒரு வாய்ப்பாக அமையும். எனவே, பொதுமக்கள் அனைவரும் இணையதளம் மூலம் பதிவு செய்து, இந்த வாய்ப்பை பயன்படுத்தி கொள்ள வேண்டும்; என மாவட்ட ஆட்சித்தலைவர் அவர்கள் தெரிவித்தார்.இந்நிகழ்வில், திருவில்லிபுத்தூர் வனச்சரக அலுவலர் திரு.செல்லமணி, அரசு அலுவலர்கள், பொதுமக்கள், சமூக ஆர்வலர்கள் உட்பட 40 நபர்கள் கலந்து கொண்டனர்.
விருதுநகர் மாவட்டம், மாவட்ட மத்திய கூட்டுறவு வங்கி வளாகத்தில் (16.11.2024) 71-ஆவது அனைத்திந்திய கூட்டுறவு வார விழா - கூட்டுறவு சங்கப் பணியாளர்கள் மற்றும் மகளிர் சுய உதவிக்குழு உறுப்பினர்களுக்கான கருத்தரங்கம் மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் தலைமையில் நடைபெற்றது.கூட்டுறவு துறை என்பது ஏறத்தாழ 70 ஆண்டுகாக செயல்பட்டு வருகிறது. கடந்த பத்தாண்டுகளில் நவீன வங்கி துறை மாற்றங்களின் தொழில்நுட்பத்துறை மாற்றங்களை கூட்டுறவுத்துறை கையாண்டு ஒட்டுமொத்த பணம் கையாளக்கூடிய விகிதம் குறைந்து இருக்கிறது. இருந்தாலும், ஒவ்வொரு கிராமங்களிலும் குறிப்பாக விவசாய பெருமக்கள் அதிகமாக வாழக்கூடிய பகுதிகளில் கூட்டுறவு வங்கிகளின் உடைய செயல்பாடுகளின் தேவை அதிகமாக உள்ளது.மேலும் இந்த துறையில் உள்ள பணியாளர்கள் உங்களின் பணிகளோடு, உங்களுடைய உடல் நலன் மற்றும் குடும்ப நலனை பேணுவதிலும் அக்கறையுடன் இருக்க வேண்டும்.தமிழ்நாட்டில் 20 சதவிகிதம் நபர்களுக்கு நீரிழிவு மற்றும் இரத்த அழுத்தம் உள்ளிட்ட நோய்கள் காணப்படுகின்றன. 2030-ல் உலகத்தில் சர்க்கரை நோயின் தலைநகரமாக இந்தியா மாறும் என ஆய்வுகள் தெரிவிக்கிறது.எனவே, ஒவ்வொரு பணியாளர்களும் தங்களுடைய தனிப்பட்ட உடல் நலனையும், குடும்பத்தினருடைய உடல் நலனையும் பேணிக்கொள்வது இந்த வார விழாவின் ஒரு கருத்தாக இருக்க வேண்டும்.மேலும், ஒரு வங்கி நுகர்வோராக இன்று கூட்டுறவுத் துறையில் நாம் எதிர்க்கொள்ளக் கூடிய சிக்கல்கள் அதற்கு நவீன தொழில்நுட்பம் எத்தகைய தீர்வுகளை தருகிறது. தீர்வுகளை எல்லாம் எதிர் கொள்ளக்கூடிய அளவிற்கு இருக்கின்றனவா என்பதை புரிந்து கொள்ள வேண்டும்.ஒவ்வொரு நவீன தொழில்நுட்பமும் குறிப்பாக சமீபத்தில் மிகப்பெரிய அளவில் பங்கு வகிக்கக்கூடிய செயற்கை நுண்ணறிவு தொழில்நுட்பமானது இன்று வங்கிகளின் அன்றாடம் நீங்கள் உங்களுடைய நேரத்தை எதற்காக வங்கியில் செலவழிக்கிறீர்களோ அவற்றை எல்லாம் செய்வதற்கு செயற்கை தொழில்நுட்பங்களின் உதவி உங்களின் நேரத்தை எளிதாக்குகிறது.