நமது தமிழ்நாடு அரசானது பொதுமக்களின் நலன் கருதி பொது மக்கள் தங்களது நில ஆவணங்களை எளிதில் எங்கிருந்தும் உடனடியாக பெற்றுக்கொள்ள ஏதுவாக ஆன்லைன் பட்டா திட்டம் ஏற்படுத்தப்பட்டு சிறப்பாக செயல்படுத்தி வருகிறது. தற்போது நமது அருப்புக்கோட்டை நகரில் நகர நில அளவைக்குட்பட்ட வார்டு ‘E” பிளாக் 5 உள்ளடக்கிய பகுதிகளில் உள்ள நகர நிலஅளவை புலங்களுக்கு நகர நிலவரித்திட்டத்தின் கீழ் வருவாய் பின்தொடர்பணி மேற்கொள்ளும் பணி நடைபெற்று வருகிறது. பொதுமக்கள் தங்கள் கிரைய ஆவணங்கள் மூலம் பெறப்பட்ட வீட்டு மனைகளுக்கு கூட்டுப்பட்டாவில் இருந்து தனிப்பட்டா பெறவும், பாகவிஸ்தி பத்திரங்கள் அடிப்படையில் தனிப்பட்டா பெறவும், கிரையம் பெற்றது முதற்கொண்டு நாளது தேதி வரை பட்டாமாற்றம் செய்யாமல் இருப்பின், பட்டா பெறவும், தங்களிடம் உள்ள பதிவு செய்யப்பட்ட பத்திர ஆவணங்களின் நகல்களுடன் அருப்புக்கோட்டை நகராட்சி அலுவலகத்தில் விண்ணப்பித்து பயன்பெறுமாறு கேட்டுக்கொள்ளப்படுகிறது.தேவைப்படும் ஆவணங்கள்:1. கிரைய ஆவணம் மற்றும் மூல ஆவணத்தின் நகல்2. வில்லங்கச்சான்று (EC)3. ஆதார் அட்டை நகல்4. பாஸ்போர்ட் அளவு புகைப்படம்5. இறப்பு மற்றும் வாரிசு சான்று (இறந்தவரின் பெயரில் பட்டா இருக்கும் நேர்வுகளில்)
மாவட்ட ஆட்சியர் மற்றும் மாவட்ட அளவிலான அலுவலர்கள் மக்களை தேடிச்சென்று குறைகளைக் கேட்டறியவும், பல்வேறு துறைகளின் மூலம் செயல்படுத்தப்படும் திட்டங்கள், செயல்பாடுகளை விரைவுபடுத்தவும் மற்றும் வழங்கப்படும் சேவைகளின் தரத்தை மேம்படுத்தவும், மக்களை நாடி மக்கள் குறைகளைக் கேட்டு, உடனுக்குடன் தீர்வு காண அரசு இயந்திரம் களத்திற்கே சென்று ஆய்வு செய்திட "உங்களைத் தேடி உங்கள் ஊரில்" என்ற புதிய திட்டம் தமிழ்நாடு முதலமைச்சர் அவர்களால் அறிவிக்கப்பட்டு, செயல்படுத்தப்பட்டு வருகிறது. அதன்படி, விருதுநகர் மாவட்டம், சிவகாசி வட்டத்தில் "உங்களைத் தேடி உங்கள் ஊரில்" என்ற புதிய திட்ட முகாமானது 18.07.2024 இன்று காலை 9 மணி முதல் மறுநாள் 19.07.2024 அன்று காலை 9 மணி வரை நடைபெறவுள்ளது. இந்த முகாமின் கீழ், பல்வேறு அரசுத்துறை அலுவலர்கள் அரசின் திட்டங்கள், செயல்பாடுகளை விரைவுபடுத்தவும் மற்றும் வழங்கப்படும் சேவைகளின் தரத்தை மேம்படுத்தவும் கள ஆய்வு மேற்கொண்டு வருகின்றனர்.அதனடிப்படையில், மாவட்ட ஆட்சித்தலைவர் அவர்கள் இன்று சிவகாசி சிறுகுளம் கண்மாயில் நடைமேடை அமைக்கும் பணிகள் நடைபெற்று வருவதை பார்வையிட்டு பணிகளின் தரம் குறித்து ஆய்வு செய்தார்.பின்னர், சிவகாசி நகர்புற ஆரம்ப சுகாதார நிலையத்தினை பார்வையிட்டு, அங்கு உள்நோயாளியாக அனுமதிக்கப்பட்டு சிகிச்சை பெறுபவர்களிடம் சிகிச்சை முறைகள், அடிப்படை வசதிகள் குறித்தும் கேட்டறிந்து ஆய்வு செய்தார். மேலும், மகபேறு அடைந்த தாய்மார்களுக்கு தாய் சேய் நல பரிசு பெட்டகங்களை மாவட்ட ஆட்சித்தலைவர் அவர்கள் வழங்கினார்.அதனை தொடர்ந்து, அண்ணா காலனியில் செயல்பட்டுவரும் அங்கன்வாடிக்கு நேரில் சென்று அங்கு பயிலும் மாணவர்களுக்கு வழங்கப்படும் ஊட்டசத்து உணவுகள், வயதிற்கேற்ற உயரம், எடை உள்ளிட்டவைகள் குறித்து கேட்டறிந்து ஆய்வு செய்தார்.பின்னர், சிவகாசி சார்பாவதிவாளர் அலுவலகத்தினை பார்வையிட்டு, அங்கு பராமரிக்கப்படும் பதிவேடுகள், கோப்புகளை கணினியில் பதிவேற்றம் செய்தல் குறித்து ஆய்வு செய்தார்.சிவகாசி மாநகராட்சி அலுவலக வளாகத்தில் செயல்பட்டு வரும் இ-சேவை மையத்தினை பார்வையிட்டு ஆய்வு செய்து, பொதுமக்களிடமிருந்து பெறப்படும் விண்ணப்பங்கள் மற்றும் வழங்கப்படும் சேவைகளுக்காக பெறப்படும் கட்டண விவரங்கள் குறித்து கேட்டறிந்தார்.