விருதுநகர் மாவட்டம், சூலக்கரை மாவட்ட வேலைவாய்ப்பபு மற்றும் தொழில்நெறி வழிகாட்டும் மையத்தில் தமிழ்நாடு அரசு பணியாளர் தேர்வாணையத்தின் குரூப் -2 தேர்விற்கான ஒருங்கிணைந்த குறுகியகால அடிப்படை பயிற்சி வகுப்புகளை மாவட்ட ஆட்சித்தலைவர் முனைவர் வீ.ப.ஜெயசீலன், I A S, அவர்கள்(01.07.2024) தொடங்கி வைத்தார்.தமிழ்நாடு அரசுப் பணியாளர் தேர்வாணையத்தால் 2327 காலிப்பணியிடங்களுக்கு அறிவிக்கப்பட்டுள்ள ஒருங்கிணைந்த குடிமைப் பணிகள் தேர்வு தொகுதி-2 தேர்வு வரும் 14.07.2024 அன்று நடைபெற உள்ளது.இத்தேர்வுக்கு விண்ணப்பித்துள்ள விருதுநகர் மாவட்ட தேர்வர்கள் பயன்பெறும் பொருட்டு விருதுநகர் மாவட்ட நிர்வாகத்தால் ஒருங்கிணைந்த குறுகிய கால அடிப்படை பயிற்சி வகுப்புகள் 01.07.2024 முதல் 05.07.2024 வரை மாவட்ட வேலைவாய்ப்பு மற்றும் தொழில்நெறி வழிகாட்டும் மையம், சூலக்கரையில் நடைபெறுகிறது.இவ்வகுப்புகள் திறன் வாய்ந்த பயிற்றுநர்களை கொண்டு நடத்தப்படுகிறது. இக்குறுகிய கால அடிப்படை பயிற்சி வகுப்பில் கலந்து கொள்ளும் மாணவர்களுக்கு இத்தேர்வுக்கு தேவையான பாடக்குறிப்புகள் இலவசமாக வழங்கப்படுகிறது.அதன்படி, இந்த குரூப் -2 தேர்விற்கான ஒருங்கிணைந்த குறுகியகால அடிப்படை பயிற்சி வகுப்புகளை மாவட்ட ஆடசித்தலைவர் அவர்கள் தொடங்கி வைத்தார்.போட்டித் தேர்வு என்பது பயிற்சி பெற்றவர்களுக்கும், மற்றவர்களுக்குமான ஒரு போட்டியாகும். வெற்றி பெற்றவர்களுக்கும், வெற்றி பெறாதவர்களுக்கும் இடையில் உழைப்பு, படிப்பு ஆகியவற்றில் பெரியதாக வேறுபாடுகள் இருக்காது. ஆனால் அவர்கள் பெற்றிருக்கக் கூடிய மதிப்பெண்களில் சிறு இடைவெளி தான் இருக்கின்றன.ஆனால் அதில் வெற்றி பெற்றவர்களுக்கு உள்ள தனித்தன்மை என்ன என்று எடுத்து பார்த்தால், சில நுணுக்கங்களை அவர்கள் கற்றுக் கொண்டிருப்பார்கள். அந்த நுணுக்கங்களை கற்றுக் கொள்ளவில்லை என்றால் மறுபடியும் அந்த தேர்வு எழுதுவதற்கு ஓராண்டு ஆகிவிடும். இதனால் கால தாமதமாகும். கல்லூரி படித்தவர்களில் அவர்களுடைய மிக முக்கியமான வாழ்க்கை காலகட்டத்தில் ஓராண்டு என்பது மிகவும் முக்கியமானதாகும்.சில நேரங்களில் அடுத்து அதற்காக தயார் செய்வதற்கான வாய்ப்பு இல்லாமல் கூட போகலாம். அதனால் தான் எந்த ஒரு இது மாதிரியான சிறப்பு வேலைக்கு சென்றாலும் ஒரு உயர் கல்வி நிறுவனத்தில் சேர வேண்டும் என்றாலும், போட்டித் தேர்வுகள் தயார் செய்யக்கூடிய மாணவர்களுக்கு பயிற்சி மிக முக்கியமானது. விளையாட்டு, படிப்பு என எந்த ஒரு போட்டிக்கும் சிறப்பான நுணுக்கங்கள் இருக்கும். அந்த நுணுக்கங்களை தாங்களாகவே தவறுகள் மூலம் கற்றுக் கொண்டு, தேர்ச்சி பெறுவதற்கு காலம் ஆகும்.அதற்கான கால விரையத்தை குறைக்க வேண்டும். இந்த பயிற்சியின் மூலம் நுணுக்கங்களை கற்றுக்கொள்ள வேண்டும். இப்பயிற்சிகள் மூலம் கவனக் குறைவு, தவறுகளை தவிர்த்தல் போன்றவைகள் பற்றி பயிற்சி அளிக்கும் போது அவர்கள் நல்ல முறையாக தேர்வு எழுத முடியும் என்பதற்கான தான் இந்த பயிற்சி.பள்ளி மாணவர்களுக்கும், கல்லூரி மாணவர்களுக்கும், கல்லூரி முடித்து போட்டித் தேர்வுக்கு படிக்கும் மாணவர்களுக்கும் நான் முதல்வன் என்ற முக்கியமான திட்டத்தின் கீழ் பல்வேறு பயிற்சிகளை தமிழ்நாடு அரசு வழங்குகிறது. அதில் குறிப்பாக இத்திட்டத்தில் போட்டித் தேர்வுக்கு என்று தனி ஒரு அமைப்பு மூலமாக நான் முதல்வன் போட்டி தேர்வு பிரிவில் நிறைய பயிற்சிகள் வழங்குகின்றார்கள். இந்தியா முழுவதும் டிஎன்பிசி மூலம் வருடத்திற்கு சுமார் 15 ஆயிரம் பணியிடங்கள் நிரப்பப்பட்டு வருகின்றன.அதே போல இந்தியா முழுவதும் ஏறத்தாழ 2 இலட்சம் வேலை வாய்ப்புகள் ரயில்வே, எஸ்.எஸ்.சி, வங்கி உள்ளிட்ட பல்வேறு நிறுவனங்களின் மூலமாக நிரப்பப்பட்டு வருகின்றன.இதில் தமிழ்நாட்டை சார்ந்த மாணவர்கள் நிறைய பேர் ஆங்கிலம் கணிதம் கடினமாக இருக்கும் என்று நினைக்கிறார்கள். இந்த இடைவெளியை நாம் நீக்க வேண்டும் என்ற நோக்கில் இணையதள பயிற்சி வகுப்புகள் நடத்தப்படுகின்றன.குறிப்பாக தமிழ்நாடு அரசினுடைய வேலைவாய்ப்பு பயிற்சித்துறை, நான் முதல்வன் இணையதளம், அண்ணா பல்கலைக்கழகத்தின் நிர்வாகம் ஆகியவற்றின் இணையதளம் மற்றும் யூ-டியூப் மூலம் நடத்தப்படும் 20 மணி நேர ஆங்கிலம், திறனறிவு உள்ளிட்ட வகுப்புகளில் பயிற்சி செய்யும் போது நீங்கள் நிறைய கற்றுக் கொள்ளலாம்.