செயற்கை தொழில்நுட்பத்தில் இருந்து ஒரு தனிமனித ஆற்றல் வெளிப்படுகிறது. செயற்கை நுண்ணறிவு தொழில்நுட்பத்தின் துணை இல்லாமல் இன்றைய காலகட்டத்தில் எதுவும் செய்ய இயலாது. இன்னும் 30 ஆண்டுகள் இந்த துறையில் இருந்து வேலை செய்பவர்கள் நிச்சயமாக இதனை புரிந்து கொள்ள வேண்டும். இல்லையென்றால் இந்த துறையினுடைய வளர்ச்சியை அடுத்த கட்டத்திற்கு எடுத்து செய்ய இயலாது.அது கூட்டுறவுச் சங்கத்தின் உடைய சேவையாக இருந்தாலும், சங்கத்தின் உடைய பணியாளர்கள் அல்லது கூட்டுறவுத் துறையினுடைய பணியாளர்கள் யாராக இருந்தாலும் நவீன தொழில்நுட்ப உதவிகளோடு, வங்கி சேவையை மேம்படுத்துவது என்பது மிக மிக அவசியம். தனிப்பட்ட ஒரு அலுவலரின் செயல்பாட்டிற்கும் அது உதவி செய்யும். வங்கிகள் சங்கங்களின் செயல்பாட்டிற்கும் உதவி செய்கின்றன. இதனை எல்லாம் புரிந்து கொள்வதற்கான முயற்சிகளை மேற்கொள்வது தான் இந்த கூட்டுறவு வார விழா கொண்டாடுவதற்கான தேவையாக இருக்கிறது.மாவட்டத்தில், பெரும்பான்மையான கிராமப்புறங்களில் 5 கி.மீ இடைவேளையில் வங்கி சேவைகள் இருந்தும் உரிய நேரத்தில் வங்கி சேவைகள் கிடைக்க பெறததால், ஏழை எளிய மக்கள் தனியார் நிதி நிறுவனங்கள் மூலம் கடன் பெற்று பல இன்னல்களை அனுபவித்து வருகின்றனர் எனவும், இந்த நிலை மாற கூட்டுறவு நிறுவனங்கள் கிராம புறங்களில் வசிக்கும் மக்களின் பணத்தேவைகளை பூர்த்தி செய்ய தங்களிடம் வரப்பெறும் கடன் மனுக்களை உரிய காலத்தில் பரிசீலித்து கடன் வழங்கிட வேண்டும். மேலும், மகளிர் உதவிக்குழுக்களுக்கு அதிகளவு கடன் வழங்கி ஏழை, எளிய மக்களின் வாழ்வாதாரத்தை உயர்த்திட கூட்டுறவு நிறுவனங்கள் நடவடிக்கை மேற்கொள்ள வேண்டும்.அனைவருக்கும் உரிய நேரத்தில் வங்கி சேவை சென்றடைய செய்யும் வழிகளை கண்டறிந்து அதனை நிறைவேற்றிட வேண்டும். எனவே, இந்த கூட்டுறவுத்துறையின் மூலமாக நாம் சேவையை தரமான சேவையாக உரிய நேரத்தில் அளிக்க வேண்டுமென மாவட்ட ஆட்சித்தலைவர் அவர்கள் கேட்டுக்கொண்டுள்ளார்.முன்னதாக, கூட்டுறவுத்துறை அலுவலர்கள் மற்றும் சங்கப்பணியாளர்கள் அனைவரும் 71-ஆவது அனைத்திந்திய கூட்டுறவு வார விழா உறுதிமொழியினை மாவட்ட ஆட்சித்தலைவர் அவர்கள் தலைமையில் எடுத்துக்கொண்டனர்.இக்கருத்தரங்கில், உதவி ஆட்சியர் (பயிற்சி) திரு.ஹிமான்சு மங்கள்,I A S., கூட்டுறவுச் சங்கங்களின் மண்டல இணைப்பதிவாளர் திரு.பா.செந்தில் குமார், மாவட்ட மத்திய கூட்டுறவு வங்கியின் இணைப்பதிவாளர்/செயலாட்சியர் திருமதி பெ.இராஜலெட்சுமி, துணைப்பதிவாளர்கள், கூட்டுறவு வங்கிப் பணியாளர்கள், சங்கப் பணியாளர்கள், மகளிர் சுய உதவிக்குழு பெண்கள் மற்றும் அரசு அலுவலர்கள் உட்பட பலர் கலந்து கொண்டனர்.