பின்னர், சிவகாசி கிராம நிர்வாக அலுவலகத்திற்கு சென்று பார்வையிட்டு அங்கு பராமரிக்கப்படும் கிராம கணக்குகள், பதிவேடுகளை மாவட்ட ஆட்சித்தலைவர் அவர்கள் ஆய்வு செய்தார்.சிவகாசி நகர காவல் நிலையத்தினை நேரில் சென்று பார்வையிட்டு நகரப்பகுதிகளில் சட்டம் ஒழுங்கு, குற்றச்சம்பவங்களின் எண்ணிக்கை, அதன் மீது எடுக்கப்பட்டுள்ள நடவடிக்கைகள், சாலைபாதுகாப்பு உள்ளிட்டவை குறித்து கேட்டறிந்து ஆய்வு செய்தார். சிவகாசி தீயணைப்பு மற்றும் மீட்புப்பணிகள் நிலையத்தினை பார்வையிட்டு ஆய்வு செய்து, நிலையத்தின் செயல்பாடுகள், ஊர்தி மற்றும் உபகரணங்களின் பராமரிப்பு, தீயணைப்பு வீரர்களுக்கு வழங்கப்படும் பயிற்சிகள், நிலையத்தில் உள்ள வசதிகள் குறித்து கேட்டறிந்தார்.பின்னர், சிவகாசி துணைமின் நிலையத்தை பார்வையிட்டு, நிலையத்தின் செயல்பாடுகள் குறித்து கேட்டறிந்து, மின் உபகரணங்களை முறையாக பராமரிப்பு செய்து, தடையில்லா மின்சாரம் வழங்குவதை உறுதி செய்ய அலுவலர்களை அறிவுறுத்தினார்.அதனை தொடர்ந்து, சிவகாசி முஸ்லீம் துவக்கப்பள்ளியை பார்வையிட்டு, கற்பிக்கும் முறைகள், அடிப்படை வசதிகள் குறித்தும், மாணவர்களுக்கு வழங்கப்படும் மதிய உணவின் தரம் குறித்து ஆய்வு செய்து, மாணவர்களுடன் உணவருந்தினார்.அதனை தொடர்ந்து, ஊராட்சி ஒன்றிய அலுவலகத்தில், அனைத்து ஊராட்சிகளில் மேற்கொள்ள வேண்டிய குடிநீர், சுகாதாரம் மற்றும் சாலைப் பணிகள், அரசின் திட்டங்கள் மற்றும் சேவைகள் உரிய பயனாளிகளை சென்றடைவதை உறுதி செய்வது குறித்து அனைத்து அரசு அலுவலர்களுடனான ஆலோசனைக் கூட்டம் மாவட்ட காவல் கண்காணிப்பாளர் திரு.கா.பெரோஸ்கான் அப்துல்லா அவர்கள் முன்னிலையில் மாவட்ட ஆட்சித்தலைவர் அவர்கள் தலைமையில் நடைபெற்றது.இக்கூட்டத்தில், வெடி விபத்தில் காயமடைந்த 10 நபர்களுக்கு தலா 1 இலட்சம் வீதம் மொத்தம் ரூ.10 இலட்சம் மதிப்பிலான காசோலைகளை மாவட்ட ஆட்சித்தலைவர்கள் அவர்கள் வழங்கினார்.
தமிழ்நாடு நாள் தினத்தை முன்னிட்டு (18.07.2024) விருதுநகர் தியாகி சங்கரலிங்கனார் மணி மண்டபத்தில் உள்ள அன்னாரது சிலைக்கு செய்தி மக்கள் தொடர்பு அலுவலர் திரு. பெ.ரா.வெற்றிவேந்தன் அவர்கள் மாலை அணிவித்து மரியாதை செலுத்தினார்.
விருதுநகர் மாவட்ட அரசு மருத்துவக்கல்லூரி கலையரங்கத்தில் (18.07.2024) பள்ளிக்கல்வித்துறை சார்பில், மாவட்ட ஆட்சித்தலைவர் முனைவர் வீ.ப.ஜெயசீலன்., I A S, அவர்கள் தலைமையில், விருதுநகர் நாடாளுமன்ற உறுப்பினர் திரு.ப.மாணிக்கம் தாகூர் அவர்கள், விருதுநகர் சட்டமன்ற உறுப்பினர் திரு.ஏ.ஆர்.ஆர்.சீனிவாசன் அவர்கள் மற்றும் சிவகாசி மாநகராட்சி மேயர் திருமதி சங்கீதா இன்பம் அவர்கள் ஆகியோர் முன்னிலையில், வருவாய் மற்றும் பேரிடர் மேலாண்மைத்துறை அமைச்சர் திரு.கே.கே.எஸ்.எஸ்.ஆர்.ராமச்சந்திரன் அவர்கள் மற்றும் நிதி மற்றும் மனிதவள மேலாண்மைத்துறை அமைச்சர் திரு.தங்கம் தென்னரசு அவர்கள் ஆகியோர் 796 அரசு பள்ளிகளில் பணிபுரிந்துவரும் 2083 ஆசிரியர்களுக்கு கையடக்கக் கணினிகளை வழங்கினார்கள். தமிழ்நாடு முதலமைச்சர் அவர்கள் கல்வியின் வளர்ச்சிக்காக பல்வேறு திட்டங்களை செயல்படுத்தி வருகிறார்கள். அதன்படி, மாறிவரும் கற்றல், கற்பித்தல் முறைகளுக்கேற்ப தங்களை சிறப்பாக மெருகேற்றிக் கொள்வதற்கென அனைத்து இடைநிலை மற்றும் பட்டதாரி ஆசிரியர்களுக்கு கைக்கணினி (Tablet) வழங்கப்படும் என்று அறிவித்தார்கள்.