விருதுநகர் சூலக்கரை அங்கன்வாடி மையத்தில், மருத்துவம் மற்றும் மக்கள் நல்வாழ்வுத்துறை சார்பில் நடைபெற்ற, வயிற்றுப் போக்கு தடுப்பு முகாம் -2024 மற்றும் வைட்டமின் -A வழங்கும் முகாமில், 6 வயதிற்குட்பட்ட குழந்தைகளுக்கு ஓ.ஆர்.எஸ் கரைசல் பொடி மற்றும் வைட்டமின் - யு சிரப், துத்தநாக மாத்திரைகள் வழங்கும் பணியினை மாவட்ட ஆட்சித்தலைவர் முனைவர் வீ.ப.ஜெயசீலன், I A S, அவர்கள்(01.07.2024) தொடங்கி வைத்தார்.மேலும், ஓ.ஆர்.எஸ் கரைசல் தயாரிக்கும் முறை மற்றும் துத்தநாக மாத்திரை உட்கொள்ளும் முறை குறித்த விழிப்புணர்வு துண்டு பிரசுரங்களை தாய்மார்களுக்கு மாவட்ட ஆட்சித்தலைவர் அவர்கள் வழங்கினார்.மாவட்டத்தில் வயிற்று போக்கினால் ஏற்படும் குழந்தைகளின் இறப்பை தடுக்க, வயிற்று போக்கை கட்டுப்படுத்தும் விதமாக விழிப்புணர்வு முகாம் அனைத்து அங்கன்வாடி, துணை சுகாதார, ஆரம்ப சுகாதார நிலையம், அரசு மருத்துவமனைகளில் ஜூலை 1 முதல் ஆக., 31 வரை நடைபெற உள்ளது.இம்முகாமில், 6-க்கு வயதிற்குட்பட்ட குழந்தைகளுக்கு ஓ.ஆர்.எஸ்., பாக்கெட் வழங்கப்படும். மேலும் தாய்ப்பாலின் மேன்மை, ஓ.ஆர்.எஸ்., கரைசல் தயாரிக்கும் முறை, துத்தநாக மாத்திரை வழங்கும் முறை குறித்து விழிப்புணர்வு வழங்கப்படும்.இம்முகாம்கள் மூலம் விருதுநகர் மாவட்டத்தில் செயல்படும் 1504 அங்கன்வாடி மையங்கள் வாயிலாக 6 வயதிற்குட்பட்ட 1,28,267 குழந்தைகள் பயனடைய உள்ளார்கள்.இந்நிகழ்ச்சியில் மாவட்ட சுகாதார அலுவலர்(விருதுநகர்) மரு.யசோதாமணி, மாவட்ட திட்ட அலுவலர் (ஒருங்கிணைந்த குழந்தைகள் வளர்ச்சித் திட்டம்) திருமதி தனலெட்சுமி உட்பட அரசுஅலுவலர்கள், தாய்மார்கள், குழந்தைகள், அங்கன்வாடி பணியாளர்கள் பலர் கலந்து கொண்டனர்.
விருதுநகர் மாவட்ட ஆட்சியர் அலுவலக வளர்ச்சிமன்றக் கூட்டரங்கில் மக்கள் குறைதீர்க்கும் நாள்; கூட்டம் மாவட்ட ஆட்சித்தலைவர் முனைவர் வீ.ப.ஜெயசீலன், I A S,அவர்கள் தலைமையில் (01.07.2024) நடைபெற்றது.இக்கூட்டத்தில், இலவச வீட்டுமனைப்பட்டா மற்றும் பட்டா மாறுதல், குடும்பஅட்டை, வேலைவாய்ப்பு, முதியோர், விபத்து நிவாரணம், மாற்றுத்திறனாளிகள், நலிந்தோர் நலத்திட்டம் மற்றும் விதவை உதவித்தொகை, திருமணஉதவித்தொகை உள்ளிட்ட பல்வேறு கோரிக்கைகள் தொடர்பாக மனுக்கள் பெறப்பட்டது. மேலும், மாற்றுத்திறனாளிகள் மற்றும் மூத்த குடிமக்களுக்காக அமைக்கப்பட்டுள்ள சிறப்பு அமருமிடத்திற்குச் சென்று, மாவட்டஆட்சித்தலைவர் அவர்கள் கோரிக்கை மனுக்களைபெற்றுக் கொண்டார்.இம்மனுக்களை மாவட்ட ஆட்சித்தலைவர் அவர்கள் சம்மந்தப்பட்டதுறை அலுவலர்களிடம் ஒப்படைத்து உரிய நடவடிக்கை எடுக்குமாறு உத்தரவிட்டார்கள். மேலும் முதலமைச்சர் தனிப்பிரிவு மனுக்கள் மீது தனிக்கவனம் செலுத்தி நடவடிக்கை எடுக்குமாறு மாவட்ட ஆட்சித்தலைவர் அவர்கள் அறிவுறுத்தினார்கள். அதனை தொடர்ந்து, கைத்தறி மற்றும் துணிநூல் துறையின் சார்பாக மானியக் கோரிக்கையில் 26 நெசவாளர் கூட்டுறவு சங்கங்களைச் சார்ந்த 103 நகர்புற பயனாளிகளுக்கு தலா ரூ.4 