பிரதம மந்திரி பயிர் காப்பீட்டுத் திட்டம் (PMFBY) ராபி 2024-25 பருவத்தில் (அக்டோபர் முதல்) பயிர் செய்துள்ள பயிர்களுக்கு விவசாயிகள் அனைவரும் வங்கிகள்/ தொடக்க வேளாண்மை கூட்டுறவு சங்கங்கள் மூலமாகவும் மற்றும் பொது சேவை மையங்கள் மூலமாகவும் பயிர்களை காப்பீடு செய்து கொண்டு வருகின்றனர்.விவசாயிகள் இத்திட்டத்தின் கீழ் பதிவு செய்யும் போது முன்மொழிவு விண்ணப்பத்துடன், பதிவு விண்ணப்பம், கிராம நிர்வாக அலுவலர் வழங்கும் அடங்கல்/ விதைப்பு அறிக்கை, வங்கிக் கணக்கு புத்தகத்தின் (Bank Pass book) முதல் பக்க நகல், ஆதார் அட்டை (Aadhar Card) நகல் ஆகியவற்றை இணைத்து, கட்டணத் தொகையை செலுத்திய பின் அதற்கான இணையதள இரசீதையும் பொதுச் சேவை மையங்கள்/ தொடக்க வேளாண்மை கூட்டுறவு சங்கங்கள், வங்கிகளில் பெற்றுக் கொள்ளவேண்டும்.அவ்வாறு விவசாயிகள் தாங்கள் பயிர் காப்பீடு செய்ததற்கான இணையதள ரசீதினைப் பெறும்பொழுது தாங்கள் பயிரிட்டுள்ள பயிரின் பெயர், பயிர் செய்துள்ள கிராமம் மற்றும் தங்களது வங்கிக் கணக்கு பற்றிய விபரங்கள் ஆகியவை சரியாக பதிவு செய்யப்பட்டுள்ளனவா என்பதை சரி பார்த்துக் கொள்ளவேண்டும். இவ்வாறு சரிபார்க்கும்பொழுது தங்களது விண்ணப்பங்களில் குறைகள் ஏதுமிருப்பின் உடனே அதை இரத்து செய்து புதிய விண்ணப்பித்தினை இணையதளத்தில் பதிவேற்றம் செய்ய வேண்டும். இதன் மூலம் பயிர் காப்பீடு இழப்பீடு வரும்பொழுது தவறான தங்கள் விண்ணப்ப பதிவினால் விவசாயிகள் இழப்பீடு பெறுவதில் உள்ள சிரமங்கள் தவிர்க்கப்படும் என மாவட்ட ஆட்சித்தலைவர் முனைவர் வீ.ப.ஜெயசீலன்,I A S.,அவர்கள் தெரிவித்துள்ளார்.
விருதுநகர் அரசு மருத்துவக் கல்லூரியில் (23.10.2024) வெள்ளை அங்கி வழங்கும் நிகழ்ச்சியில் முதலாம் ஆண்டு பயிலும் 150 மாணவர்களுக்கு மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் வெள்ளியங்கிகளை வழங்கினார்.முதலாம் ஆண்டு மாணவர்களான நீங்கள் இன்று இருக்கக்கூடிய நிலைமை என்பது எவ்வளவு மிக முக்கியத்துவம் வாய்ந்ததாக இருக்கின்றது. இந்த வாய்ப்பு கிடைக்காத லட்சக்கணக்கானவர்களுக்கு இது எவ்வளவு பெரிய கனவு என்பதை நீங்கள் நிச்சயமாக தெரிந்திருப்பீர்கள்.இந்த சமுதாயத்தில் மருத்துவ துறை எவ்வளவு பாதைகளை கடந்து வந்திருக்கின்றது, எவ்வளவு பொறுப்புகளை கடந்து வந்திருக்கிறது என்பதை நீங்கள் கவனிக்க தொடங்கினீர்கள் என்றால், எவ்வளவு பொறுப்புக்கு உரியவர்கள் நீங்கள் என்பதை நீங்கள் புரிந்து கொள்ள முடியும்.எனவே நாளை சமூகத்தின் மதிப்பு மிக்க பொறுப்பு மிக்க மருத்துவர்களாக நீங்கள் உருவாவதற்கு நீங்கள் என்னென்னவெல்லாம் தியாகங்களை செய்ய வேண்டும். உங்கள் தகவமைப்புகளை எப்படி வளர்த்துக் கொள்ள வேண்டும் என்பதை எல்லாம் தொடங்குவதற்காக தான் இந்த நிகழ்ச்சி. திருவள்ளுவர் அறிவற்றங் காக்குங் கருவி செறுவார்க்கும் உள்ளழிக்க லாகா அரண் என்ற திருக்குறளில், ஒரு பெரிய கோட்டையை கூட நம்முடைய எதிரிகளால் அழித்து விட முடியும். ஆனால் நாம் பெற்ற அறிவானது ஒருபோதும் உனக்கு நேரக்கூடிய துன்பத்தில் உன்னை பாதுகாக்கும் என்று கூறுகிறார். அதே போல் தான் நீங்கள் அனைவரும் அறிவில் சிறந்தவர்களாக விளங்க வேண்டும்மேலும், மற்ற உயிரின் துன்பத்தை தன் துன்பம் போல் கருதிக் காப்பாற்றா விட்டால் நாம் பெற்றுள்ள அறிவினால் எந்த ஒரு பயனும் கிடையாது என்றும் கூறுகிறார். இந்த இரண்டையும் நீங்கள் அனைவரும் முக்கியமாக கவனத்தில் எடுத்துக்கொள்ள வேண்டும் எனவும்,நீங்கள் அனைவரும்; மனித குல வரலாற்றில் அடுத்து வரக்கூடிய ஐம்பது நூற்றாண்டுகளில் இந்த சமூகத்தில் உங்களுடைய பங்களிப்பை மிக சிறப்பாக செயலாற்ற வேண்டும். இந்த சமூகத்தில் மனித குலத்தின் போக்கை தீர்மானிக்க கூடியவர்களாக 120 கோடி மக்கள் தொகை இருக்கக்கூடிய இந்த நாட்டில் ஒவ்வொரு துறையிலும் தேர்ந்தெடுக்கப்பட்ட ஒரு சிலர் தான் துறையினுடைய போக்கை எதிர்காலத்தில் தீர்மானிக்க கூடியவர்களாக இருக்கிறார்கள். எந்த துறையாக இருந்தாலும், ஒரு சிலர்; தான் அவர்கள் வாழக்கூடிய காலகட்டத்திலும், அதற்கு அடுத்த வரக்கூடிய சில நூற்றாண்டுகளுக்கும், இந்த சமுதாயமும், மனித குலமும் தான் பாதையை தீர்மானிக்கிறது. அவர்கள் அறிவில் சிறந்தவர்களாக இருக்கக்கூடியது முக்கியம் . அதை விட இந்த மனித குலத்தின் அடிப்படை பண்புகளான அனுதாபம், ஒப்பிடுதல் ஆகியவை இருப்பது தான் மிக முக்கியம்.