• 11
• Nov 29, 2025

அசோக் லேலண்ட் அறக்கட்டளை (Ashok Leyland Foundation) “சார்பில், ரோடு டு ஸ்கூல் (Road to School – RTS)” என்ற திட்டத்தினை  அமைச்சர் அவர்கள் குத்து விளக்கேற்றி துவக்கி வைத்தார்.

விருதுநகர் மாவட்டம், மல்லாங்கிணறு, அரசு மேல்நிலைப் பள்ளியில், (28.11.2025) அசோக் லேலண்ட் அறக்கட்டளை (Ashok Leyland Foundation) “சார்பில் ஏற்படுத்தப்பட்டுள்ள, ரோடு டு ஸ்கூல் (Road to School – RTS)” என்ற திட்டத்தினை  நிதி, சுற்றுச்சூழல் மற்றும் காலநிலை மாற்றத் துறை அமைச்சர் திரு த.தங்கம் தென்னரசு அவர்கள் குத்து விளக்கேற்றி துவக்கி வைத்தார்.தமிழ்நாட்டினுடைய சாலை போக்குவரத்து வசதிகளுக்கு, அசோக் லேலண்ட் நிறுவனமானது வழங்கி வரும் மகத்தான சேவைகள் பற்றி அனைவரும் அறிந்த ஒன்றே. அதன் ஒரு பகுதியாக, பள்ளிக்கல்வித்துறையிலே எந்தெந்த இடங்களிலெல்லாம் இந்நிறுவனத்தின் பங்களிப்பு தேவையாக இருக்கிறதோ, அதை கண்டறிந்து தமிழகத்தில் மட்டுமல்லாமல் இந்தியாவில் 8-மாநிலங்களில் இந்த நிகழ்ச்சியானது ஏற்பாடு செய்யப்பட்டு ஏறத்தாழ 8-இலட்சம் மாணவர்கள் பயனடைய உள்ளனர்.

          தமிழ்நாட்டின் மலைப்பகுதிகளில் ரோடு டு ஸ்கூல் என்ற திட்டமானது மிகச் சிறப்பாக செயல்பட்டு வருகிறது. அதனைப் போல, நம்முடைய பகுதிகளில் 161 பள்ளிகளில், 5,500 மாணவர்கள் பயனடையத்தக்க வகையில் இன்று இத்திட்டமானது துவக்கி வைக்கப்பட்டுள்ளது. நம்முடைய தமிழ்நாடு முதலமைச்சர் அவர்கள் ஆட்சி பொறுப்பேற்றுக் கொண்டிருக்கின்ற இந்த நான்கரை ஆண்டு ஆட்சிக்காலத்தில் மிகப்பெரும் புரட்சி ஏற்பட்டுள்ள ஒரு துறை என்று சொன்னால் அது பள்ளிக் கல்வித்துறையே ஆகும். குறிப்பாக, நம்முடைய பகுதிகளில் பள்ளிகள் பெருமளவில் அமைக்கப்பட்டுள்ளன. ஒரு கி.மீ தொலைவில் ஒரு தொடக்கப்பள்ளியும், மூன்று கி.மீ தொலைவில் ஒரு நடுநிலைப்பள்ளியும், ஏழு கி.மீ தொலைவில் ஒரு உயர்நிலைப்பள்ளியும் அமைக்கப்பட வேண்டும் என்ற அன்றைய கால திட்டத்தின் அடிப்படையில் அமைக்கப்பட்டுள்ளன. 