இலட்சம் வீதம் மொத்தம் ரூ.4.12 கோடி மதிப்பிலான மானியத்தில் புதிதாக வீடு கட்டுவதற்கு பணி ஆணை ஒப்பளிப்பு செய்யப்பட்டுள்ளதை தொடர்ந்து, இன்று 5 பயனாளிகளுக்கு மொத்தம் ரூ.20 இலட்சம் மானியத்தில் வீடுகள் கட்டுவதற்கான பணி ஆணைகளை மாவட்ட ஆட்சித்தலைவர் அவர்கள் வழங்கினார். மேலும் இளைஞர்களுக்கான நெசவுப்பயிற்சி திட்டத்தின் கீழ் பயிற்சி பெற்ற 20 பயிற்சியாளர்களுக்கு சான்றிதழ்களை மாவட்ட ஆட்சித்தலைவர் அவர்கள் வழங்கினார்.மேலும், தமிழ்நாடு கதர் கிராமத் தொழில் வாரியம் சார்பாக மண்பாண்டங்கள் செய்யும் குடும்பங்களில் உள்ள தொழிலாளர்களுக்கு தலா ரூ.21,470 வீதம் 15 பயனாளிகளுக்கு ரூ.3.22 இலட்சம் மதிப்பில் இலவச மின் விசை மண்பாண்ட சக்கரங்களை மாவட்ட ஆட்சித்தலைவர் அவர்கள் வழங்கினார்.இக்கூட்டத்தில், மாவட்டவருவாய் அலுவலர் திரு.இரா.ராஜேந்திரன், மாவட்ட வழங்கல் அலுவலர் திருமதி அனிதா, உதவி இயக்குநர்(கைத்தறி மற்றும் துணிநூல் துறை) திரு.வெங்கடேசலு, உட்பட பல்வேறுதுறை சார்ந்த அரசு அலுவலர்கள் பலர் கலந்துகொண்டனர்.
விருதுநகர் மாவட்டத்தில், ஆதிதிராவிடர் மற்றும் பழங்குடியினர் நலத்துறையின் கீழ் இயங்கி வரும் சுந்தரராஜபுரம் ஆதிதிராவிட நல மேல்நிலைப்பள்ளியில் காலியாகவுள்ள ஒரு வேதியியல் பாட முதுகலை பட்டாதாரி ஆசிரியர் பணி காலியிடத்திற்கு மாதம் ரூபாய் 18,000/- என்ற மாத தொகுப்பூதியத்தில் முற்றிலும் தற்காலிகமாக ஆசிரியரை நியமித்திட தகுதியான நபர்களிடமிருந்து விண்ணப்பங்கள் வரவேற்கப்படுகின்றன. ஆசிரியர் தேர்வு வாரியம் அல்லது பதவி உயர்வு மூலம் நிரப்பிடும் வரை அல்லது 2024-2025 இக்கல்வியாண்டில் எது முன்னரோ அது வரையில் பணியமர்த்தப்படுவர்.பள்ளி மேலாண்மை குழு மூலம் நியமனம் செய்யப்படும் முதுகலை பட்டதாரி ஆசிரியர் காலிப்பணியிடத்திற்கு முதுகலைபட்டதாரி ஆசிரியருக்கான தற்போது நடைமுறையில் உள்ள அரசு விதிமுறைகளில் உள்ளவாறு கல்வித்தகுதி பெற்றிருக்க வேண்டும். ஒன்றுக்கு மேற்ப்பட்டவர்கள் விண்ணப்பிக்கும் போது வரையறுக்கப்பட்ட கல்வித்தகுதியுடன் ஆசிரிய தேர்வு வாரியத்தால் நடத்தப்பட்ட போட்டித்தேர்வில் தேர்ச்சி பெற்று சான்றிதழ் சரிபார்ப்பில் கலந்து கொண்டவருக்கும், அவ்வாறு இல்லையெனில் இல்லம் தேடி கல்வித்திட்டத்தில் தன்னார்வலருக்கும் பள்ளி அமைந்துள்ள பகுதி மற்றும் அதன் அருகில் உள்ளவர்களுக்கும் முன்னுரிமை வழங்கப்படும்.மேலும், ஆதிதிராவிடர் மற்றும் பழங்குடியினர் இனத்தவருக்கும் முன்னுரிமை அளிக்கப்படும். இப்பணிகளுக்கான தகுதிவாய்ந்த நபர்கள் சம்பந்தப்பட்ட பள்ளி மேலாண்மை குழு மூலம் தேர்வு செய்யப்படுவதுடன் இப்பணி நியமனம் முற்றிலும் தற்காலிகமானதாகும். தற்காலிக பணிக்கு தகுதியுள்ள விண்ணப்பதாரர்கள் 28.06.2024 முதல் 05.07.2024-க்குள் விருதுநகர் மாவட்ட ஆதிதிராவிடர் மற்றும் பழங்குடியினர் நல அலுவலகத்தில் உரிய சான்றுகளுடன் நேரடியாகவோ, பதிவஞ்சல் மூலமாகவோ விண்ணப்பிக்கலாம் என மாவட்ட ஆட்சித்தலைவர் முனைவர் வீ.ப.ஜெயசீலன்., I A S., அவர்கள் தெரிவித்துள்ளார்.