உதவி வரைத்தன்று உதவி உதவி செயப்பட்டார் சால்பின் வரைத்து என்ற திருக்குறளில், உதவி என்பது செய்யப்படும் அளவைப் பொருத்துச் சிறப்படைவதில்லை. அந்த உதவியை பெறுபவரின் பண்பைப் பொருத்தே அதன் அளவு மதிப்பிடப்படும் என்று கூறுகிறார். இதனை தான் உலகம் முழுவதும் உள்ள விஞ்ஞானிகளும் கூறுகின்றார்கள். எனவே நம்முடைய பணியில் அர்ப்பணிப்பு என்பதும், தினசரி புதிதாக கற்றுக் கொள்ளுதல் என்பதும் மிக மிக முக்கியம். மருத்துவத்துறையில் தான் துறைகளினுடைய தொடர்ச்சியான வளர்ச்சிகளை வரலாற்று ரீதியாக பார்த்துக் கொண்டு வருகிறோம்.மருத்துவத்தொழில் மட்டும் தான் தொடர்ச்சியாக அடுத்து வரும் 50 ஆண்டுகளுக்கு உங்களுடைய பண்பை, அறிவை, குண நலன்களை நீங்கள் எப்படி பயன்படுத்த போகிறீர்கள் என்பதற்கான நாற்றாங்காலாக அறிவை எப்படி விரிவு படுத்தப் போகிறீர்கள் என்பதற்கான வாய்ப்பாக கல்லூரி வாழ்வை நீங்கள் பயன்படுத்திக் கொள்ளுங்கள்இதில் சக மனிதர்களை மதித்தல், புரிந்து கொள்ளுதல் உள்ளிட்ட பல்வேறு பண்புகளை நீங்கள் நிச்சயமாக கற்றுக் கொள்ள வேண்டும் என்று சமூகம் எதிர்பார்க்கிறது. அதில் உங்களுக்கான பொறுப்பும் உள்ளது. அந்த பொறுப்புகளையும், கடமைகளையும் நீங்கள் புரிந்து கொள்வதற்காக தொடக்கமாகத்தான் இந்த விழா என மாவட்ட ஆட்சித்தலைவர் முனைவர் வீ.ப.ஜெயசீலன்.,இ.ஆ.ப., அவர்கள் தெரிவித்தார்.இந்நிகழ்ச்சியில் அரசு மருத்துவக் கல்லூரி முதல்வர், மருத்துவத்துறை அலுவலர்கள், பேராசிரியர்கள், மாணவ மாணவியர்கள், பலர் கலந்து கொண்டனர்.
விருதுநகர் மாவட்டம், சாத்தூர் ஊராட்சி ஒன்றியம் சின்னக்காமன்பட்டி ஊராட்சியில் (23.10.2024) செய்தி மக்கள் தொடர்புத்துறையின் சார்பாக வைக்கப்பட்டுள்ள தமிழக அரசின் சாதனை விளக்க புகைப்படக் கண்காட்சியினை பொதுமக்கள் பார்வையிட்டனர்.
விருதுநகர் மாவட்டம், இராஜபாளையம் அரசு தலைமை மருத்துவமனையில் கட்டப்பட்டு வரும், பல்நோக்கு கட்டடப்பிரிவுகளை தென்காசி நாடாளுமன்ற உறுப்பினர் திருமதி ராணி ஸ்ரீகுமார் அவர்கள் மற்றும் இராஜபாளையம் சட்டமன்ற உறுப்பினர் திரு.எஸ்.தங்கப்பாண்டியன் அவர்கள் ஆகியோர் முன்னிலையில், மருத்துவம் மற்றும் மக்கள் நல்வாழ்வுத்துறை அமைச்சர் திரு.மா.சுப்பிரமணியன் அவர்கள்(23.10.2024) நேரில் சென்று பார்வையிட்டு ஆய்வு மேற்கொண்டு, அங்கு சிகிச்சை பெற்று வரும் நோயாளிகளிடம் வழங்கப்படும் மருத்துவ வசதிகள் மற்றும் சிகிச்சை முறைகள் குறித்து கேட்டறிந்தார். தமிழ்நாட்டு முதலமைச்சரின் வழிகாட்டுதலோடு, ஏற்கனவே தமிழ்நாடு முழுவதிலும் 19 அரசு தலைமை மருத்துவமனைகள் மட்டுமே இருந்த நிலையில், அந்தந்த மாவட்டங்களில் இருக்கக்கூடிய முக்கிய நகரங்களில் மாவட்ட அரசு தலைமை மருத்துவமனைகள் அமைய வேண்டும் என்கின்ற நோக்கில் 25 புதிய மாவட்ட தலைமை அரசு மருத்துவமனைகளை உருவாக்கிட உத்தரவிடப்பட்டுள்ளது.அந்த வகையில் தமிழ்நாடு முழுவதும் ரூ.1018.85 கோடி மதிப்பீட்டில் 2023 ஆம் ஆண்டின் தொடக்கத்திலிருந்து தமிழ்நாடு முழுவதிலும் 25 இடங்களில் மாவட்ட அரசு தலைமை மருத்துவமனைகள் அமையும் பணிகள் நடைபெற்று கொண்டிருக்கிறது. அந்த வகையில் அறிவிக்கப்பட்ட ஒவ்வொரு மருத்துவமனைகளும் பல்வேறு புதிய மருத்துவக் கட்டமைப்புகள் என்பது தொடர்ச்சியாக செயல்படுத்தப்பட்டு வருகிறது. விருதுநகர் மாவட்டத்தை பொறுத்தவரை இரண்டு இடங்களில் மாவட்ட அரசு தலைமை மருத்துவமனைகள் அமைய அனுமதி வழங்கப்பட்டது.