அதன்படி, தமிழ்நாடு அரசு, தொடக்க மற்றும் நடுநிலைப் பள்ளிகளில் பணியாற்றும் 79,723 ஆசிரியர்களுக்கு 101.48 கோடி ரூபாய் செலவில் கைக்கணினிகள் (Tablet) வழங்கும் திட்டத்தினை தமிழ்நாடு முதலமைச்சர் அவர்கள் ஆசிரியர்களுக்கு கைக்கணினிகள் வழங்கி தொடங்கி வைத்தார்.அதனடிப்படையில், விருதுநகர் மாவட்டத்தில் உள்ள 796 அரசு பள்ளிகளில் பணிபுரிந்துவரும் 2083 ஆசிரியர்களுக்கு இக்கையடக்கக் கணினி வழங்கப்படுகிறது.நமது விருதுநகர் மாவட்டத்தில் உள்ள 796 அரசு தொடக்க/நடுநிலைப் பள்ளிகளில் பணிபுரியும் (937+1146) என மொத்தம் 2083 ஆசிரியர்களுக்கு இக்கையடக்கக் கணினி வழங்கப்படுகிறதுஇதன் மூலம் ஆசிரியர்கள், மாணவர்களின் வருகை பதிவு, மாணவர்களுக்குக் கிடைக்கக்கூடிய அரசு வழங்கும் நலத்திட்டஉதவிகளை பதிவேற்றம் செய்வது மற்றும் மாணவர்களின் அறிவுத்திறனைஅறிந்துகொள்ள ஏதுவாக தேர்வுகள் நடத்திட என பல வழிகளில் பயனுள்ள இக்கையடக்கக் கணினி அனைத்து அரசு தொடக்கப் பள்ளிகளில் பணிபுரியும் தலைமை ஆசிரியர், இடைநிலை உதவியாசிரியர் மற்றும் அரசு நடுநிலைப் பள்ளிகளில் பணிபுரியும் இடைநிலை ஆசிரியர்கள் அனைவருக்கும் இக்கையடக்கக் கணினி வழங்கப்படுகிறது. தமிழ்நாடு முதலமைச்சர் அவர்கள் ஆசிரியர் பெருமக்கள் தான் பெற்றோர்களை விட இளைய சமுதாயத்தை சரியான வழியில் கொண்டு செல்லக்கூடிய வகையில் குழந்தை செல்வங்களின் மீது அதிக அக்கறை கொண்டவர்கள் என்ற உணர்வோடு பள்ளிக்கல்வித்துறையில் உட்கட்டமைப்பு திட்டங்களோடு, ஆசிரியர்களுக்கான நலனில் அக்கறையோடு செயலாற்றுகிறார்கள்.இன்றைக்கு இருக்கக்கூடிய குழந்தைகளுக்கு இந்த கணினி என்பது மிக சாதாரணமாக இருக்கிறது. குழந்தைகள் கைபேசியை பெரியவர்களை விட மிக எளிதாக பயன்படுத்துகிறார்கள். நமக்குத் தெரியாதவற்றை கூட அந்த குழந்தைகள் நமக்கு சொல்லிக் கொடுக்கக் கூடிய அளவிற்கு அவர்களின் அறிவுத்திறன் இன்றைக்கு அதிகமாக இருக்கிறது. அதற்கு இணையாக நம்முடைய கற்றல்முறை இருக்க வேண்டும்.தற்போது உள்ள ஆசிரியர்கள் அவர்கள் படித்த காலத்தில் இருப்பதற்கும் தற்போதுள்ள கல்வி முறைக்கும் நிறைய வித்தியாசம் மற்றும் முன்னேற்றம் இருக்கிறது. விஞ்ஞான ரீதியாக இன்றைக்கு படிப்பின் தரம் உயர்ந்திருக்கிறது. அதற்கு நாம் இணையாக போட்டி போட வேண்டும் என்று சொன்னால் இது போன்ற மின் சாதனைகளை எல்லாம் உபயோகப்படுத்துகின்ற போதுதான் நம் அறிவுத்திறனை வளர்த்துக் கொள்ள முடியும். குழந்தைகளுக்கு உள்ள சந்தேகங்களையும் நம்மால் தீர்க்க முடியும். இதை எல்லாம் மனதில் வைத்துக் கொண்டுதான் இந்த கையடக்க கணினி வழங்கப்பட்டிருக்கின்றது. சமுதாயத்தில் ஒழுக்கத்தை கற்றுக் கொடுப்பவர்கள் ஆசிரியர்கள். சமுதாயம் எப்படி செல்ல வேண்டும், எப்படி இருக்க வேண்டும் என்ற எண்ணத்தை குழந்தைகள் மனதில் ஊட்டக்கூடியவர்கள் ஆசிரியர்கள். இந்த நாடு எதிர்காலத்தில் ஒரு ஒழுக்கம் மிகுந்த, நாட்டுப்பற்றுள்ள, சிறந்த அறிவாளிகள் கொண்ட நாடாக இருக்க வேண்டும் என்றால் அது ஆசிரியர்கள் கையில் தான் இருக்கிறது. அதற்கு ஆசிரியர்களான நீங்கள் அத்தனை பேரும் தியாக உணர்வோடு பணியாற்ற வேண்டும் என தெரிவித்தார்.
விருதுநகர் தேசபந்து மைதானத்தில், செய்தி மக்கள் தொடர்புத்துறையின் சார்பில், "தலை சிறந்த மூன்றாண்டு தலை நிமிர்ந்த தமிழ்நாடு" என்ற தலைப்பில் அமைக்கப்பட்டிருந்த தமிழ்நாடு அரசின் மூன்றாண்டு சாதனை விளக்க புகைப்படக் கண்காட்சி நடைபெற்று வருவதை (18.07.2024) பொதுமக்கள் பார்வையிட்டனர்.