விருதுநகர் மாவட்டம், சாத்தூர் வட்டாட்சியர் அலுவலகத்தில், சாத்தூர் வட்டம், பந்துவார்பட்டி கிராமம் குருஸ்டார் பயர் ஒர்க்ஸ் என்ற பட்டாசு தொழிற்சாலையில் ஏற்பட்ட வெடி விபத்தில் உயிரிழந்தவர்களின் குடும்பங்களுக்கு முதலமைச்சரின் பொது நிவாரண நிதியிலிருந்து தலா ரூ.3 இலட்சம் வீதம் 4 நபர்களுக்கு மொத்தம் ரூ.12 இலட்சத்திற்கான காசோலையினை மாவட்ட ஆட்சித்தலைவர் முனைவர் வீ.ப.ஜெயசீலன், I A S., அவர்கள் (29.06.2024) வழங்கினார்.தமிழ்நாடு முதலமைச்சர் அவர்கள், சாத்தூர் வட்டம், பந்துவார்பட்டி கிராமத்தில் இயங்கி வரும் தனியருக்கு சொந்தமான பட்டாசு தயாரிக்கும் ஆலையில் 29.06.2024 அன்று எதிர்பாராத விதமாக ஏற்பட்ட வெடி விபத்தில் உயிரிழந்தவர்களின் குடும்பங்களுக்கு தலா ரூ.3 இலட்சம் நிவாரண நிதி வழங்க உத்தரவிட்டிருந்தார்.அதன்படி, வெடிவிபத்தில் உயிரிழந்த வெம்பக்கோட்டை வட்டம், அச்சங்குளத்தை சேர்ந்த திரு.ராஜ்குமார் என்பவரின் வாரிசுதாரரான (மனைவி) திருமதி ராஜலட்சுமி என்பவருக்கும், சாத்தூர் வட்டம் நடுச்சூரங்குடியை சேர்ந்த திரு.மாரிச்சாமி என்பவரின் வாரிசுதாரரான (மனைவி) திருமதி குருவம்மாள் என்பவருக்கும், வெம்பக்கோட்டை வட்டம் V..சத்திரப்பட்டியை சேர்ந்த திரு.செல்வகுமார் என்பவரின் வாரிசுதாரரான (மனைவி) திருமதி ஈஸ்வரி என்பவருக்கும், வெம்பக்கோட்டை வட்டம் V..சத்திரப்பட்டியை சேர்ந்த திரு.மோகன் என்பவரின் வாரிசுதாரரான (மனைவி) திருமதி விஜய மாரிஸ்வரி என்பவருக்கும் என உயிரிழந்த 4 நபர்களின் வாரிசுதார்களுக்கு முதலமைச்சரின் பொது நிவாரண நிதியிலிருந்து தலா ரூ.3 இலட்சம் வீதம் மொத்தம் ரூ.12 இலட்சம் நிவாரணத் தொகைக்கான காசோலைகளை மாவட்ட ஆட்சித்தலைவர் அவர்கள் வழங்கினார்.இந்நிகழ்வில், சாத்தூர் வருவாய் கோட்டாட்சியர் திரு.சிவக்குமார், வட்டாட்சியர் திரு.லோகநாதன் மற்றும் அரசு அலுவலர்கள் உட்பட பலர் கலந்து கொண்டனர்.
விருதுநகர் மாவட்டம், அரசு மருத்துவக்கல்லூரி கலையரங்கத்தில், விருதுநகர் கல்வி மாவட்டத்தைச் சேர்ந்த அரசு மற்றும் அரசு உதவி பெறும் பள்ளிகளில் நடப்பாண்டில் 11 மற்றும் 12 ஆம் வகுப்பு மாணவ, மாணவிகளுக்கு, நான் முதல்வன் திட்டத்தின் கீழ் உயர்கல்வி வழிகாட்டுதல் நிகழ்ச்சி இன்று(29.06.2024) மாவட்ட ஆட்சித்தலைவர் முனைவர் வீ.ப.ஜெயசீலன், I A S., அவர்கள் தலைமையில் நடைபெற்றது.2024-25 கல்வியாண்டில் அரசு மற்றும் அரசு உதவிபெறும் பள்ளிகளில் 11 மற்றும் 12 ஆம் வகுப்பு பயிலும் மாணவர்களுக்கு, கல்லூரிகள் தேர்வு, உயர்கல்வி வாய்ப்புகள் நுழைவு தேர்வுகளுக்கு தங்களை எவ்வாறு தயார் செய்வது கொள்வது என்பது குறித்த வழிகாட்டுதல் வழங்கும் வகையில் இந்த நிகழ்ச்சியில் மாவட்ட ஆசிரியர் பயிற்சிப் பள்ளி விரிவுரையாளர்கள் (ம) ஆசிரியர்கள் மூலம் உரிய வழிகாட்டுதல்கள் வழங்கப்பட்டு வருகிறது. ஒவ்வொரு நாளும் தலா 2500 மாணவர்கள் வீதம் 7 நாட்கள் சுமார் 17,398 மாணவ, மாணவிகள் கலந்து கொள்ளும் நிகழ்ச்சி 26.06.2024 அன்று தொடங்கப்பட்டு நடத்தப்பட்டு வருகிறது.நான்காம் நாளான இன்று விருதுநகர் அரசு மருத்துவக்கல்லூரி கலையரங்கத்தில் விருதுநகர் கல்வி மாவட்டத்தில் விருதுநகர் பகுதிகளைச் சேர்ந்த அரசு மற்றும் அரசு உதவி பெறும் பள்ளிகளில் நடப்பாண்டில் 11 மற்றும் 12 ஆம் வகுப்பு மாணவ, மாணவிகளுக்கு உயர்கல்வி வழிகாட்டுதல் நிகழ்ச்சி நடைபெற்றது.