அதில் அருப்புக்கோட்டை மற்றும் இராஜபாளையம் மருத்துவமனை கட்டும் பணிகள் நடைபெற்றுக்கொண்டிருக்கிறது. அதில் குறிப்பாக இராஜபாளையம் பகுதியில் சுமார் ரூ.40 கோடி மதிப்பீட்டில் 1.8 ஏக்கர் நிலப்பரப்பில் 227 புதிய படுக்கைகள் கொண்ட மருத்துவமனை அமைவதற்கான பணிகள் தொடர்ந்து நடைபெற்றுக்கொண்டிருக்கிறது.மேலும், அருப்புக்கோட்டையில் சுமார் ரூ.30 கோடி மதிப்பில் மருத்துவமனை பணிகள் நடைபெற்று கொண்டிருக்கிறது. இந்த பணிகள் விரைவில் முடிக்கப்பட்டு பயன்பாட்டிற்கு கொண்டு வரப்படும் எனவும், நடைபெற்று வரும் பணிகளை விரைவாகவும், தரமாகவும் முடித்து பொதுமக்களின் பயன்பாட்டிற்கு கொண்டுவர வேண்டுமென மாண்புமிகு மருத்துவம் மற்றும் மக்கள் நல்வாழ்வுத்துறை அமைச்சர் திரு.மா.சுப்பிரமணியன் அவர்கள் தெரிவித்தார்.பின்னர், மருத்துவர்கள் மற்றும் மருத்துவப் பணியாளர்களுடனான ஆய்வு கூட்டம் மாண்புமிகு மருத்துவம் மற்றும் மக்கள் நல்வாழ்வுத்துறை அமைச்சர் அவர்கள் தலைமையில் நடைபெற்றது.இந்த ஆய்வு கூட்டத்தில் மருத்துவமனை மேம்படுத்துவதற்கான கருத்துக்கள் மற்றும் குறைகள் தொடர்பான கோரிக்கைகளை கேட்டறிந்தார்.இக்கூட்டத்தில், இராஜபாளையம் நகர்மன்ற தலைவர் திருமதி பவித்ரா ஷியாம், இணை இயக்குநர் (மருத்துவப்பணிகள்) திரு. பாபுஜி, மருத்துவ அலுவலர்கள் மற்றும் அரசு அலுவலர்கள் உட்பட பலர் கலந்து கொண்டனர்.
விருதுநகர் மாவட்ட ஆட்சியர் அலுவலக கூட்டரங்கில் (23.10.2024) இராஜபாளையம், நாடார் மெட்ரிக் மேல்நிலைப்பள்ளியில் 11-ம் வகுப்பு பயிலும் 45 மாணவர்களுடனான ""Coffee With Collector” ” என்ற 113-வது கலந்துரையாடல் நிகழ்ச்சியில் மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் மாணவர்களுடன் கலந்துரையாடி, கல்லூரிகள் தேர்வு, உயர்கல்வி மற்றும் வேலைவாய்ப்பு குறித்த உரிய வழிகாட்டுதல் வழங்கினார்.விருதுநகர் மாவட்டத்தில் பள்ளிகளில் பயிலும் மாணவர்களில் கல்வி, பொது அறிவு, விளையாட்டு, ஓவியம், இசை உள்ளிட்ட பல்வேறு திறன் அடிப்படையில் மாணாக்கர்களின் திறன்களை கண்டறிந்து, மாணவ, மாணவியர்கள் தேர்ந்தெடுக்கப்பட்டு பிரதி வாரம் ஒருமுறை அவர்களை மாவட்ட ஆட்சித்தலைவர் அவர்கள் நேரில் அழைத்து கலந்துரையாடும் நிகழ்ச்சி தொடங்கப்பட்டு, 113-வது முறையாக கலந்துரையாடல் நிகழ்ச்சி நடைபெற்றது.இந்த நிகழ்ச்சியின் முக்கிய நோக்கம், மாணவர்களுடைய உயர்ந்த இலட்சியம், அவர்களுடைய உயர்கல்வி பயில்வதற்கு வழிகாட்டுதல், போட்டி தேர்வுகளை எதிர்கொள்ளுதல், தோல்வியை எவ்வாறு எதிர்கொள்வது, அவர்களுக்கு கல்வி, வேலைவாய்ப்பு உள்ளிட்ட பல்வேறு பிரிவுகளில் அவர்களுடைய சந்தேகங்களை அகற்றி, அவர்கள் வாழ்க்கையில் எங்கு பிறந்தோம், நாம் அரசு பள்ளியில் பயின்றோம், நமக்கு வசதி இல்லை, நமக்கு பின்புலம் இல்லை என்பதெல்லாம், வாழ்க்கையில் ஒரு உயர்ந்த இடத்தை அடைவதற்கு ஒரு தடை இல்லை என்பதை புரிய வைத்து, தன்னம்பிக்கை, விடாமுயற்சி, கடின உழைப்புடன் தொடர்ந்து உழைத்தால் நாம் எதையும் சாதிக்க முடியும் என்பதை உணர்த்தும் வகையில் சரியான வழிகாட்டுதல் வழங்குவதே இந்த நிகழ்ச்சியின் முக்கிய நோக்கமாகும்.இந்த கலந்துரையாடல் நிகழ்ச்சியில் கலந்து கொண்ட பள்ளி மாணவ, மாணவிகளிடம், அவர்களுடைய இலட்சியம், அவர்களுக்கு எந்த துறையில் ஆர்வம், அவர்கள் உயர்கல்வி பயில விரும்பும் கல்லூரி மற்றும் இடம் உள்ளிட்டவை குறித்து கேட்டறிந்தார்.பள்ளி, கல்லூரி படிப்பு என்பது ஒருவரின் வாழ்க்கையில் ஒருமுறை மட்டுமே கிடைக்கும். எனவே பள்ளி மற்றும் கல்லூரி படிப்பின் மூலம் வாழ்க்கைக்கான பல அனுபவங்களை கற்றுக் கொள்ளலாம். அனுபவங்களில் இருந்து கிடைக்கும் கல்விதான் சிறந்த கல்வியாகும்.