விருதுநகர் மாவட்ட ஆட்சியர் அலுவலகக் கூட்டரங்கில் (18.07.2024) விருதுநகர் மாவட்டத்தில் மேற்கொள்ள வேண்டிய வளர்ச்சி திட்டப்பணிகள் குறித்த அனைத்து அரசுத்துறை அலுவலர்களுடனான ஆலோசனைக்கூட்டம் மாவட்ட ஆட்சித்தலைவர் முனைவர் வீ.ப.ஜெயசீலன் , I A S,., அவர்கள் தலைமையில் நடைபெற்றது
விருதுநகர் மாவட்டம், இராஜபாளையம் ஊராட்சி ஒன்றியத்துக்குட்பட்ட பல்வேறு பகுதிகளில் நடைபெற்று வரும் வளர்ச்சிப் பணிகள் குறித்து மாவட்ட ஆட்சித்தலைவர் முனைவர் வீ.ப.ஜெயசீலன்.,I A S., அவர்கள் (17.07.2024) நேரில் சென்று பார்வையிட்டு ஆய்வு செய்தார்.அதன்படி, இராஜபாளை ஊராட்சி ஒன்றியம் கிருஷ்ணாபுரம் ஊராட்சியில் உள்ள அம்பேத்கர் நகரில் அயோத்தி தாஸ் பண்டிதர் குடியிருப்பு அபிவிருத்தி திட்டத்தின் கீழ் ரூ.22.50 இலட்சம் மதிப்பில் ஆதிதிராவிடர் மக்களுக்கான மயானம் கட்டடம், தகன கொட்டகை, காத்திருப்புக் கூடம், சுற்றுச்சுவர், சிமெண்ட் சாலை அமைக்கப்பட்டுள்ளதையும்,அதனை தொடர்ந்து, மேலப்பாட்டகரிசல்குளம் கிராமத்தில் திருவள்ளுவர் நகரில் உள்ள அரசு மேல்நிலைப்பள்ளியில் சட்டமன்ற உறுப்பினர் தொகுதி மேம்பாட்டு திட்டத்தின் கீழ் ரூ.20 இலட்சம் மதிப்பில் பள்ளி சுற்றுச்சுவர் கட்டப்பட்டுள்ளதையும்,மேலப்பாட்டகரிசல் குளம் கிராமத்தில் ரூ.3.95 கோடி மதிப்பில் புதிய ஊராட்சி ஒன்றிய அலுவலகம் கட்டப்பட்டு வருவதையும்,மேலும், நல்லமநாயக்கன்பட்டி ஊராட்சியில் உள்ள அரசு மேல்நிலைப்பள்ளியில் படிக்கும் மாணவர்களுக்கு ஊராட்சி ஒன்றிய பொது நிதியின் கீழ் ரூ.3இலட்சம் மதிப்பில் மிதிவண்டி நிறுத்த கூடம் அமைக்கப்பட்டு வருவதையும்,நல்லமநாயக்கன்பட்டி ஊராட்சியில் அனைத்து கிராம அண்ணா மறுமலர்ச்சி திட்டம் மூலம் ரூ.31.46 இலட்சம் மதிப்பில் புதிய ஊராட்சி மன்ற அலுவலகம் கட்டப்பட்டு வருவதையும் மாவட்ட ஆட்சித்தலைவர் முனைவர் வீ.ப.ஜெயசீலன்.,இ.ஆ.ப., அவர்கள் நேரில் சென்று பார்வையிட்டு ஆய்வு செய்தார்.இந்த ஆய்வின் போது பணிகளை தரமாகவும், விரைந்து முடித்து பொதுமக்களின் பயன்பாட்டிற்கு கொண்டு வருவதற்கு சம்பந்தப்பட்ட அரசு அலுவலர்களை அறிவுறுத்தினார்.மேலும், இராஜபாளையம் ஊராட்சி ஒன்றியம், சோழபுரம் கிராமத்தில் உள்ள பெருமாள் கோவிலில் சுமார் 13 ஆம் நூற்றாண்டைச் சேர்ந்த கல்வெட்டினை பார்வையிட்டு ஆய்வு செய்தார்.பின்னர் ஜமீன் கொல்லன் கொண்டான் கிராமத்தில் உள்ள ஜமீன் அரண்மனைக்குச் சென்று அரண்மனையின் கட்டிட வடிவமைப்பு குறித்துப் பார்வையிட்டு, ஜமீன்தாரின் வாரிசுதாரர்களிடம் கலந்துரையாடினார்.அதனைத் தொடர்ந்து ஜமீன் கொல்லன் கொண்டான் கிராமத்தில் உள்ள கல்குவாரியில் அரசன் அல்லது தலைவன் அரியாசனத்தில் ஆடை ஆபரணங்களுடன் அமர்ந்திருந்ததை வெளிப்படுத்தும் விதமாக உள்ள சுமார் 17 ஆம் நூற்றாண்டு நாயக்கர் காலத்தைச் சேர்ந்த கல் சிற்பத்தினை மாவட்ட ஆட்சித் தலைவர் அவர்கள் ஆய்வு செய்தார்.
விருதுநகர் மாவட்டம், பழைய பேருந்து நிலையத்தில் தமிழ்நாடு அரசு போக்குவரத்து கழகம், விருதுநகர் மண்டலத்தில் புதியதாக வாங்கப்பட்ட 29 பேருந்துகளின் சேவையினை மாவட்ட ஆட்சித்தலைவர் முனைவர் வீ.ப.ஜெயசீலன், I A S., அவர்கள் தலைமையில், விருதுநகர் சட்டமன்ற உறுப்பினர் திரு.ஏ.ஆர்.ஆர்.சீனிவாசன் அவர்கள், இராஜபாளையம் சட்டமன்ற உறுப்பினர் திரு.எஸ்.தங்கப்பாண்டியன் அவர்கள், சாத்தூர் சட்டமன்ற உறுப்பினர் திரு.ஏ.ஆர்.ஆர்.ரகுராமன் அவர்கள் மற்றும் சிவகாசி மாநகராட்சி மேயர் திருமதி சங்கீதா இன்பம் அவர்கள் ஆகியோர் முன்னிலையில், வருவாய் மற்றும் பேரிடர் மேலாண்மைத்துறை அமைச்சர் திரு.கே.கே.எஸ்.எஸ்.ஆர்.ராமச்சந்திரன் அவர்கள், நிதி மற்றும் மனிதவள மேலாண்மைத்துறை அமைச்சர் திரு.தங்கம் தென்னரசு அவர்கள் மற்றும் மாண்புமிகு போக்குவரத்து துறை அமைச்சர் எஸ்.எஸ்.