          ஒரு காலத்திலே 1 முதல் 5 ஆம் வகுப்பு வரை பயிலும் மாணவர்களுக்காக தொடங்கப்பட்ட எண்ணும் எழுத்தும் திட்டத்தினை 1 முதல் 8 ஆம் வகுப்பு வரை பயிலும் மாணவர்களுக்கு விரிவுப்படுத்த இந்த ரோடு டு ஸ்கூல் திட்டம் முக்கிய பங்காற்றுகிறது. இது மட்டுமல்லாமல், உயர்கல்வி மாணவர்களுக்கு எதிர்காலத்தினை உருவாக்கவும் இத்திட்டம் செயல்படுத்தப்பட்டுள்ளது.ஆகவே, அசோக் லேலண்ட் நிறுவனமானது இப்பணியினை அசோக் லேலண்ட் அறக்கட்டளை மூலம் இப்பணியினை ஒரு சமுதாயப் பணியாக மேற்கொண்டு வருகிறது. நாம் அனைவரும் சமுதாயத்தால் பயன் பெற்றுள்ளோம் சமுதாயத்தால் பயன் பெற்ற நாம் அதன் ஒரு பகுதியை சமுதாயத்திற்கு அளிப்பது தான் சிறந்தது.ரோடு டு ஸ்கூல் (Road to School – RTS) திட்டம் தொடக்க மற்றும் நடுநிலைப் பள்ளி மாணவர்களுக்கு எழுத்தறிவு மற்றும் கணிதத் திறன்களில் வலுவான அடித்தளத்தை உருவாக்குவதுடன், உடல்நலம், கலை மற்றும் விளையாட்டு கல்வி போன்ற வாழ்க்கைத் திறன் அடிப்படையிலான இணை–பாடத்திட்டங்களையும் ஒருங்கிணைத்து முழுமையான கற்றல் அனுபவத்தை வழங்குகிறது.

          மேலும், பள்ளிகளின் சுற்றுப்பகுதிகளில் உள்ள சமூகங்களில் சமூக முன்னேற்றத்திற்கான திட்டங்கள் ஒருங்கிணைக்கப்படுகின்றன. இந்த முயற்சிகள் கல்விக்கு தடையாக இருக்கும் சமூக–பொருளாதார சவால்களை குறைப்பதற்கும், பெற்றோர்கள், பள்ளி மேலாண்மை குழுக்கள் மற்றும் உள்ளூர் நிர்வாகத்துடன் இணைந்து பள்ளி மேம்பாட்டு திட்டங்களை உருவாக்குவதற்கும் வழிவகுக்கின்றன.இத்துடன், வருகை விகிதத்தை உயர்த்துதல், சுகாதார மேம்பாடு, சமூகத்தில் உள்ள சிக்கல்களை அடையாளம் காணுதல் மற்றும் சமூக அங்கத்தினர்களுக்கு வாழ்வாதார வாய்ப்புகளை விரிவாக்குதல் போன்ற துறைகளிலும் கவனம் செலுத்தப்பட்டுள்ளது. இன்று ஆரம்பிக்கப்பட்டுள்ள இத்திட்டமானது, திருச்சுழி மற்றும் நரிக்குடி வட்டாரங்களில் மொத்தம் 161 பள்ளிகள் மற்றும் 5,500 மாணவர்கள் பயனடைய உள்ளனர். இத்திட்டம் ஏறத்தாழ நான்கு ஆண்டுகள் வரை தொடரப்படவுள்ளது.  நம்முடைய பகுதிகளில் ஆரம்பிக்கப்பட்ட இத்திட்டத்தினை தொடங்கி வைப்பதில் மகிழ்ச்சியடைகிறேன் எனத் தெரிவித்தார். இந்நிகழ்ச்சியில், முதன்மை கல்வி அலுவலர் திரு. கு.அரவிந்தன்,  முதன்மை செயல் அலுவலர்(அசோக் லேலண்ட் அறக்கட்டளை) திரு. டி. சசிக்குமார்,  திட்ட இயக்குநர்(லெர்னிங் லிங்க்ஸ் பவுண்டேசன்) திரு.கிரிஷ், வளநபர்(லெர்னிங் லிங்க்ஸ் பவுண்டேசன்) செல்வி ஜெயப்பிரியா, மல்லாங்கிணறு பேரூராட்சித்தலைவர் திரு.துளசிதாஸ், அரசு அலுவலர்கள்,  உள்ளாட்சி பிரதிநிதிகள் உட்பட பலர் கலந்து கொண்டனர்