பன்னிரண்டாம் வகுப்பு பள்ளி படிப்பை முடித்தவுடன் கல்லூரி படிப்பில் சேருவதற்காக அனைத்து கல்லூரிகளிலும் தவறாமல் விண்ணப்பம் செய்ய வேண்டும். கடந்தாண்டு எந்த கல்லூரியில் எவ்வளவு கட் ஆப் மதிப்பெண் அடிப்படையில் மாணவர் சேர்க்கை நடைபெற்றது போன்ற தகவல்களை தெரிந்துகொள்ள வேண்டும். ஒவ்வொருவரும் தங்களது தனித் திறமைகளை வளர்த்துக்கொள்ள வேண்டும்.பன்னிரெண்டாம் வகுப்பில் எடுக்க கூடிய மதிப்பெண்களை பயன்படுத்தி நமக்கான நல்ல வாயப்புகளை உருவாக்கி கொள்ள வேண்டும். உயர்கல்வி எங்கு பயின்றாலும், இந்தியாவில் சிறந்த கல்லூரியை தேர்ந்தெடுத்து படிக்க வேண்டும். வெற்றிக்கு தேவையான விஷயங்களை தொடர்ந்து ஆர்வத்துடன், கவனசிதறல் இல்லாமல், தொடர்ந்து விடா முயற்சியுடனும், கடினமாக உழைத்தால் எளிதாக வெற்றி பெறலாம்.மேலும், ஒவ்வொருவருக்கும் என்று தனித்திறமைகள் உள்ளன. அத்திறமைகளை அனைவரும் வளர்த்து கொண்டு வாழ்வில் முன்னேற வேண்டும் என மாவட்ட ஆட்சித்தலைவர் அவர்கள் தெரிவித்தார்.இந்த சந்திப்பில் மாணவ, மாணவியர்கள்; உற்சாகத்துடன் கலந்து கொண்டு, இந்த நிகழ்ச்சி மூலம் எங்களுக்கு ஒரு புத்துணர்வு, ஊக்கம் அளிப்பதாகவும், மாவட்ட ஆட்சியர் போன்று தாங்களும் சாதிக்க வேண்டும் என்ற எண்ணம் உருவாகி உள்ளதாகவும், எங்களுடைய கேள்விகள் மற்றும் சந்தேகங்களுக்கு மாவட்ட ஆட்சியர் தெளிவான விடை கொடுத்ததாகவும், நாங்களும் மாவட்ட ஆட்சியர் போன்று சாதித்து காட்டுவோம் என்றும், இந்த நிகழ்ச்சி ஏற்பாடு செய்த மாவட்ட ஆட்சித்தலைவர் அவர்களுக்கு மாணவர்கள் தங்களது நன்றிகளை தெரிவித்துக்கொண்டனர்.
விருதுநகர் மாவட்டம், அருப்புக்கோட்டை மண்டல ஆராய்சி நிலையத்தில், அருப்புகோட்டை வேளாண் தொழில் ஊக்குவிப்பு மையம், திருச்சி அன்பில் தர்மலிங்கம் வேளாண்மைக் கல்லூரி மற்றும் ஆராய்ச்சி நிலையம் மற்றும் தமிழ்நாடு உணவு பதப்படுத்துதல் மற்றும் வேளாண் ஏற்றுமதி மேம்பாட்டுக் கழகம், சென்னை இணைந்து நித்திய கல்யாணி சாகுபடி, பரவலாக்கம் மற்றும் ஏற்றுமதி குறித்த ஒருநாள் விழிப்புணர்வு கருத்தரங்கத்தினை மாவட்ட ஆட்சித்தலைவர் முனைவர் வீ.ப.ஜெயசீலன்.,I A S., அவர்கள் (23.10.2024) தொடங்கி வைத்து சிறப்புரையாற்றினார்.இன்று உலக அளவில் இருக்கக்கூடிய விவசாய பொருட்கள் சார்ந்த ஏற்றுமதி வாய்ப்பில் 10 முதல் 15 விழுக்காடு அளவிற்கு நித்திய கல்யாணி ஏற்றுமதிக்கு வாய்ப்புகள் இருக்கிறது. இதன் பூ, இலை, விதை, தண்டு பகுதிகள் உள்ளிட்டவைகள் மருத்துவ குணம் சார்ந்தவை. நித்திய கல்யாணி சித்தா, ஆயுர்வேதா என்ற மருத்துவ முறைகளில் உலகம் முழுவதும் வாய்ப்புகளும், தேவைகளும் எதிர்காலத்தில் அதிகமாக இருப்பதாக கூறப்படுகின்றது.அதிலும் குறிப்பாக அதனை ஒட்டிய மருந்து பொருட்கள் இந்தியாவில் கிழக்கு ஆசிய நாடுகளில் அதனுடைய ஆராய்ச்சிகள் அதனை பயன்படுத்தக்கூடிய மக்களும் அதிகமாக இருக்கின்றனர். அது தொடர்பாக அதிகமான விளைபொருள்களும் அங்கு உள்ளன. கீழ்நாடுகளில் சித்த மருத்துவ முறையில் கீழாநெல்லி, துளசி, சோற்றுக்கற்றாழை பெரிய அளவில் பயன்படுத்துகின்றன.நித்திய கல்யாணியில் உள்ள மருத்துவ குணங்கள் இரத்த புற்று நோய்களை கட்டுப்படுத்தவும், நீரிழிவு நோய்களை கட்டுப்படுத்தவும் மற்றும் சிறுநீரக கற்களை அகற்றவும் பயன்படுத்தப்படுகின்றன.இதன் பயிர் சாகுபடி பரப்பை அதிகரிக்கும் பொருட்டு, தோட்டக்கலைத் துறையின் கீழ், 2.5 ஏக்கருக்கு ரூ.13,000 மானியமாக வழங்கப்படுகிறது. இதற்கு சாகுபடி செலவும் மிக குறைவாகவே உள்ளது. விருதுநகர் மாவட்டத்தில் 375 ஏக்கர் அளவில் நித்திய கல்யாணி பயிரிட படுகிறது. நித்திய கல்யாணி பயிர்க்கு மிக குறைந்த அளவிலேயே நீர் பாசனம் தேவைப்படுவதால், மானாவாரியில் அதிக அளவில் பயிரிடப்படுகிறது. இதன் மருத்துவக் குணங்களுக்காக அதிக அளவில் ஏற்றுமதி செய்யப்படுகிறது.