சிவசங்கர் அவர்கள் ஆகியோர் இன்று (16.07.2024) பொதுமக்களின் பயன்பாட்டிற்கு துவக்கி வைத்தார்கள். தமிழ்நாடு அரசு போக்குவரத்துக் கழகம் மதுரை கோட்டத்தின் கீழ் மதுரை, திண்டுக்கல் மற்றும் விருதுநகர் ஆகிய இடங்களில் மண்டல அலுவலகங்கள் செயல்பட்டு நகர், புறநகர் மற்றும் மலைப்பகுதிகளில் பேருந்து சேவை வழங்கப்பட்டு வருகின்றது. விருதுநகர் மண்டலத்தில் 9 பணிமனைகளில் உள்ள மொத்தம் உள்ள பேருந்துகளின் எண்ணிக்கை 449 மற்றும் வறையறுக்கப்பட்ட சேவைகளின் எண்ணிக்கை 418 ஆகும். இக்கழகத்தில் உள்ள மொத்த பணியாளர்களின் எண்ணிக்கை 2449 ஆகும். இக்கழகம் சாதாரணப் பேருந்து, விரைவுப்பேருந்து மற்றும் குளிர்சாதனப் பேருந்துகளை இயக்கி வருகின்றது. மேலும் நாளொன்றுக்கு நிர்ணிக்கப்பட்ட இயக்க தூரம் 1.95 லட்சம் கி.மீட்டர் ஆகும். இதனால் மாத்திற்கு 60.45 .இலட்சம் கி.மீட்டர் இயக்கம் செய்ய நிர்ணயம் செய்யப்பட்டுள்ளது. நாளொன்றுக்கு சுமார் 3.50 இலட்சம் பயணிகளும் மாதம் ஒன்றுக்கு 104.80 இலட்சம் பயணிகளும் பயன்படும் வகையில் வழித்தட சேவைகள் இப்போக்குவரத்துக்கழகம் மூலம் இயக்கப்பட்டு வருகிறது..தமிழ்நாடு முதலமைச்சர் அவர்களால் 07.05.2021 அன்று மகளிருக்காக விடியல் பயணத்திட்டம் நகரப்பேருந்துகளில் கட்டணமில்லா பயண சலுகை வழங்கப்பட்டது. இத்திட்டத்தின் மூலம் விருதுநகர் மாவட்ட இயக்கப்பகுதிகளில் மகளிர் தினந்தோறும் சுமார் 1.35 இலட்சம் பெண்கள் பயனடைந்து வருகிறார்கள். இதன் மூலம் மாதம் ஒன்றிற்கு மகளிருக்கு சுமார் 1000 ரூபாய் வரை சேமிப்பு ஏற்பட்டு பொருளாதாரம் மேம்படுகிறது. 500 நபர்களுக்கு மேல் மக்கள் தொகை கொண்ட அனைத்து கிராமங்களுக்கும் இக்கழகம் பேருந்து சேவையினை தொடர்ந்து செய்து வருகிறது. தமிழ்நாடு முதலமைச்சர் அவர்களின் வழிகாட்டுதலின்படி தமிழ்நாடு அரசுப்போக்குவரத்துக்கழகம் மதுரை கோட்டத்தின் கீழ் இயங்கி வரும் விருதுநகர் மண்டலத்திற்கு போக்குவரத்துத்துறை அமைச்சர் அவர்களால் 04.03.2024 அன்று 10 புதிய பேருந்துகளும், படிப்படியாக 26 புதிய பேருந்துகளும் என மொத்தம் 36 பேருந்துகள் இயக்கப்பட்டுள்ளது. இன்று 16.07.2024 தமிழ்நாடு அரசுப்போக்குவரத்துக்கழகம் விருதுநகர் மண்டலம் சார்பில் 25 புறநகர் பேருந்துகள், 4 நகர் பேருந்துகள் என மொத்தம் 29 புதிய பேருந்துகள் ரூ.12.18 கோடி மதிப்பீட்டில் இயக்கப்படுகிறது.அருப்புக்கோட்டை கிளைக்கு 5 பேருந்துகளும், சிவகாசி கிளைக்கு 8 பேருந்துகளும், இராஜபாளையம் கிளைக்கு 9 பேருந்துகளும், விருதுநகர் கிளைக்கு 2 பேருந்துகளும், காரியாபட்டி கிளைக்கு 1 பேருந்தும், சாத்தூர் கிளைக்கு 2 பேருந்துகளும், திருவில்லிபுத்தூர் கிளைக்கு 2 பேருந்துகளும் என மொத்தம் விருதுநகர் மண்டலத்திற்கு 29 புதிய பேருந்துகள் இன்று இயக்கி வைக்கப்பட்டுள்ளன.தமிழ்நாடு முதலமைச்சர் அவர்கள் பொறுப்பேற்ற பிறகு அரசு போக்குவரத்து கழகத்தை மாற்றியமைப்பதற்காக பல்வேறு நடவடிக்கைகளை எடுத்து வருகிறார்கள். பல்வேறு மாநிலங்களில் போக்குவரத்து ஊழியர்களுக்கு சம்பளம் வழங்க முடியாத சூழ்நிலை இருக்கும் போது, நீண்டகாலமாக நிலுவையில் இருந்த நமது போக்குவரத்து கழக ஊழியர்களின் ஊதிய உயர்வு பேச்சுவார்த்தை நடத்தப்பட்டு, போக்குவரத்து ஊழியர்களின் ஊதிய விகிதம் சீரமைக்கப்பட்டுள்ளது.தற்போது, நல்ல நிலையில் போக்குவரத்துக் கழகம் இயங்குவதற்கு முத்தமிழறிஞர் கலைஞர் அவர்களின் வழியில் மாண்புமிகு தமிழ்நாடு முதலமைச்சர் அவர்கள் மக்கள் பயன்பெற வேண்டுமென்ற எண்ணத்தில், எடுக்கக்கூடிய நடவடிக்கைகள் தான் காரணம். இந்தியாவில் எந்த மாநிலத்திலும் மாநில அரசிடம் இத்தனை பேருந்துகள் கிடையாது .நம்முடைய மாநில அரசிடம் தான் சுமார் 20,000 பேருந்துகள் இருக்கின்றன. எல்லா கிராமங்களுக்கும் பேருந்து வசதிகள் இருக்கின்ற ஒரே மாநிலம் தமிழ்நாடு தான். அதேபோல் நேரம் முறைப்படி இயங்குகின்ற பேருந்துகள் தமிழ்நாட்டில் தான் உள்ளது .இப்படிப்பட்ட பல்வேறு சிறப்புகளைப் பெற்று இருக்க கூடிய போக்குவரத்து கழகத்தை தமிழ்நாடு முதலமைச்சர் அவர்களின் தலைமையிலான அரசு மென்மேலும் மேம்படுத்துவதற்கான பணிகளை தொடர்ந்து செயல்படுத்தும் என தெரிவித்தார்.