இந்த நிகழ்ச்சி மூலம் அரசு மற்றும் அரசு உதவி பெறும் பள்ளிகளில் பயிலும் மாணவர்களுக்கு 12 ஆம் வகுப்பு முடித்த பிறகு கல்லூரிகள் தேர்வு, உயர்கல்வியில் உள்ள வாய்ப்புகள், நீட், கிளாட், ஜே.இ.இ, மத்திய பல்கலைக்கழக சேர்க்கைக்கான நுழைவுத்தேர்வுகள் உள்ளிட்ட பல்வேறு நுழைவுத் தேர்வுகளைஎவ்வாறு எதிர்கொள்வது, அதற்கு எவ்வாறு தயார்படுத்திக் கொள்வது, அதற்கான கட் ஆப் மதிப்பெண்கள், உள்ளிட்ட வழிகாட்டுதல்களை வழங்குவதே இந்நிகழ்ச்சியின் முக்கிய நோக்கமாகும்.மாவட்டத்தில் அரசு பள்ளிகள் மற்றும் அரசு உதவி பெறும் பள்ளிகளில் படித்த நிறைய மாணவர்கள் கடந்த ஆண்டு தேர்வில் நல்ல மதிப்பெண்களை பெற்றார்கள். நல்ல மதிப்பெண்களை பெற்றவர்கள் அந்த மதிப்பெண்கள் தரக்கூடிய பயன்களை பெற்றார்களாக என்று பார்த்தால் 80 விழுக்காடு அவர்களுக்கு நல்ல மதிப்பெண்கள் வாங்கியும் அதற்குண்டான பலன்களை பெறவில்லை.மதிப்பெண்கள் எடுப்பது எவ்வளவு முக்கியமோ, அதை விட எடுத்த மதிப்பெண்கள் மூலம் கிடைக்கும் வாய்ப்பு குறித்து விழிப்புணர்வு மாணவர்களுக்கு இருக்க வேண்டும்.ஆனால், நீங்கள் எடுக்கக்கூடிய சிறிய முயற்சியில் மிகப் பெரிய வாய்ப்புகள் இருக்கின்றது. நீங்கள் எந்த துறையில் சேர்ந்து படித்தாலும் அதில் என்னென்ன வாய்ப்புகள் இருக்கிறது என்பதை தெரிந்து கொள்ள வேண்டும்.நம்முடைய குறுகிய காலக்கட்டத்தில் அதிக நேரம் படிப்பதற்காக செலவு செய்ய வேண்டும். அதிக மதிப்பெண்கள் எடுப்பதற்கான முயற்சியை எடுக்க வேண்டும்.மேலும், இந்த நிகழ்ச்சியின் மூலமாக நீங்கள் பன்னிரெண்டாம் வகுப்பில் சிறந்த மதிப்பெண்களை பெற வேண்டும். அதை விட முக்கியம் இந்திய அளவில் உயர்கல்வி வாய்ப்புகள் குறித்து தெரிந்து கொள்ள வேண்டும். நல்ல மதிப்பெண்களை பெற்றும் கூட நல்ல கல்லூரியில் சேரக்கூடிய வாய்ப்புகளை நிறைய மாணவர்கள் இழந்து விடுகிறார்கள்.ஒரு இளைஞன் அடையும் எந்த வருத்தமும் அவன் தலைமுறையை தாண்ட விடாமல் பார்த்து கொள்ளும் இளைஞனே சிறந்த இளைஞன். நீங்கள் அடையக்கூடிய கவலைகள், எதிர்காலம் குறித்ததோ அல்லது பெற்றோர்களை பற்றியோ, இலக்குகளை அடைய முடியாத கவலைகளோ, பொருளாதார கவலைகளோ எதுவாக இருந்தாலும் அதை உங்களுடைய கல்வியின் மூலமாக எளிதாக அடைவதற்கு நிறைய வாய்ப்புகள் உள்ளன.உயர் கல்விக்கு நிறைய செலவு செய்ய வேண்டும் என்ற கற்பனை இருக்கிறது. ஆனால் இது குறித்த வாய்ப்புகள் நிறைய பேருக்கு தெரிவதில்லை. வழிகாட்டுதல் இருக்கக்கூடிய, பொருளாதாரத்தில் முன்னேறி இருக்கக்கூடிய அல்லது ஓரளவுக்கு விபரங்கள் தெரிந்து தேடக்கூடிய மாணவர்கள் மட்டுமே இந்த வாய்ப்புகளை தெரிந்து கொண்டு, அதன் பலனை அனுபவித்து கொண்டிருக்கிறார்கள். இது குறித்து அரசு மற்றும் அரசு உதவிபெறும் பள்ளிகளில் பயிலும் மாணவர்களுக்கும் விழிப்புணர்வு வேண்டும்.எந்த துறைக்கு எப்படி விண்ணப்பிப்பது, அதற்கான மதிப்பெண்கள் என்ன அதற்கு எந்த மாதிரியான கேள்விகள் கேட்பார்கள் என்று ஆராய்ந்து படித்தாலே போதும்.மாணவ, மாணவிகள் உயர்கல்வியில் சேருவதற்கான வாய்ப்புகள் நிறைய இருக்கின்றன. உயர்கல்வி பயில்வதற்கு அரசு நலத்திட்டங்களும், உதவிகளும், கல்வி உதவித்தொகை, இட ஒதுக்கீடு, பெண்களுக்கு புதுமைபெண் திட்டம், மாணவர்களுக்கு தமிழ்ப்புதல்வன் திட்டம் மூலம் பல்வேறு உதவிகளை அரசு செய்து வருகிறது.அரசு உயர்கல்விக்கு பல நூறு கோடிகளை ஒதுக்குகிறது. இந்த அரசு திட்டங்களை நாம் பயன்படுத்திக் கொள்ள வேண்டும்.