விவசாயிகள் நித்திய கல்யாணி சாகுபடி மூலம் அதிக இலாபம் எடுக்கலாம் என மாவட்ட ஆட்சித்தலைவர் அவர்கள் தெரிவித்தார்.இக்கருத்தரங்கில் நித்திய கல்யாணி சாகுபடி செய்வதன் மூலம் வருமானத்தை அதிகரிக்கும் யுத்திகள் குறித்தும், நித்திய கல்யாணியின் முக்கியத்துவம் மற்றும் சீரிய சாகுபடி முறைகள் குறித்தும், மாவட்டத்தில் அதற்கான சாகுபடி வாய்ப்புகள் குறித்தும், தமிழ்நாடு உணவு பதப்படுத்துதல் மற்றும் வேளாண் ஏற்றுமதி மேம்பாட்டு கழகத்தின் செயல்பாடுகள் குறித்தும், நித்திய கல்யாணியின் பொருளாதார மகத்துவம் குறித்தும் , இதனை கடல்வழி மற்றும் ஆகாய வழி ஏற்றுமதிக்கு தயார்படுத்துதல் குறித்தும் தொடர்புடைய அலுவலர்கள் விரிவாக எடுத்துரைத்தனர்.இக்கருத்தரங்கில், அருப்புக்கோட்டை மண்டல ஆராய்ச்சி நிலையம் பேராசிரியர் மற்றும் தலைவர் முனைவர் செல்;வி ரமேஷ், திருச்சி அன்பில் தர்மலிங்கம் வேளாண்மை கல்லூரி மற்றும் ஆராய்ச்சி நிலையம் முதன்மையர் முனைவர் சொ.வன்னியராஜன், திருச்சி அன்பில் தர்மலிங்கம் வேளாண்மை கல்லூரி இணைப் பேராசிரியர் முனைவர் சாந்தி, அருப்புக்கோட்டை மண்டல ஆராய்ச்சி நிலையம் இணைப் பேராசிரியர் (தோட்டக்கலை) முனைவர் பாலசுப்ரமணியன், தமிழ்நாடு உணவுப் பதப்படுத்துதல் மற்றும் வேளாண் ஏற்றுமதி மேம்பாட்டுக் கழகம் (மதுரை) தொழில்நுட்ப ஒருங்கிணைப்பாளர் முனைவர் ச.ஒளியரசன், திருச்சி புதிய வேளாண் தொழில் முனைவோர்க்கான மையம் திரு.வி.விக்னேஷ், தூத்துக்குடி V.O.C. துறைமுகம் துணை போக்குவரத்து மேலாளர் திரு.ரமேஷ், பயிர் தனிமைப்படுத்துதல் நிலையம் பயிர் பாதுகாப்பு அலுவலர் முனைவர் வி.பி.ஸ்ரீஹர்ஷா, கோயமுத்தூர் தமிழ்நாடு வேளாண்மைப் பல்கலைக் கழகம் துணை வேந்தர் முனைவர் கீதாலெட்சுமி, அருப்புக்கோட்டை மண்டல ஆராய்ச்சி நிலையம் இணைப்பேராசிரியர் முனைவர் அகிலா, விவசாயிகள், கொள்முதல் செய்வோர், ஏற்றுமதியாளர்கள் மற்றும் அரசு அலுவலர்கள் உட்பட பலர் கலந்து கொண்டனர்
விருதுநகர் மாவட்ட நிர்வாகம் மற்றும் சிவகாசி மெப்கோ ஷ்லெங்க் பொறியியல் கல்லூரி இணைந்து பள்ளி மற்றும் கல்லூரி மாணவர்களுக்கான செயற்கை நுண்ணறிவு மாநாடு தொழில்நுட்ப கருத்தரங்கம் நாளை 24.10.2024 மற்றும் 25.10.2024 ஆகிய இரண்டு நாட்கள் நடைபெற உள்ளது.அதன்படி, நாளை 24.10.2024 பள்ளி மாணவர்களுக்கும், 25.10.2024 அன்று கல்லூரி மாணவர்களுக்கும் இந்த கருத்தரங்கு நடைபெறவுள்ளது. இக்கருத்தரங்கானது காலை 9 மணி முதல் மாலை 5 மணி வரை நடைபெற உள்ளது.பள்ளி அளவில் அறிவியல் மற்றும் கலை பாடப்பிரிவுகளில் பயின்று வரும் மாணவர்களுக்கு செயற்கை நுண்ணறிவு குறித்த விழிப்புணர்வை ஏற்படுத்தவும், மின்னணுவியல் மற்றும் தகவல் தொழில்நுட்பம் மட்டுமல்லாது கட்டிடவியல், இயந்திரவியல், உயிரி தொழில்நுட்பம் போன்ற பிற பொறியியல் துறைகளிலும், கலை மற்றும் அறிவியல் துறைகளிலும் செயற்;கை நுண்ணறிவு பொருந்தக்கூடிய வாய்ப்புகளை அறிந்து கொள்ளும் வகையில் இந்த கருத்தரங்கம் ஏற்பாடு செய்யப்பட்டுள்ளது.இந்த செயற்கை நுண்ணறிவு மாநாடு தொழில்நுட்ப கருத்தரங்கில், செயற்கை நுண்ணறிவு தொழில்நுட்பத்தின் அடிப்படை கோட்பாடுகள், அதனை பயன்படுத்துவதற்கான நெறிமுறைகள், அதன் சமூக தாக்கம், பொறி கற்றல் புலத்தின் அடிப்படை கோட்பாடுகள், மற்றும் செயற்கை நுண்ணறிவு மூலம் படைப்பாற்றல் மேம்பாடு போன்ற கருத்துக்கள் குறித்து ஆராய்தல் உள்ளிட்டவைகள் குறித்து, செயற்கை நுண்ணறிவுத் துறையில் புகழ்பெற்ற வல்லுநர்களின் விரிவுரைகள் மற்றும் செயல்முறை பயிற்சிகள் வழங்கப்படவுள்ளதுஇக்கருத்தரங்கில் 1000-த்திற்கும் மேற்பட்ட பள்ளி, கல்லூரி மாணவர்கள் கலந்து கொண்டு பயன்பெற இருக்கின்றனர் என மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் தெரிவித்துள்ளார்.