விருதுநகர் மாவட்டம், அருப்புக்கோட்டை ஊராட்சி ஒன்றியம், கஞ்சநாயக்கன்பட்டி ரேணுகாதேவி திருமண மண்டபத்தில் (16.07.2024) நடைபெற்ற மக்களுடன் முதல்வர் திட்ட முகாமில் மாவட்ட ஆட்சித்தலைவர் முனைவர் வீ.ப.ஜெயசீலன்,I A S, அவர்கள் தலைமையில்,வருவாய்மற்றும்பேரிடர்மேலாண்மைத்துறைஅமைச்சர்திரு.கே.கே.எஸ்.எஸ்.ஆர்.ராமச்சந்திரன் அவர்கள் பொதுமக்களிடம் கோரிக்கை மனுக்களை பெற்றுக்கொண்டு, அரசு நலத்திட்ட உதவிகளை வழங்கினார்.இம்முகாமில், ஆதிதிராவிடர் நலத்துறையின் மூலம், 32 பயனாளிக்கு ரூ.1,92,000/- மதிப்பிலான இணையவழி பட்டாக்களையும், ஒரு பயனாளிக்கு இலவச தையல் இயந்திரத்தையும், 4 பயனாளிகளுக்கு ரூ.1,98,205/- மதிப்பிலான இலவச வீட்டுமனை பட்டாக்களையும், 2 பயனாளிகளுக்கு வண்டல்மண் மற்றும் களிமண் எடுப்பதற்கான ஆணைகளையும், 6 பயனாளிகளுக்கு ரூ.5,00,000/- மதிப்பிலான சாலை விபத்து நிவாரணத்தொகையினையும், சமூக பாதுகாப்புத் திட்டத்தின் கீழ், 11 பயனாளிகளுக்கு உழவர் அட்டையினையும், 6 பயனாளிகளுக்கு குடும்ப அட்டைகளையும், வேளாண்மைத்துறை மூலமாக 2 பயனாளிக்கு சிறுதானிய நுண்ணூட்டங்களையும், தோட்டக்கலைத்துறை மூலமாக ஒரு பயனாளிக்கும் பழக்கன்றுகளையும், தமிழ்நாடு மாநில ஊரக வாழ்வாதார இயக்கத்தின் கீழ், 6 மகளிர் சுய உதவிக்குழுக்களுக்கு ரூ.4,90,000/- மதிப்பிலான கடனுதவிகளையும் என மொத்தம் 71 பயனாளிகளுக்கு ரூ.13.80 இலட்சம் மதிப்பிலான அரசு நலத்திட்ட உதவிகளை வருவாய் மற்றும் பேரிடர் மேலாண்மைத்துறை அமைச்சர் அவர்கள் வழங்கினார்.இம்முகாமில் கஞ்சநாயக்கன்பட்டி, ஆத்திப்பட்டி, செம்பட்டி மற்றும் புலியூரான் ஆகிய ஊராட்சிகளை சேர்ந்த பல்வேறு பொதுமக்கள் கலந்து கொண்டு கோரிக்கை மனுக்களை அளித்தனர்.தமிழ்நாடு முதலமைச்சர் அவர்கள் தலைமையிலான அரசு உங்கள் அரசு. உங்கள் அரசாங்கமாக இருப்பதன் காரணத்தினால் அமைச்சர் அவர்களும், மாவட்ட ஆட்சித்தலைவர் அவர்களும், 14 துறைகளைச் சார்ந்த அரசு அலுவலர்களும் உங்களைத் தேடி வந்திருக்கிறார்கள். பொதுமக்களிடையே குறைகளை கேட்டு, மனுவாக பெற்று செல்வது மட்டுமல்லாமல், அவற்றை உடனே கணினியில் பதிவு செய்து, அந்தந்த துறைக்கு அனுப்பப்பட்டு, அந்தத் துறையில் தீர்வு காண்பதற்கான நடவடிக்கையை எடுக்கிறார்கள். நீங்கள் கொடுக்கும் தகுதியான அனைத்து மனுவிற்கும் முறையான தீர்வுகள் வழங்கப்படும். தமிழ்நாடு முதலமைச்சர் அவர்கள் அரசுத்துறைகளின் சேவைகள் விரைவாகவும், எளிதாகவும் கிடைக்க வேண்டும் என்ற உயர்ந்த நோக்கத்தோடு இந்த மக்களுடன் முதல்வர் திட்ட முகாம்கள் நடத்தப்படுகிறது.கடந்த முறை அருப்புக்கோட்டை பாலையம்பட்டியில் நடைபெற்ற முகாமில் சுமார் 800 மனுக்கள் பெறப்பட்டுள்ளன.முதலமைச்சரின் காலை உணவு திட்டம் அரசு உதவி பெறும் பள்ளிகளுக்கும் விரிவுபடுத்தப்பட்டுள்ளது. கலைஞர் மகளிர் உரிமை தொகை திட்டம் மூலம் பெறப்பட்ட 1.60 கோடி விண்ணப்பங்களில் மாதந்தோறும் சுமார் 1.15 கோடி பயனாளிகளுக்கு மாதந்தோறும் ரூ.1000- வழங்கப்பட்டு வருகிறது. சமீபத்தில் விண்ணப்பித்தவர்களில் தகுதியான 1.48 இலட்சம் பயனாளிகளுக்கும் ரூ.1000- வழங்கப்பட்டுள்ளது. கலைஞர் மகளிர் உரிமை தொகை திட்டம் மூலம் தகுதியான நபர்கள் விடுபட்டிருந்தாலும் அவர்களுக்கும் கொடுப்பதற்கான நடவடிக்கை எடுக்கப்பட்டு வருகிறது. தமிழ்நாடு அரசு விடியல் பயணம் மூலம் பெண்கள் இலவசமாக செல்லக்கூடிய ஒவ்வொரு பயணத்திற்கும் போக்குவரத்துக் கழகத்திற்கு கட்டணம் செலுத்தி வருகிறது. கலைஞரின் கனவு இல்லம் என்ற திட்டத்தின் மூலம் சுமார் ஒரு இலட்சம் வீடுகள் கட்ட திட்டமிடப்பட்டுள்ளது. இதுபோன்ற அனைத்து தரப்பு மக்களுக்கு தேவையான திட்டங்களை தமிழ்நாடு அரசு செயல்படுத்தி வருகிறது. உங்களால் தேர்ந்தெடுக்கப்பட்ட இந்த அரசு மக்கள் நல திட்டங்களை தொடர்ந்து செயல்படுத்தும் என தெரிவித்தார்.