பிரதம மந்திரி பயிர் காப்பீட்டுத் திட்டம் (PMFBY) 2016-ம் ஆண்டு முதல் தமிழகத்தில் செயல்படுத்தப்பட்டு வருகிறது. விருதுநகர் மாவட்டத்தில் இந்த ஆண்டு (2024-2025) முதல் ஸ்டேட் பாங்க் ஆப் இந்தியா ஜெனரல் இன்ஸ்யூரன்ஸ் கம்பெனி லிட். மூலம் பயிர் காப்பீடு திட்டம் செயல்படுத்தப்பட உள்ளது.காரீப் பருவத்தில் பயிர் செய்யவுள்ள பயிர்களுக்கு விவசாயிகள் அனைவரும் வங்கிகள்/ தொடக்க வேளாண்மை கூட்டுறவு சங்கங்கள் மூலமாகவோ, பொது சேவை மையங்கள் (Common Service Centres (CSC) மூலமாகவோ பயிர்களை காப்பீடு செய்து கொள்ள கேட்டுக் கொள்ளப்படுகிறது.வேளாண் பயிர்களுக்கு பயிர் காப்பீடு கட்டணம் ஏக்கருக்கு மக்காச்சோளம் பயிருக்கு ரூ. 421/- எனவும், சோளம் பயிருக்கு ஏக்கருக்கு ரூ. 180/- எனவும், பாசிப்பயறு, உளுந்து பயிர்களுக்கு ரூ.304/- எனவும், பருத்தி பயிருக்கு ரூ.360/- எனவும் மற்றும் நிலக்கடலை பயிருக்கு ரூ.415/- எனவும் நிர்ணயிக்கப்பட்டுள்ளது. எனவே, விவசாயிகள் கடைசி நேர தாமதத்தை தவிர்த்து உடனடியாக பயிர் காப்பீடு செய்து பயன் பெற்றுக் கொள்ளுமாறு கேட்டுக் கொள்ளப்படுகிறார்கள்.தோட்டக்கலை பயிர்களுக்கு பயிர் காப்பீடு கட்டணம் ஏக்கருக்கு வெங்காயம் பயிருக்கு ரூ.1744/- எனவும் மற்றும் வாழை பயிருக்கு ரூ.3404/- எனவும் தெரிவிக்கப்படுகிறது.விருதுநகர் மாவட்டத்தில் 2024-25 ம் ஆண்டின் நடப்பு காரீப் பருவத்தில் பயிர் காப்பீடு பதிவு செய்ய கடைசி நாள் நிலக்கடலை பயிருக்கு 30.08.2024 எனவும், உளுந்து, பாசிப்பயறு, சோளம் மற்றும் பருத்தி வகைகளுக்கு 16.09.2024 எனவும் மற்றும் மக்காச்சோளம் பயிருக்கு 30.09.2024 வரையிலும் நிர்ணயம் செய்யப்பட்டுள்ளது.தோட்டக்கலை பயிர்களுக்கு பயிர் காப்பீடு பதிவு செய்ய கடைசி நாள்; வெங்காயம் பயிருக்கு 31.08.2024 எனவும், மற்றும் வாழை பயிர்களுக்கு 16.09.2024 எனவும் தெரிவிக்கப்படுகிறது.விவசாயிகள் இத்திட்டத்தின் கீழ் பதிவு செய்யும் போது முன்மொழிவு விண்ணப்பத்துடன், பதிவு விண்ணப்பம், கிராம நிர்வாக அலுவலர் வழங்கும் அடங்கல்/ விதைப்பு அறிக்கை, வங்கிக் கணக்கு புத்தகத்தின் (Bank Pass book) முதல் பக்க நகல், ஆதார் அட்டை (Aadhar Card) நகல் ஆகியவற்றை இணைத்து, கட்டணத் தொகையை செலுத்திய பின் அதற்கான இரசீதையும் பொதுச் சேவை மையங்கள்/ தொடக்க வேளாண்மை கூட்டுறவு சங்கங்கள், வங்கிகளில் பெற்றுக் கொள்ளலாம்.எனவே, விவசாயிகள் எதிர்பாராமல் ஏற்படும் இயற்கை பேரிடர்களையும், பூச்சி நோய் தாக்குதலால் ஏற்படும் இழப்பு உள்ளிட்ட பல்வேறு காரணிகளையும் கருத்தில் கொண்டு தங்களது பயிர்களுக்கான காப்பீடை (Crop Insurance) அருகிலுள்ள பொதுச்சேவை மையங்களிலோ (CSC) தொடக்க வேளாண்மை கூட்டுறவு சங்கங்களிலோ (PACCS) அல்லது தேசிய மயமாக்கப்பட்ட வங்கிகளிலோ உரிய காப்பீடு கட்டணம் (Premium) செலுத்தி தங்களது பயிர்களை காப்பீடு செய்து பயன் அடையுமாறு மாவட்ட ஆட்சித்தலைவர் முனைவர் வீ.ப.ஜெயசீலன், I A S., அவர்கள் தெரிவித்துள்ளார்.
விருதுநகர் மாவட்டத்தில் உள்ள பட்டாசு உற்பத்தி தொழிற்சாலைகளில் ஏற்படும் விபத்துக்களை தவிர்த்திடும் வகையில் பல்வேறு முன்னெச்சரிக்கை நடவடிக்கைகள் மாவட்ட நிர்வாகத்தினால் மேற்கொள்ளப்பட்டு வருகின்றன. இதில், வெடிபொருள் சட்டம் மற்றும் விதிமுறைகளை பின்பற்றாமல் விதிமுறைகளை மீறி செயல்படும் பட்டாசு தொழிற்சாலைகளை கண்டறிந்து அவற்றின் மீது உரிய நடவடிக்கைகளை மேற்கொள்ளும் பொருட்டு நான்கு சிறப்பு ஆய்வுக் குழுக்கள் விருதுநகர் மாவட்ட ஆட்சியர் அவர்களால் அமைக்கப்பட்டுள்ளது. கடந்த மூன்று மாதத்தில் மட்டும், மேற்படி சிறப்பு ஆய்வுக்குழுக்கள் மற்றும் வருவாய் துறையினரால் மட்டும் 439 பட்டாசு தொழிற்சாலைகள் ஆய்வு செய்யப்பட்டு, அவற்றில் 86 பட்டாசு தொழிற்சாலைகளின் உரிமங்கள் இடைநிறுத்தம் செய்யப்பட்டுள்ளன. மேலும் தொழிலக பாதுகாப்பு மற்றும் சுகாதார இயக்கத்தினரால் 258 பட்டாசு தொழிற்சாலைகள் ஆய்வு செய்யப்பட்டு, அவற்றில் 56 பட்டாசு தொழிற்சாலைகளின் உரிமங்கள் மீது உரிய நடவடிக்கைகள் மேற்கொள்ளப்பட்டு வருகின்றன. மத்திய வெடிபொருள் கட்டுபாட்டுத்துறையினரால் 12 பட்டாசு தொழிற்சாலைகளின் உரிமங்கள் இடைநிறுத்தம் செய்யப்பட்டுள்ளன.