2024-ஆம் ஆண்டில் விருதுநகர் மாவட்டத்தில் உள்ள அரசு / தனியார் தொழிற்பயிற்சி நிலையங்களில் காலியாக உள்ள தொழிற் பிரிவுகளில் நேரடி பயிற்சியாளர்கள் சேர்க்கை (Spot Admission) கால அவகாசம் நீட்டிக்கப்பட்டு 17.10.2024 முதல் 30.10.2024 வரைசேர்க்கை நடைபெறுகிறது.ஏற்கனவே விண்ணப்பித்து ஒதுக்கீடு கிடைக்கப்பெறாதாவர்கள் மற்றும் புதிதாக விண்ணப்பிக்க விரும்பும் மாணவ / மாணவிகள், அரசு நிர்ணயித்துள்ள 8-ம் வகுப்பு தேர்ச்சி மற்றும் 10-ம் வகுப்பு தேர்ச்சி பெற்றுள்ளவர்கள் தொழிற்பயிற்சி நிலையங்களில் காலியாக உள்ள தொழிற்பிரிவுகளில் சேர்ந்து கொள்ளலாம்.அரசு / தனியார் தொழிற்பயிற்சி நிலைய முதல்வர்களை அணுகி நேரடிசேர்க்கை மூலம் தொழிற்பயிற்சி நிலையங்களில் சேர்ந்து கொள்ளலாம்.அரசினர் தொழிற்பயிற்சி நிலையங்களில் பயிற்சியில் சேரும் பயிற்சியாளர்களுக்கு விலையில்லா மிதிவண்டி, 2 செட் சீருடை, பாடநூல், வரைபடக்கருவிகள், மூடு காலணி, இலவசபஸ் பாஸ் வழங்கப்படும். மேலும் மாதந்திர உதவித்தொகை ரூ.750/- மேலும் அரசு பள்ளியில் 6 முதல் 10-ம் வகுப்பு வரை பயின்ற மாணவிகளுக்கு புதுமைப்பெண் திட்டத்தின் கீழ் மாதந்தோறும் ரூ.1000/- உதவித்தொகைவழங்கப்படும்.தகுதியான மாணவர்களுக்கு தமிழ் புதல்வன் திட்டத்தின் கீழ் மாதந்தோறும் ரூ.1000/-உதவித்தொகை வழங்கப்படும். மேலும், பயிற்சியாளர் பயிற்சிமுடிவில், கேம்பஸ் இன்டர்வியூ மூலம் வேலைவாய்ப்பு பெற்றுத்தரப்படும் என மாவட்ட ஆட்சித்தலைவர் முனைவர் வீ.ப.ஜெயசீலன்,I A S., அவர்கள் தெரிவித்துள்ளார்.