மக்களுடன் முதல்வர் என்பது மக்களிடம் நேரடியாக சென்று அவர்களிடம் மனுக்கள் வாங்கக்கூடிய மிக முக்கியமான திட்டம். கடந்த வாரத்தில் தமிழ்நாடு முதலமைச்சர் அவர்களால் தர்மபுரி மாவட்டத்தில் தொடங்கப்பட்டு, அதற்கு அடுத்தபடியாக நமது மாவட்டத்தில் அமைச்சர் பெருமக்கள் அவர்களால் தொடங்கி வைக்கப்பட்டது. அதைத் தொடர்ந்து பல்வேறு கட்டங்களாக ஒவ்வொரு கிராமப்புற பகுதிகளிலும் பொதுமக்களிடம் நேரடியாக சென்று மனுக்களை பெறக்கூடிய இந்த திட்டம் இன்று அருப்புக்கோட்டை வட்டாரத்திற்கு உட்பட்ட கஞ்சநாயக்கன்பட்டி கிராமத்தில் நடைபெறுகிறது.பொதுமக்கள் மின்சாரம், பட்டா மாறுதல், குடும்ப அட்டை, முதியோர் ஓய்வூதியம் உள்ளிட்ட பல்வேறு சேவைகளுக்கு அரசு அலுவலகங்களுக்கு நேரடியாக செல்ல வேண்டி இருக்கிறது.நமது மாவட்டத்தில் உள்ள 10 வட்டாரம் மற்றும் 11 ஒன்றியங்களில் இருந்து மக்கள் குறைத்தீர்க்கும் நாள் கூட்டம் , மக்கள் தொடர்பு திட்ட முகாம், இணையவழி மனுக்கள், முதலமைச்சரின் தனிப்பிரிவு உள்ளிட்டவைகள் மூலமாகவும் அமைச்சர் பெருமக்கள், உள்ளாட்சி பிரதிநிதிகள் ஆகியோரிடம் நேரடியாகவும் ஏறத்தாழ வருடத்திற்கு 90,000 மனுக்கள் பெறப்படுகின்றன.இதில் பெரும்பாலான மனுக்கள் பொதுமக்கள் நேரடியாக சென்று மனுக்கள் அளிக்க வேண்டி இருக்கிறது. இவற்றை மாற்றி பொதுமக்களிடம் அனைத்து அரசு அலுவலர்களும் நேரடியாக சென்று மனுக்களை பெற்று அதற்கான தீர்வை வழங்கும் விதமாக இந்த திட்டம் செயல்படுத்தப்பட்டு வருகிறது.மனுக்கள் பெறுவதோடு மட்டுமல்லாமல் அதனை கணினியில் பதிவு செய்து அதற்கான நடவடிக்கைகள் தொடர்ந்து கண்காணிக்கப்பட்டு வருகிறது. அவ்வாறு தரப்படும் தீர்வுகள் திருப்திகரமாக இல்லாதபட்சத்தில் மறுபரிசீலனை செய்வதற்கான வாய்ப்புகளும் இதில் உள்ளது.இப்படிப்பட்ட மிக முக்கியமான திட்டத்தின் மூலமாக நமது மாவட்டத்தில் அமைச்சர் பெருமக்கள் அவர்களின் வழிகாட்டுதலின்படி தொடர்ச்சியாக நான்கு அல்லது ஐந்து கிராமங்கள் இணைந்து ஒரு மையமான இடத்தில் இந்த முகாம் நடத்தப்பட்டு, மனுக்கள் பெறப்பட்டு வருகின்றன. நமது மாவட்டத்தில் மாநிலத்திலேயே அதிகமாக இலவச வீட்டு மனை பட்டாக்கள் வழங்கப்பட்டுள்ளன. அது மட்டுமல்லாமல் பிற்படுத்தப்பட்டோர் நலத்துறை, ஆதிதிராவிடர் நலத்துறை ஆகிய இரண்டு துறைகளின் மூலமாக புதிதாக நிலங்களை எடுத்தும், பட்டாக்களை இலவசமாக வழங்கி இருக்கின்றோம். தற்போதும் கூட 2000 பட்டாக்கள் புதிதாக வழங்குவதற்கு அமைச்சர் பெருமக்கள் அவர்களால் அறிவுறுத்தப்பட்டு, அதற்குரிய பணிகள் நடைபெற்று வருகிறது.மேலும், கலைஞர் கனவு இல்லம் திட்டம் மூலம் கிராமப்புறத்தில் உள்ள வீடுகளை சீரமைத்தல், புதிதாக கட்டுதல் பணிகளை செய்வதற்காக நடவடிக்கைகள் எடுக்கப்பட்டு வருகின்றன. இந்த முகாமின் மூலமாக வழங்கக்கூடிய மனுக்களுக்கு மிக விரைவாக தீர்வு காணப்படும் என்றும் அரசு அலுவலர்கள் அதை மிகுந்த கவனத்தோடு பரிசீலித்து நடவடிக்கை எடுப்பார்கள் என தெரிவித்தார்.