மதுரை வேளாண்மைத்துறை கல்லூரியிலிருந்து விருதுநகர் மாவட்டம் அருப்புக்கோட்டை செட்டிகுறிச்சி கிராம பகுதியில் கணினி மூலம் பயிர் கணக்கெடுக்கும் பணியினை மேற்கொள்வதற்காக வருகை தந்த மாணவிகளிடம் மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் (16.11.2024) பயிர் கணக்கெடுக்கும் பணி குறித்து கேட்டறிந்து கலந்துரையாடினார்.
விருதுநகர் கே.வி.எஸ் ஆங்கில பள்ளியில் (15.11.2024) மாவட்ட நிர்வாகம் மற்றும் தனியார் பள்ளிகள் சார்பில் பள்ளி மாணவர்களுக்காக நடைபெற்ற அறிவியல் கண்காட்சியினை மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் பார்வையிட்டு, கண்காட்சியில் வைக்கப்பட்டிருந்த மாணவர்களின் பல்வேறு அறிவியல் படைப்புகள் குறித்து மாணவர்களிடம் கேட்டறிந்தார்.விருதுநகர் மாவட்டத்தில் பள்ளி மாணவர்களுக்கு, அறிவியலைப் பற்றிய அவர்களின் புரிதலை வெளிப்படுத்துவதற்கு ஒரு வாய்ப்பை வழங்கும் வகையிலும், தனித்துவமான கருத்துக்கள், யோசனைகள் மற்றும் கோட்பாடுகளைக் கொண்டு வரவும் அவர்களின் பாடப்புத்தகங்களுக்கு அப்பால் ஆராய்ச்சி மனப்பான்மையை ஏற்படுத்துவதற்கும், ஊக்கப்படுத்தும் வகையிலும், பரிசோதனை மற்றும் கற்றலில் முழுமையான அனுபவத்தை அவர்கள் பெற உதவிடும் வகையிலும், அறிவியல் கண்காட்சி ஏற்பாடு செய்யப்பட்டு, இராஜபாளையம், சிவகாசி, விருதுநகர் மற்றும் அருப்புக்கோட்டை ஆகிய ஊராட்சி ஒன்றியத்தில் 4 இடங்களில் நடைபெற்ற அறிவியல் கண்காட்சியில் அந்தந்த பகுதிகளில் உள்ள பல்வேறு அரசு, அரசு உதவிபெறும் மற்றும் தனியார் பள்ளிகளில் பயிலும் மாணவர்கள் கலந்து கொண்டு தங்களது படைப்புகளை காட்சிப்படுத்தினர்.அதன்படி, இராஜபாளையம் சின்மய வித்யாலயா மேல்நிலைப்பள்ளியில் நடைபெற்ற அறிவியல் கண்காட்சியில் காட்சிப்படுத்தப்பட்ட 72 படைப்புகளை சுமார் 800-க்கும் மேற்பட்ட மாணவர்கள் மற்றும் ஆசிரியர்களும், சிவகாசி லயன்ஸ் மெட்ரிக்குலேசன் பள்ளியில் நடைபெற்ற அறிவியல் கண்காட்சியில், காட்சிப்படுத்தப்பட்ட 51 படைப்புகளை சுமார் 1200-க்கும் மேற்பட்ட மாணவர்கள் மற்றும் ஆசிரியர்களும்,அருப்புக்கோட்டை ஊராட்சி ஒன்றியம் நோபல் மெட்ரிக் மேல்நிலைப்பள்ளி நடைபெற்ற அறிவியல் கண்காட்சியில் காட்சிப்படுத்தப்பட்ட 91 படைப்புகளை சுமார் 1600-க்கும் மேற்பட்ட மாணவர்கள் மற்றும் ஆசிரியர்களும், விருதுநகர் கே.