விருதுநகர் மாவட்ட அரசு மருத்துவக் கல்லூரியில் (22.10.2024) மதுவிலக்கு மற்றும் ஆயத்தீர்வை துறையின் சார்பில், போதைப்பொருட்களுக்கு எதிரான மாணவத் தூதுவர்கள் பங்கேற்ற விழிப்புணர்வு நிகழ்ச்சியில், மாவட்ட ஆட்சித்தலைவர் முனைவர் வீ.ப.ஜெயசீலன்.,I A S, அவர்கள் தலைமையில், மேனாள் தலைமைச்செயலாளர் முனைவர் வெ.இறையன்பு.,I A S., அவர்கள் (பணி நிறைவு) சிறப்புரை ஆற்றினார்கள்.முன்னதாக, இந்நிகழ்ச்சியில், போதைப்பொருள் எதிரான உறுதிமொழியினை மாணவ, மாணவியர்கள் எடுத்துக்கொண்டனர்.அடிக்கடி கைப்பேசி, இணையதளம் பயன்படுத்துதல், பணம் வைத்து சூதாட்டம் விளையாடுதல், இணையதள சூதாட்டம், அடிக்கடி கடைகளுக்கு சென்றும், இணையதள மூலமும் பொருட்களை வாங்கி குவித்தல், தொடர்ச்சியாக ஏதாவது ஒன்றை சாப்பிட்டு கொண்டே இருப்பது போன்றவைகள் எல்லாம் நடத்தை தொடர்பான போதை பழக்க வழக்கங்கள்.இதுபோல கைப்பேசி, இணையதளம் இல்லாவிட்டால் பதற்றம் அடைவது, சமூக ஊடகங்களில் தேவையில்லாமல் அதிக நேரம் செலவழிப்பது, தொலைக்காட்சியில் நெடுந்தொடர் பார்ப்பது, உடலை பராமரிப்பது, அடிக்கடி சிகை அலங்காரத்தில் கவனம் செலுத்துவது, எப்போதும் பணி தொடர்பான சிந்தனைகள், தோற்றப் பொலிவு, எண்கணிதம்; போன்ற செயல்களிலும் சிலர் போதையாக உள்ளனர்.இப்படி பல விதமான போதைகள் இருந்தாலும், ஒரு தனி மனிதனை அதிகம் பாதிப்பதாக இருப்பது போதை பழக்க வழக்கம் தான். இந்த போதை பழக்க வழக்கங்களில் பழக்கம் மற்றும் அடிமையாவது என இரண்டு கட்டமாக இருக்கிறது. போதை பழக்கத்தில் உள்ளவர் அன்றாட பணிகளில் ஈடுபட முடியும். அவர்களை திருத்தி நல்வழிப்படுத்துவது எளிது. ஆனால், போதையில் அடிமையாவது என்பது அதில் மனம், உடல் பாதிக்கப்பட்டு போதை அவர்கள் கட்டுப்பாட்டில் இருக்காது. அவர்கள் நினைத்தாலும் அதை நிறுத்த முடியாது.அவர்கள் இயல்பாக இருப்பதற்கே போதை பொருட்களை உட்கொள்ள வேண்டியிருக்கும். இப்படிபட்டவர்களை நிபுணர்களின் உதவியுடன் தான் நாம் மாற்ற முடியும்.போதைப்பொருட்களுக்கு எதிரான மாணவத் தூதுவர்கள் போதை பயன்பாடு எப்படியெல்லாம் தொடங்கி முடிகிறது என்பதை தெரிந்து கொள்ள வேண்டும். போதைப்பொருளை ஒருமுறை பயன்படுத்தினால் என்ன என்று நினைத்து பயன்படுத்துவது, நண்பர்களின் கட்டாயத்தினால் பயன்படுத்துவது, பொழுதுபோக்கிற்காக பயன்படுத்துவது, துக்கமான சூழ்நிலையில் பயன்படுத்துவது உள்ளிட்டவைகள் தான் போதைப்பொருள் பயன்படுத்துவதற்கான முதல் படி.முதல் நிலை என்பது இதனை தொடர்ச்சியாக பயன்படுத்தி, ஒரு சமூக பழக்கவழக்கமாக மாறி விடுகிறது. இரண்டாம் நிலை என்பது அனைத்து விதமான போதைப்பொருட்களையும் பயன்படுத்துவது என்ற ஆபத்தான பயன்பாடு. மூன்றாம் நிலை சார்ந்திருத்தல் என்பதாகும். இந்த நிலையில் போதைப் பழக்கவழக்கத்திற்கு அந்த உடல் பழக்கம் ஆகிவிடும். எவ்வளவு பயன்படுத்தினாலும் அதை விட அதிகமாக பயன்படுத்த தூண்டும்.நான்காம் நிலை என்பது போதைப்பொருளுக்கு அடிமையாவது. இந்த நிலையின் போது போதைப்பொருள் ஒரு அத்தியாவசியமாகி, அது தான் முதல் தேவையாகி விடுகிறது. போதைக்காக எதையும் செய்ய தயங்கமாட்டார்கள். போதைப்பொருள் கிடைக்காமல் போனால் தற்கொலைக்கூட செய்து கொள்வார்கள்.எனவே, மாணவ தூதுவர்கள் ஆகிய நீங்கள் அனைவரும் முதலில் தூய்மையோடு இருக்க வேண்டும். எந்த காலகட்டத்திலும் சக மாணவர்களுக்கு முன்மாதிரியாக இருக்க வேண்டும். உங்கள் சக மாணவர்களுக்கு போதைப்பொருள் என்பது எத்தகைய தாக்கத்தை ஏற்படுத்தும் என்பதையும், ஒருமுறை பயன்படுத்தினால் கூட அடிமையாவதற்கு வாய்ப்பு இருக்கிறது என்பதையும், போதைப் பழக்கத்தினால்; உடல் உறுப்புகள் பாதிப்பு ஏற்படும் என்பதையும், போதைப்பொருள் பழக்கத்தினால் மனம் மற்றும் உடல் ரீதியாக பாதிப்பு உள்ளது என்பதையும், போதைப் பழக்க வழக்கத்தினால் பாதிக்கப்பட்ட நபர்களின் தற்போதைய நிலைமை குறித்தும், அதனால் உறவில் விரிசல், சட்ட சிக்கல் கூட ஏற்படுவதற்கு வாய்ப்பு உள்ளது என்பதையும் எடுத்துக்கூற வேண்டும்.உடற்பயிற்சி, புத்தகம் வாசித்தல் போன்ற நல்ல பழக்க வழக்கங்கள் மூலம் போதைப்பொருள் இல்லாமலேயே நிறைந்த மகிழ்ச்சியாக இருக்க முடியும் என்பதை கற்றுத்தர வேண்டும்.மேலும், போதைப்பொருட்களுக்கு ஆளானவர்களை பற்றியும், போதைப்பொருட்கள் விற்பவர்கள் பற்றியும் தகவல்களை பள்ளி தலைமையாசிரியர், முதல்வர் உள்ளிட்டோரிடம் தெரிவிக்க வேண்டும். இதுபோன்ற செயல்பாடுகளை மாணவ தூதுவர்கள் தொடர்ச்சியாக செயல்படுத்தி தமிழகத்திலேயே போதைப்பொருள் இல்லா மாவட்டமாக உருவாக்குவதற்கு உறுதுணையாக இருக்க வேண்டும் என தெரிவித்தார்.இந்நிகழ்ச்சியில், சுமார் 1200-க்கும் மேற்பட்ட பள்ளி மாணவர்கள், ஆசிரியர்கள் மற்றும் அரசு அலுவலர்கள் உட்பட பலர் கலந்து கொண்டனர்.