விருதுநகர் மாவட்ட ஆட்சியர் அலுவலக கூட்டரங்கில் (16.07.2024) பேரநாயக்கன்பட்டி ஹயகிரிவாஸ் இன்டர்நேஷனல் பள்ளியிலிருந்து 11 மற்றும் 12-ஆம் வகுப்பிலிருந்து சிறந்து விளங்கக்கூடிய 40 பள்ளி மாணவர்களுடனான ‘Coffee With Collector” என்ற 80-வது கலந்துரையாடல் நிகழ்ச்சியில் மாவட்ட ஆட்சித்தலைவர் முனைவர் வீ.ப.ஜெயசீலன்,I A S, அவர்கள் மாணவர்களுடன் கலந்துரையாடி, கல்லூரிகள் தேர்வு, உயர்கல்வி மற்றும் வேலைவாய்ப்பு குறித்த உரிய வழிகாட்டுதல் வழங்கினார்.விருதுநகர் மாவட்டத்தில் பள்ளிகளில் பயிலும் மாணவர்களில் கல்வி, பொது அறிவு, விளையாட்டு, ஓவியம், இசை உள்ளிட்ட பல்வேறு திறன் அடிப்படையில் மாணாக்கர்களின் திறன்களை கண்டறிந்து, மாணவ, மாணவியர்கள் தேர்ந்தெடுக்கப்பட்டு பிரதி வாரம் ஒருமுறை அவர்களை மாவட்ட ஆட்சித்தலைவர் அவர்கள் நேரில் அழைத்து கலந்துரையாடும் நிகழ்ச்சி தொடங்கப்பட்டு, இன்று 80-வது முறையாக கலந்துரையாடல் நிகழ்ச்சி நடைபெற்றது.இந்த நிகழ்ச்சியின் முக்கிய நோக்கம், மாணவர்களுடைய உயர்ந்த இலட்சியம், அவர்களுடைய உயர்கல்வி பயில்வதற்கு வழிகாட்டுதல், போட்டி தேர்வுகளை எதிர்கொள்ளுதல், தோல்வியை எவ்வாறு எதிர்கொள்வது, அவர்களுக்கு கல்வி, வேலைவாய்ப்பு உள்ளிட்ட பல்வேறு பிரிவுகளில் அவர்களுடைய சந்தேகங்களை அகற்றி, அவர்கள் வாழ்க்கையில் எங்கு பிறந்தோம், நாம் அரசு பள்ளியில் பயின்றோம், நமக்கு வசதி இல்லை, நமக்கு பின்புலம் இல்லை என்பதெல்லாம், வாழ்க்கையில் ஒரு உயர்ந்த இடத்தை அடைவதற்கு ஒரு தடை இல்லை என்பதை புரிய வைத்து, தன்னம்பிக்கை, விடாமுயற்சி, கடின உழைப்புடன் தொடர்ந்து உழைத்தால் நாம் எதையும் சாதிக்க முடியும் என்பதை உணர்த்தும் வகையில் சரியான வழிகாட்டுதல் வழங்குவதே இந்த நிகழ்ச்சியின் முக்கிய நோக்கமாகும்.இந்த கலந்துரையாடல் நிகழ்ச்சியில் கலந்து கொண்ட பள்ளி மாணவ, மாணவிகளிடம் மாவட்ட ஆட்சித்தலைவர் அவர்கள் அவர்களுடைய இலட்சியம், அவர்களுக்கு எந்த துறையில் ஆர்வம், அவர்கள் உயர்கல்வி பயில விரும்பும் கல்லூரி மற்றும் இடம் உள்ளிட்டவை குறித்து கேட்டறிந்தனர்.பள்ளி கல்லூரி படிப்பு என்பது ஒருவரின் வாழ்க்கையில் ஒருமுறை மட்டுமே கிடைக்கும் எனவே பள்ளி மற்றும் கல்லூரி படிப்பின் மூலம் வாழ்க்கைக்கான பல அனுபவங்களை கற்றுக் கொள்ளலாம். அனுபவங்களில் இருந்து கிடைக்கும் கல்விதான் சிறந்த கல்வியாகும்.மருத்துவம், பொறியியல் படிப்புகளுக்கு அனைத்து நுழைவு தேர்வுகளை பற்றி தெரிந்துகொள்ள வேண்டும். எந்த கல்லூரியில் எந்த படிப்பு சேரவேண்டும் என்பதை முடிவு செய்து விடா முயற்சியுடன் படிக்க வேண்டும். மருத்துவ படிப்பு சேர விரும்பும் மாணவர்கள் நுழைவு தேர்வை மனதில் வைத்து படிக்க வேண்டும். மேலும் நீட் தேர்வில் ஒவ்வொரு சரியான பதிலுக்கும் மதிப்பெண்களை வழங்குகிறது. அதே நேரத்தில், ஒவ்வொரு தவறான பதிலுக்கும் மதிப்பெண் கழிக்கப்படுகிறது. இதனை மாணவர்கள் கவனத்தில் கொள்ளவேண்டும்.பன்னிரண்டாம் வகுப்பு பள்ளி படிப்பை முடித்தவுடன் கல்லூரி படிப்பில் சேருவதற்காக அனைத்து கல்லூரிகளிலும் தவறாமல் விண்ணப்பம் செய்ய வேண்டும். கடந்தாண்டு எந்த கல்லூரியில் எவ்வளவு கட் ஆப் மதிப்பெண் அடிப்படையில் மாணவர் சேர்க்கை நடைபெற்றது போன்ற தகவல்களை தெரிந்துகொள்ள வேண்டும். ஒவ்வொருவரும் தங்களது தனித் திறமைகளை வளர்த்துக்கொள்ள வேண்டும்.அரசுப்பள்ளியில் 6-ஆம் வகுப்பு முதல் 12-ஆம் வகுப்பு வரை பயிலக்கூடிய மாணவர்களுக்கு 7.5 சதவிகித இடஒதுக்கீட்டில் அரசு மருத்துவக்கல்லூரி, பொறியியல் கல்லூரி, விவசாயக்கல்லூரி, கலை மற்றும் அறிவியல் கல்லூரி, செவிலியர் கல்லூரி, உள்ளிட்ட அரசு கல்லூரியில் உயர்கல்வி பயில்வதற்கு வாய்ப்புக்கள் உள்ளதாகவும், எனவே இந்த வாய்ப்பை சரியான முறையில் பயன்படுத்த வேண்டும்.பன்னிரெண்டாம் வகுப்பில் எடுக்க கூடிய மதிப்பெண்களை பயன்படுத்தி நமக்கான நல்ல வாயப்புகளை உருவாக்கி கொள்ள வேண்டும். உயர்கல்வி எங்கு பயின்றாலும், இந்தியாவில் சிறந்த கல்லூரியை தேர்ந்தெடுத்து படிக்க வேண்டும். வெற்றிக்கு தேவையான விஷயங்களை தொடர்ந்து ஆர்வத்துடன், கவனசிதறல் இல்லாமல், தொடர்ந்து விடா முயற்சியுடனும், கடினமாக உழைத்தால் எளிதாக வெற்றி பெறலாம்.மேலும், ஒவ்வொருவருக்கும் என்று தனித்திறமைகள் உள்ளன. அத்திறமைகளை அனைவரும் வளர்த்து கொண்டு வாழ்வில் முன்னேற வேண்டும் என மாவட்ட ஆட்சித்தலைவர் அவர்கள் தெரிவித்தார்.