வி.எஸ்.ஆங்கிலப்பள்ளியில் நடைபெற்ற அறிவியல் கண்காட்சியில் காட்சிப்படுத்தப்பட்ட 58 படைப்புகளை சுமார் 1000-க்கும் மேற்பட்ட மாணவர்கள் மற்றும் ஆசிரியர்களும் பார்வையிட்டனர்.வளங்கள் மேலாண்மை, செயற்கை நுண்ணறிவு எதிர்காலம், ரோபோட்டிக்ஸ், திறன்மிகு வீட்டு உபயோகப் பொருள்கள், விண்வெளி அறிவியல், உடல்நலம் மற்றும் ஆரோக்கியம், குப்பைக்கு குட்பை, நீடித்த நிலையான பயிர் வளர்ச்சி, மாசுக்கட்டுப்பாடு, பேரிடர் மேலாண்மை, அன்றாட வாழ்வில் வடிவியல் உள்ளிட்ட பல்வேறு தலைப்புகளில் நடத்தப்பட்ட கண்காட்சியில் மாணவர்கள் தங்களது படைப்புகளை காட்சிப் படுத்தினர்.விருதுநகர் கே.வி.எஸ் ஆங்கில பள்ளியில் நடைபெற்ற அறிவியல் கண்காட்சியினை மாவட்ட ஆட்சித்தலைவர் அவர்கள் பார்வையிட்டு, கண்காட்சியில் வைக்கப்பட்டிருந்த மாணவர்களின் பல்வேறு அறிவியல் படைப்புகள் குறித்து கேட்டறிந்தார்.இந்த கண்காட்சியினை மாவட்டத்தில் பல்வேறு பகுதிகளிலிருந்து மாணவர்கள், ஆசிரியர்கள், பெற்றோர்கள் உள்ளிட்ட பலர் பார்வையிட்டு பயனடைந்தனர். இந்த அறிவியில் கண்காட்சியில் தங்களது படைப்புகளை காட்சிப்படுத்திய மாணவர்கள் தெரிவிக்கையில், மாவட்ட நிர்வாகத்தால் ஏற்பாடு செய்த இந்த அறிவியில் கண்காட்சி எங்களது படைப்பாற்றலையும், சிந்தனையும் வெளிபடுத்துவதற்கு மிகப்பெரிய ஒரு வாய்ப்பாக இருந்தது எனவும்;,இந்த கண்காட்சியினை பார்வையிடும் போது பல்வேறு புதிய தகவல் மற்றும் சிந்தனைகள் மேம்படுவதோடு, எங்களுக்கு ஊக்கத்தை அளிப்பதாகவும், இது போன்ற வாய்ப்புகளை ஏற்படுத்தி தந்த மாவட்ட நிர்வாகத்திற்கு, இந்த கண்காட்சியில் படைப்புகளை காட்சிப்படுத்திய மாணவர்கள் மற்றும் பார்வையாளர்கள் நன்றிகளை தெரிவித்தனர்.
மாண்புமிகு தமிழ்நாடு முதலமைச்சர் திரு.மு.க.ஸ்டாலின் அவர்கள்(15.11.2024) அரியலூர் மாவட்டம், திருமானூர் ஊராட்சி ஒன்றியம், வாரணவாசி குழந்தைகள் மையத்தில், தமிழ்நாட்டில் பிறக்கும் குழந்தைகளுக்கு ஊட்டச்சத்து குறைபாடுகளை களையும் நோக்குடன் செயல்படுத்தப்பட்டு வரும் முன்னோடி திட்டமான "ஊட்டச்சத்தை உறுதி செய்" திட்டத்தின் இரண்டாம் கட்டத்தினை ரூ.22 கோடி மதிப்பீட்டில் தொடங்கி வைத்து, தாய்மார்களுக்கு ஊட்டச்சத்து பெட்டகங்களை வழங்கினார்.அதனை தொடர்ந்து, விருதுநகர் மாவட்டம், காரியாபட்டி ஊராட்சி ஒன்றியம், சாலை மறைக்குளம் கிராமத்தில் உள்ள குழந்தைகள் நல மையத்தில்;, சமூக நலன் மற்றும் மகளிர் உரிமைத்துறை சார்பில் நடைபெற்ற விழாவில், மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் தலைமையில், நிதி, சுற்றுச்சுழல் மற்றும் காலநிலை மாற்றத்துறை அமைச்சர் திரு.