விருதுநகர் மாவட்டத்தில் உள்ள அனைத்து பட்டாசு தொழிற்சாலைகளும் தங்களது பட்டாசு தொழிற்சாலையின் முன்பாக பெயர் பலகை வைத்திட வேண்டும் எனவும், மேற்படி பெயர் பலகையில் பட்டாசு தொழிற்சாலையின் பெயர், உரிமதாரர் பெயர், உரிம எண், உரிம வகை, உரிமம் வழங்கிய அலுவலர் மற்றும் செல்லுபடியாகும் காலம், தொழிற்சாலையில் உரிமத்தின்படி அனுமதிக்கப்பட்ட பணியாளர்களின் எண்ணிக்கை ஆகிய விபரங்கள் இடம் பெற்றிருக்க வேண்டும் என கடந்த மே மாதம் நடைபெற்ற மாவட்ட அளவிலான தொழிலக பாதுகாப்புக்குழு கூட்டத்தில் மாவட்ட ஆட்சியர் அவர்களால் அறிவுறுத்தப்பட்டுள்ளது. இந்நிலையில் பல பட்டாசு தொழிற்சாலைகளில் இந்த விபரங்கள் அடங்கிய பெயர் பலகை இடம்பெறவில்லை என புகார்கள் மாவட்ட நிர்வாகத்திற்கு வந்தவண்ணம் உள்ளன. எனவே, மேற்படி விபரங்கள் அடங்கிய பெயர் பலகையினை ஒரு வார காலத்திற்குள் பட்டாசு தொழிற்சாலையின் முன்புறத்தில் அனைவரும் அறிந்திடும் வகையில் பட்டாசு தொழிற்சாலை உரிமையாளர்கள் வைத்திட வேண்டும் என்றும், இதனை சம்மந்தப்பட்ட கிராம நிர்வாக அலுவலர்கள் மூலமாக கண்காணிப்பு செய்யப்படும் என்றும், மேற்படி பெயர் பலகையினை ஒரு வார காலத்திற்குள் வைக்காத பட்டாசு தொழிற்சாலையின் உரிமத்தின் மீது உரிய நடவடிக்கைகள் மேற்கொள்ளப்படும் என்றும், அதேபோல் சிறப்பு ஆய்வுக்குழுக்கள் மற்றும் வருவாய்த்துறை, தொழிலக பாதுகாப்பு மற்றும் சுகாதார இயக்ககம், வெடிபொருள் கட்டுபாட்டுத்துறை மற்றும் காவல்துறையினர் ஆகிய துறைகளால் பட்டாசு தொழிற்சாலைகள் தொடர்ச்சியாக ஆய்வு செய்யப்பட்டு, வெடிபொருள் சட்ட விதிமுறைகளை மீறி செயல்படும் பட்டாசு தொழிற்சாலைகளின் மீது உரிய நடவடிக்கைகள் மேற்கொள்ளப்படும் என மாவட்ட ஆட்சித்தலைவர் முனைவர் வீ.ப.ஜெயசீலன், I A S., அவர்கள் தெரிவித்துள்ளார்.
விருதுநகர் மாவட்டம், சிவகாசி பெல் ஹோட்டலில் (28.06.2024) தமிழ்நாடு காலநிலை மாற்ற இயக்கம் சார்பில் ஆற்றல் திறன் கொண்ட வாழ்விடம் என்ற தலைப்பில் கட்டிட அமைப்பாளர்களுக்கான பயிலரங்கம் மாவட்ட ஆட்சித்தலைவர் முனைவர் வீ.ப.ஜெயசீலன், I A S., அவர்கள் தலைமையில் நடைபெற்றது.இந்த பயிலரங்கத்தில் பருவநிலை மாற்றத்தால் ஏற்படும் பாதிப்புகள் குறித்தும், அதனை எதிர்கொள்ளும் வகையில் கட்டுமானத் துறையில் மேற்கொள்ளப்பட வேண்டிய மாற்றங்கள் குறித்தும் , வடிவமைப்பு மூலமும், மாற்று பொருட்கள், மின் மற்றும் மின்னணு சாதனங்களில் ஆற்றல் திறன் கொண்டவைகளை பயன்படுத்துதல் அதற்கான தொழில்நுட்பங்கள், பசுமை கட்டிடங்கள் பற்றிய அடிப்படை புரிதல், பசுமையை உருவாக்குதன் நன்மைகள் மற்றும் சவால்கள், வளங்கள் பற்றிய விழிப்புணர்வு குறிப்பாக ஆற்றல் திறன் மேம்பாடு மற்றும் பசுமை குடில் வாயு உமிழ்வை குறைப்பது ஆகியவற்றுடன் தொடர்புடைய செயல்களை மேம்படுத்துவதற்கான கட்டடம் கட்டுபவர்கள் மற்றும் கட்டடம் அமைப்பாளர்களுக்கு ஈடுபாட்டை உருவாக்கி விழிப்புணர்வு ஏற்படுத்துவதே இந்த பயிலரங்கத்தின் முக்கிய நோக்கமாகும். உலகம் முழுவதும் இன்றைக்கு அதிகமாக நடக்கக்கூடிய ஒரு கலந்துரையாடல் அல்லது விவாதம் பயிலரங்கம் என்று எடுத்துக் கொண்டால் மிக அதிக எண்ணிக்கையில் அது காலநிலை மாற்றம் பற்றியதாக தான் இருக்கிறது. உலகம் முழுவதும் ஏறத்தாழ 100 க்கும் மேற்பட்ட நாடுகளில் அதிகப்படியான எண்ணிக்கையிலான உலக பன்னாட்டு கூட்டங்கள் நடைபெறுவதும் காலநிலை மாற்றத்தை பற்றியதாக தான் இருக்கிறது.