விருதுநகர் மாவட்டத்தில் தமிழ்நாடு சட்டமன்றப் பேரவை பொது நிறுவனங்கள் குழு பரிந்துரை செய்த வளர்ச்சி திட்டப் பணிகளின் தற்போதைய நிலவரம் குறித்து மாவட்ட ஆட்சித்தலைவர் முனைவர் வீ.ப.ஜெயசீலன்.,I A S., அவர்கள் முன்னிலையில், தமிழ்நாடு சட்டமன்றப் பேரவை பொது நிறுவனங்கள் குழுத்தலைவர்/ அணைக்கட்டு தொகுதியின் சட்டமன்ற உறுப்பினர் திரு.ஏ.பி.நந்தகுமார் அவர்கள் தலைமையில், குழு உறுப்பினர்கள் திரு.க.அசோகன், திரு.எம்.எஸ்.எம்.ஆனந்தன், திரு.உடுமலை கே.ராதாகிருஷ்ணன், திரு.கடம்பூர் ராஜு, திரு.மு.பெ.கிரி, திரு.ஆ.கோவிந்தசாமி, திரு.துரை.சந்திரசேகரன், திரு.ம.சிந்தனை செல்வன், திரு.வி.பி.நாகைமாலி, திரு.த.வேலு, முனைவர் எம்.எச்.ஜவாஹிருல்லா ஆகியோர் (22.10.2024) பல்வேறு பகுதிகளில் திட்டப்பணிகள் குறித்து கள ஆய்வுகளை மேற்கொண்டனர்.அதன்படி, விருதுநகரில் பிற்படுத்தப்பட்டோர் நல அலுவலகம் சார்பில் செயல்பட்டு வரும், அரசு கல்லூரி மாணவர் விடுதியினை பார்வையிட்டு, விடுதி அறைகள், குடிநீர், மழைநீர் சேகரிப்பு தொட்டி, சுகாதார வளாகம் உள்ளிட்ட அடிப்படை வசதிகள் மற்றும் மாணவர்களுக்கு வழங்கப்படும் உணவுகள் உள்ளிட்டவை குறித்து ஆய்வு செய்தனர்.விடுதி கட்டடமானது ஏறக்குறைய 50 வருடத்திற்கு முன்பு கட்டப்பட்டுள்ளதாலும், இதில் மாணவர்கள் தங்கி படிப்பதற்கான வசதிகள் இல்லாத காரணத்தினால், புதிய கட்டடம் சுமார் 1.50 கோடி மதிப்பில் கட்டி மாணவர்களின் பயன்பாட்டிற்கு கொண்டு வருவதற்கு இக்குழு அரசுக்கு பரிந்துரை செய்கிறது என கூறினார்கள்.அதனை தொடர்ந்து, அருப்புக்கோட்டையில் உள்ள தமிழ்நாடு நுகர்பொருள் வாணிபக் கழகத்தின் சேமிப்பு கிடங்கினை பார்வையிட்டு, அங்கு சேமித்து வைக்கப்பட்டுள்ள அரிசி, சர்க்கரை, கோதுமை போன்ற அத்தியாவசிய பொருட்களின் தரம் குறித்து ஆய்வு செய்து, அங்கிருந்து கூட்டுறவுச் சங்கங்கள் மற்றும் பல்வேறு பொது விநியோக அமைப்புகளுக்கு விநியோகிக்கப்படுவது குறித்து கேட்டறிந்தார்கள்.பின்னர், சாத்தூர் வட்டம், அப்பையநாயக்கன்பட்டி கிராமத்தில், அமைந்துள்ள தனியார் சூரிய மின் உற்பத்தி நிறுவனத்தினை பார்வையிட்டு, அது செயல்படும் விதம், உற்பத்தி திறன், உற்பத்தியில் அரசுக்கு வழங்கப்படும் மின் அளவு மற்றும் கட்டணத்தொகை உள்ளிட்டவை குறித்து கேட்டறிந்து ஆய்வு செய்தனர்.சாத்தூரில் உள்ள தமிழ்நாடு நுகர்பொருள் வாணிபக் கழகத்தின் அமுதம் நியாயவிலைக்கடையினை பார்வையிட்டு, அங்குள்ள பொருட்களின் இருப்பு, தரம், பயன்பெறும் குடும்ப அட்டைதாரர்களின் எண்ணிக்கை உள்ளிட்டவை குறித்து ஆய்வு செய்தனர்.அதனை தொடர்ந்து, மாவட்ட ஆட்சியர் அலுவலக வளாகத்தில் உள்ள தமிழ்நாடு வீட்டு வசதி வாரியத்தால் கட்டப்பட்ட அரசு அலுவலர்கள் அடுக்குமாடி குடியிருப்பு வீடுகளை பார்வையிட்டு, கட்டடத்தின் தரம், கட்டடத்தின் உறுதி தன்மை, குடிநீர் மற்றும் வடிகால் வசதி உள்ளிட்ட அடிப்படை வசதிகள் குறித்து பார்வையிட்டு ஆய்வு செய்தார்கள்.இந்நிகழ்வில், மாவட்ட வருவாய் அலுவலர் திரு.இரா.ராஜேந்திரன், தமிழ்நாடு சட்டமன்ற பேரவையின் இணைச் செயலாளர் திருமதி பி.தேன்மொழி, மாவட்ட ஆதிதிராவிடர் நல அலுவலர் திரு.ரமேஷ், மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் திருமதி.கார்த்திகாயினி, தமிழ்நாடு மின்சார வாரிய செயற்பொறியாளர்(பொது) திருமதி.மாலதி, தமிழ்நாடு நுகர்பொருள் வாணிபக் கழகத்தின் மண்டல மேலாளர் திரு.திருநாவுக்கரசு, சாத்தூர் வருவாய் கோட்டாட்சியர் திரு.சிவக்குமார், அருப்புக்கோட்டை வருவாய் கோட்டாட்சியர் திரு.வள்ளிக்கண்ணு, வட்டாட்சியர்கள் மற்றும் அரசு அலுவலர்கள் உட்பட பலர் கலந்து கொண்டனர்.