தங்கம் தென்னரசு அவர்கள் “ஊட்டச்சத்தை உறுதி செய்” திட்டத்தின் 2-ம் கட்டத்தினை தொடங்கி வைத்து, தாய்மார்களுக்கு ஊட்டச்சத்து பெட்டகங்களை வழங்கினார்.ஆரோக்கியமான குழந்தைகளே, நாட்டின் வளமான எதிர்காலம் என்பதைக் கருத்தில் கொண்டு, தமிழ்நாடு முதலமைச்சர் திரு.மு.க.ஸ்டாலின் அவர்கள் 7.05.2022 அன்று சட்டப்பேரவையில் விதி 110-ன் கீழ் வெளியிட்ட அறிவிப்பில், 6 வயதுக்கு உட்பட்ட குழந்தைகளை நலமுடன் வளர்த்தெடுக்கும் நோக்கத்துடன், பரந்துபட்ட அளவில் குழந்தைகளுக்கு மருத்துவப் பரிசோதனைகள் செய்ய இருக்கிறோம் என்றும், மருத்துவ உதவி தேவைப்படும் குழந்தைகளுக்கு மருத்துவ உதவியும், ஊட்டச்சத்து தேவைப்படும் குழந்தைகளுக்கு சிறப்பு ஊட்டச்சத்து திட்டம் ஒன்றும் ஏற்படுத்த அரசு முடிவெடுத்துள்ளது என்றும் அறிவித்தார்.அந்த அறிவிப்பினை செயல்படுத்தும் விதமாக, ஒருங்கிணைந்த குழந்தை வளர்ச்சிப் பணிகள் மற்றும் சுகாதாரத்துறை ஒன்றிணைந்து, 6 வயதிற்குட்பட்ட குழந்தைகளில் கடுமையான மற்றும் மிதமான ஊட்டச்சத்துக் குறைபாடுடைய குழந்தைகளுக்கு சிறப்பு மருத்துவப் பரிசோதனைகள் மேற்கொண்டு, மருத்துவ உதவி தேவைப்படும் குழந்தைகள் மற்றும் ஊட்டச்சத்து தேவைப்படும் குழந்தைகள் ஆகியோரைப் பிரித்தறிந்து, குழந்தைகளின் ஊட்டச்சத்துக் குறைபாட்டினை நீக்க 'ஊட்டச்சத்தை உறுதி செய்' என்ற புதிய திட்டத்தை நீலகிரி மாவட்டம், தொட்டபெட்டா ஊராட்சி முத்தோரை குழந்தைகள் மையத்தில் 21.5.2022 அன்று தமிழ்நாடு முதலமைச்சர் அவர்கள் தொடங்கி வைத்தார்.இத்திட்டத்தின் மூலம் தீவிர ஊட்டச்சத்து குறைபாடு உள்ளவர்களாக கண்டறியப்பட்ட குழந்தைகளில் சுமார் 77.3 சதவீதம் குழந்தைகள் இயல்பு நிலைக்கு திரும்பி உள்ளனர்.பிறந்தது முதல் ஆறு மாதம் வரை உள்ள குழந்தைகளுக்கு தாய்ப்பால் மட்டுமே உணவாக வழங்கப்பட வேண்டும். ஊட்டச்சத்து குறைபாடு உள்ள குழந்தைகளின் தாய்மார்களின் உடல்நலம் பேணினால் மட்டுமே, குழந்தைகளின் ஊட்டச்சத்து நிலையினை மேம்படுத்த முடியும்.எனவே தான், தற்போது 76,705 ஊட்டச்சத்து குறைபாடு உள்ளதாக கண்டறியப்பட்டுள்ள 0-6 மாத குழந்தைகளின் பாலூட்டும் தாய்மார்களுக்கு ஊட்டச்சத்து பெட்டகங்களை அவர்களின் வீட்டிற்கே சென்று வழங்குவதோடு மட்டுமல்லாமல், குழந்தைகளின் நிலையை தொடர்ந்து கண்காணிக்கும் "ஊட்டச்சத்தை உறுதி செய்" திட்டத்தின் இரண்டாம் கட்டம் ரூ.22 கோடி மதிப்பீட்டில் தமிழ்நாடு முழுவதும் செயல்படுத்தப்பட்டுள்ளது.