அடுத்து வரக்கூடிய 100 ஆண்டுகளில் உலகின் 5 விழுக்காடு மக்கள் நேரடியாக இந்த காலநிலை மாற்றத்தால் பாதிக்கப்படுவார்கள் என்று அறிவியல் பூர்வமான தரவுகள் அடிப்படையில் தெரிவிக்கின்றன. நமது ஊர்களிலேயே இதற்கான பாதிப்பினை நேரடியாக நாம் பார்க்க முடிகிறது.பருவ காலத்தைத் தாண்டி திடீரென்று அதிக மழை பெய்தல், விவசாயத் துறையிலும் கூட வரக்கூடிய புதிய நோய் தாக்குதல்கள், புதுவிதமான பூச்சி தாக்குதல் காலநிலை மாற்றத்தின் உடைய ஒரு தொடர்பாக இருக்கலாம் என்ற கருத்துக்கள் முன்வைக்கப்பட்டு அதற்கான சாத்தியக்கூறுகள் இருப்பதாக அறிவியல் பூர்வமாக கூறுகின்றன.இது போன்ற காலநிலை மாற்றத்தின் விளைவானது மிகப்பெரிய அளவில் இருக்கிறது குளிர்சாதன பெட்டி பயன்பாடு குறித்த தரவுகள் மட்டும் எடுத்து நாம் ஆராய்ந்தால் கடற்கரை ஒட்டி இல்லாத நகரங்களில் 200 நாட்கள் ஓடிக்கொண்டிருந்த குளிர்சாதன பெட்டிகள் இன்று 250 நாட்கள் ஓட வேண்டிய சூழல் உள்ளது.காலநிலை மாற்றத்தின் தாக்கம் நேரடியாகவும் மறைமுகமாகவும் உலகத்தை பாதிக்க தொடங்கிவிட்டன. காலநிலை மாற்றத்தினால் கடல் மட்டத்தின் உயரம் அதிகரிக்க அதிகரிக்க் மிகப்பெரிய பொருளாதார வலிமை பெற்ற நாடுகள் எல்லாம் அவர்களுடைய மற்ற வேலைகளை எல்லாம் விட்டுவிட்டு காலநிலை பருவ மாற்றத்தை பற்றியும், அவர்களை பாதுகாப்பதை பற்றியும் மட்டுமே இருக்கிறது.இதை எல்லாம் பார்க்கும்போது இன்று நாம் அதிகப்படியாக எல்லோரும் பேச வேண்டிய தலைப்பு, செயல்பட வேண்டிய பகுதியை நாம் குறைவாக பேசப்பட்டு, மிகக் குறைவாக செயல்பட்டுக் கொண்டு இருக்கிறோம். இன்று நாம் 80 விழுக்காடு மின் ஆற்றலை புதுப்பிக்க இயலாத சக்தி ஆற்றலின் மூலமே பெறுகிறோம். இந்த ஆற்றலை 20 சதவிகிதம் நம் பயன்பாட்டின் நேரடியான செயல்பாடுகளின் மூலம், குறைக்க முடியும். கட்டிடத் துறையை எடுத்துக்கொண்டால், இயற்கையாகவே சூரிய ஒளி வெளிச்சம் கிடைக்குமாறும், அந்த கட்டிடத்தினுடைய ஜன்னல்கள் இயற்கையாகவே காற்றோட்டம் உள்ளவாறும் பயன்படுத்தும் மின் மற்றும் மின்னணு சாதனங்களில் அதிக ஆற்றல் திறன் கொண்ட சாதனங்களை பயன்படுத்துதல் போன்றவை மூலம் ஆற்றலை குறைப்பதற்கான சாத்தியக்கூறுகள் உள்ளன.மேலும், கட்டிடத்துறையில் பசுமை கட்டிட வடிவமைப்பிற்கு பல்வேறு தொழில்நுட்பங்களும், செயற்கை நுண்ணறிவு போன்று துல்லியமாக ஆராய்ந்து செயல்படுவதற்கான தொழில்நுட்பங்களும் உள்ளன. இதனை பல்வேறு நாடுகள் கடைபிடித்து அதன் மூலம் காலநிலை மாற்றத்தை எதிர்கொள்வதற்கான பணிகள் செய்து முன்னேறி வருகின்றன.பெரிய பெரிய நிறுவனங்கள் எல்லாம் இந்த ஆற்றல் திறமைக்கு கட்டுமானங்கள் நிறைய சேர்த்த நுண்ணறிவு தொழில்நுட்பங்களை வந்து கொண்டிருக்கின்றன. இது குறித்து எல்லாம் நீங்கள் நிறைய தெரிந்து கொள்ள வேண்டும். நிறைய பயிற்சிகளை எடுக்க வேண்டும். அதன் மூலமாக அவற்றை உங்களுடைய நுகர்வோர்களுக்கு நீங்கள் அதை கடத்த வேண்டும் இப்படி செய்வதன் மூலமாகத்தான் நாம் எதிர்காலத்தையும் எதிர்காலத்தில் எதிர்கொள்ள வேண்டி இருக்கின்ற வேறு முக்கியமான பருவநிலை கால பாதிப்புகளை நாம் சரி செய்ய முடியும்.இதனை நீங்கள் புரிந்து கொண்டு செயல்படுத்தும் போது, உங்களுடைய சமூகத்திற்கும், உங்களுடைய நுகர்வோருக்கும் மிகப்பெரிய பயனாக இருக்கும் அதற்காகத்தான் இந்த நிகழ்ச்சி ஏற்பாடு செய்யப்பட்டிருக்கிறது என மாவட்ட ஆட்சித்தலைவர் அவர்கள் தெரிவித்துள்ளார்.
விருதுநகர் மாவட்ட ஊரக வளர்ச்சி முகமை அலுவலகத்தில் (28.06.2024) மாவட்டத்தில் முதலமைச்சரின் காலை உணவுத் திட்டம் விரிவாக்கம் செய்யப்பட உள்ள அரசு உதவி பெறும் பள்ளிகளுக்கு உணவு தயார் செய்வதற்கு பாத்திரங்கள் மற்றும் சமையல் உபகரணங்களை கொள்முதல் செய்யும் பொருட்டு மாதிரி பொருட்களின் தரம் குறித்து மாவட்ட ஆட்சித்தலைவர் முனைவர் வீ. ப. ஜெயசீலன் I A S., அவர்கள் நேரில் சென்று பார்வையிட்டு ஆய்வு செய்தார்.