இந்த ஊட்டச்சத்தை உறுதி செய் என்ற திட்டம் என்பது மிக முக்கியத்துவம் வாய்ந்தது. ஒரு சமுதாயம் நோயற்ற சமுதாயமாக இருந்தால் தான் அந்த சமுதாயம் உருவாக்ககூடிய தலைமுறை எதிர்காலத்தில் ஒரு திடகாத்திரமான சமுதாயமாக இருக்க முடியும். ஊட்டச்சத்து குறைபாடு உடைய குழந்தைகளை நாம் உருவாக்கினோம் என்றால், நாளை அந்த குழந்தைகள் வளர்ந்து வரக்கூடிய காலத்தில் எதிர்காலத்தில் சந்திக்கக்கூடிய பிரச்சனைகளை எதிர்க்கக்கூடிய சக்தியை தங்களுடைய இளமையிலேயே இழந்தவர்களாக ஆகிவிடுவார்கள்.எனவே தான் ஒரு சமுதாயம் நன்றாக இருக்க வேண்டும் என்றால், அந்த சமுதாயத்தின் உடைய பொருளாதாரம் எவ்வளவு முக்கியமோ, அதற்கு இணையாக தமிழ்நாட்டை பொறுத்தவரை கல்வி மற்றும் சுகாதாரம் ஆகிய இரண்டு காரணிகளை நாம் தொன்று தொட்டு மிக முக்கியமாக கருதி அதற்கான முக்கியத்துவத்தோடு நாம் செயலாற்றி வருகிறோம்.நீண்ட தூரம் கஷ்டப்பட்டு சென்று பாடம் கற்பது என்பது தற்போது மாறி விட்டது. நாம் இருக்கக்கூடிய இடத்திலேயே கல்வி கற்கக்கூடிய ஒரு சூழ்நிலையை உருவாக்க வேண்டும் என்பதற்காகத்தான் அந்தந்த பகுதிகளில் ஆரம்ப பள்ளி, உயர்நிலைப்பள்ளி மற்றும் கல்லூரிகள் உருவாக்கப்பட்டு வருகின்றன. அந்த வகையில் திருச்சுழி பகுதி மக்கள் பயன்பெறும் வகையில் அரசு கலைக்கல்லூரி திறக்கப்பட்டு செயல்பட்டு வருகிறது.அது போல இந்த சமுதாயத்தில் கல்விக்கு இணையாக சுகாதாரம் மற்றும்; மக்கள் நலனில் கருத்தில் கொண்டு கடைக்கோடியில் உள்ள கிராமம் வரை மருத்துவ சேவை வழங்கும் வகையில் தொடர்ச்சியாக பல்வேறு திட்டங்கள் செயல்படுத்தப்பட்டு வருகின்றன.தமிழ்நாடு முழுவதும் இருக்கக்கூடிய 0-6 மாத குழந்தைகளில் ஊட்டசத்து குறைபாடு உள்ள குழந்தைகளின் தாய்மார்களுக்கு ஒருங்கிணைந்த ஊட்டசத்தை வழங்க வேண்டும் என்ற உயரிய நோக்கத்தில் தான் இந்த திட்டம் செயல்படுத்தப்பட்டுள்ளது.இதன் மூலமாக எதிர்காலத்தில் ஊட்டச்சத்து குறைபாடுகள் இல்லாத குழந்தைகளாக உருவாக முடியும். நம்முடைய குழந்தைகள் தான் நம் சமுதாயத்தின், நாட்டின் எதிர்காலம். அவர்கள் ஆரோக்கியமாக இருந்தால் தான் அடுத்து வரக்கூடிய 30 ஆண்டுகளில் அவர்கள் வளர்ந்து மனிதர்களாக உருவாகின்ற போது, நல்ல ஆரோக்கியமான தலைமுறை உருவாகும். அதற்குத்தான்; இந்த திட்டத்தை தமிழக அரசு செயல்படுத்துகிறது.எனவே, ஒருங்கிணைந்த குழந்தை வளர்ச்சித் துறையின் மூலம் அரசு அலுவலர்கள், பணியாளர்கள் இத்திட்டத்தினை சிறப்பாக செயல்படுத்த வேண்டும். ஒவ்வொரு பகுதிகளிலும் இருக்கக்கூடிய குழந்தைகளின் எண்ணிக்கையை முறையாக கணக்கீடு செய்து எந்த ஒரு குழந்தையும் விடுபட்டு விடாமல் இதனை செயல்படுத்த வேண்டும் என தெரிவித்தார்.
விருதுநகர் மாவட்ட ஆட்சியர் அலுவலக கூட்டரங்கில் (15.11.2024) சாத்தூர் எம்.எம்.வித்யாசிரம் சி.பி.எஸ்.இ. பள்ளியை சேர்ந்த 11-ம் வகுப்பு பயிலும் 40 மாணவர்களுடனான "‘Coffee With Collector” ” என்ற 125 -வது கலந்துரையாடல் நிகழ்ச்சியில் மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் மாணவர்களுடன் கலந்துரையாடி, கல்லூரிகள் தேர்வு, உயர்கல்வி மற்றும் வேலைவாய்ப்பு குறித்த உரிய வழிகாட்டுதல் வழங்கினார்.விருதுநகர் மாவட்டத்தில் பள்ளிகளில் பயிலும் மாணவர்களில் கல்வி, பொது அறிவு, விளையாட்டு, ஓவியம், இசை உள்ளிட்ட பல்வேறு திறன் அடிப்படையில் மாணாக்கர்களின் திறன்களை கண்டறிந்து, மாணவ, மாணவியர்கள் தேர்ந்தெடுக்கப்பட்டு பிரதி வாரம் ஒருமுறை அவர்களை மாவட்ட ஆட்சித்தலைவர் அவர்கள் நேரில் அழைத்து கலந்துரையாடும் நிகழ்ச்சி தொடங்கப்பட்டு, இன்று 125-வது முறையாக கலந்துரையாடல் நிகழ்ச்சி நடைபெற்றது.இந்த நிகழ்ச்சியின் முக்கிய நோக்கம், மாணவர்களுடைய உயர்ந்த இலட்சியம், அவர்களுடைய உயர்கல்வி பயில்வதற்கு வழிகாட்டுதல், போட்டி தேர்வுகளை எதிர்கொள்ளுதல், தோல்வியை எவ்வாறு எதிர்கொள்வது, அவர்களுக்கு கல்வி, வேலைவாய்ப்பு உள்ளிட்ட பல்வேறு பிரிவுகளில் அவர்களுடைய சந்தேகங்களை அகற்றி, அவர்கள் வாழ்க்கையில் எங்கு பிறந்தோம், நாம் அரசு பள்ளியில் பயின்றோம், நமக்கு வசதி இல்லை, நமக்கு பின்புலம் இல்லை என்பதெல்லாம், வாழ்க்கையில் ஒரு உயர்ந்த இடத்தை அடைவதற்கு ஒரு தடை இல்லை என்பதை புரிய வைத்து, தன்னம்பிக்கை, விடாமுயற்சி, கடின உழைப்புடன் தொடர்ந்து உழைத்தால் நாம் எதையும் சாதிக்க முடியும் என்பதை உணர்த்தும் வகையில் சரியான வழிகாட்டுதல் வழங்குவதே இந்த நிகழ்ச்சியின் முக்கிய நோக்கமாகும்.இந்த கலந்துரையாடல் நிகழ்ச்சியில் கலந்து கொண்ட பள்ளி மாணவ, மாணவிகளிடம், அவர்களுடைய இலட்சியம், அவர்களுக்கு எந்த துறையில் ஆர்வம், அவர்கள் உயர்கல்வி பயில விரும்பும் கல்லூரி மற்றும் இடம் உள்ளிட்டவை குறித்து கேட்டறிந்தார்.மேலும், பல்வேறு தனித்திறமைகளில் சிறந்து விளங்கும் அரசுப்பள்ளி மாணவர்களை சந்தித்தும், அரசுப்பள்ளிகளுக்கு நேரடியாகச் சென்று, 11, 12 ஆம் வகுப்பு மாணவர்களுடன் கலந்துரையாடி, இலக்கை நிர்ணயிப்பது, அந்த இலக்கை எவ்வாறு அடைவது, வாய்ப்புகளை பயன்படுத்துவது, தொடர்ச்சியான செயல்பாட்டினால் திறமையை வளர்த்துக் கொண்டு வாழ்வில் வெற்றி பெறுவது, தவறுகளில் இருந்து படிப்பினை கற்றுக் கொண்டு எவ்வாறு வாழ்வில் முன்னேறுவது உள்ளிட்ட பல்வேறு கருத்துக்களை கூறி உரிய வழிகாட்டுதல்களை மாணவர்களுக்கு வழங்கினார்.கல்வி பற்றிய விழிப்புணர்வு இருந்தால் தான் நிறைய இடங்களில் நமது திறமையை காட்முடியும்,பள்ளி, கல்லூரி படிப்பு என்பது ஒருவரின் வாழ்க்கையில் ஒருமுறை மட்டுமே கிடைக்கும். எனவே பள்ளி மற்றும் கல்லூரி படிப்பின் மூலம் வாழ்க்கைக்கான பல அனுபவங்களை கற்றுக் கொள்ளலாம். அனுபவங்களில் இருந்து கிடைக்கும் கல்விதான் சிறந்த கல்வியாகும்.பன்னிரண்டாம் வகுப்பு பள்ளி படிப்பை முடித்தவுடன் கல்லூரி படிப்பில் சேருவதற்காக அனைத்து கல்லூரிகளிலும் தவறாமல் விண்ணப்பம் செய்ய வேண்டும். கடந்தாண்டு எந்த கல்லூரியில் எவ்வளவு கட் ஆப் மதிப்பெண் அடிப்படையில் மாணவர் சேர்க்கை நடைபெற்றது போன்ற தகவல்களை தெரிந்துகொள்ள வேண்டும். ஒவ்வொருவரும் தங்களது தனித் திறமைகளை வளர்த்துக்கொள்ள வேண்டும்.பன்னிரெண்டாம் வகுப்பில் எடுக்க கூடிய மதிப்பெண்களை பயன்படுத்தி நமக்கான நல்ல வாயப்புகளை உருவாக்கி கொள்ள வேண்டும். உயர்கல்வி எங்கு பயின்றாலும், இந்தியாவில் சிறந்த கல்லூரியை தேர்ந்தெடுத்து படிக்க வேண்டும். வெற்றிக்கு தேவையான விஷயங்களை தொடர்ந்து ஆர்வத்துடன், கவனசிதறல் இல்லாமல், தொடர்ந்து விடா முயற்சியுடனும், கடினமாக உழைத்தால் எளிதாக வெற்றி பெறலாம்.மேலும், ஒவ்வொருவருக்கும் என்று தனித்திறமைகள் உள்ளன. அத்திறமைகளை அனைவரும் வளர்த்து கொண்டு வாழ்வில் முன்னேற வேண்டும் என மாவட்ட ஆட்சித்தலைவர் அவர்கள் தெரிவித்தார்.இந்த சந்திப்பில் மாணவ, மாணவியர்கள் உற்சாகத்துடன் கலந்து கொண்டு, இந்த நிகழ்ச்சி மூலம் எங்களுக்கு ஒரு புத்துணர்வு, ஊக்கம் அளிப்பதாகவும், மாவட்ட ஆட்சியர் போன்று தாங்களும் சாதிக்க வேண்டும் என்ற எண்ணம் உருவாகி உள்ளதாகவும், எங்களுடைய கேள்விகள் மற்றும் சந்தேகங்களுக்கு மாவட்ட ஆட்சியர் தெளிவான விடை கொடுத்ததாகவும், நாங்களும் மாவட்ட ஆட்சியர் போன்று சாதித்து காட்டுவோம் என்றும், இந்த நிகழ்ச்சி ஏற்பாடு செய்த மாவட்ட ஆட்சித்தலைவர் அவர்களுக்கு மாணவர்கள் தங்களது நன்றிகளை தெரிவித்துக்கொண்டனர்.
