“காபி வித் கலெக்டர்” நிகழ்ச்சியின் 83-வது அமர்வு சிறப்பு நிகழ்ச்சி
விருதுநகர் மாவட்ட ஆட்சியர் அலுவலகத்தில் (20.07.2024) மாவட்ட ஆட்சித்தலைவர் முனைவர் வீ.ப.ஜெயசீலன், I A S, அவர்கள் தலைமையில் Visual Communication & Creative Thinking துறைகளில் ஆர்வம் கொண்ட 100 பள்ளி,கல்லூரி மாணவ மாணவியர்கள் கலந்து கொண்ட சிறப்பு Coffee with Collector 83-வது கலந்துரையாடல் நிகழ்ச்சியில் யூ- டியூப் பிரபலங்கள் திரு.கோபி மற்றும் திரு.சுதாகர் ஆகியோர் சிறப்பு விருந்தினர்களாக கலந்து கொண்டனர்.
விருதுநகர் மாவட்டத்தில் பள்ளிகளில் பயிலும் மாணவர்களில் கல்வி, பொது அறிவு, விளையாட்டு, ஓவியம், இசை உள்ளிட்ட பல்வேறு திறன் அடிப்படையில் மாணாக்கர்களின் திறன்களை கண்டறிந்து, மாணவ, மாணவியர்கள் தேர்ந்தெடுக்கப்பட்டு அவர்களை மாவட்ட ஆட்சித்தலைவர் அவர்கள் நேரில் அழைத்து கலந்துரையாடும் “காபி வித் கலெக்டர்” நிகழ்ச்சி 07.01.2022 அன்று தொடங்கப்பட்டு, மொத்தம் 82 கலந்துரையாடல் நிகழ்ச்சிகள் நடைபெற்றுள்ளது.
இந்த நிகழ்ச்சியின் முக்கிய நோக்கம், மாணவர்களுடைய உயர்ந்த இலட்சியம், அவர்களுடைய உயர்கல்வி பயில்வதற்கு வழிகாட்டுதல், போட்டி தேர்வுகளை எதிர்கொள்ளுதல், தோல்வியை எவ்வாறு எதிர்கொள்வது, அவர்களுக்கு கல்வி, வேலைவாய்ப்பு உள்ளிட்ட பல்வேறு பிரிவுகளில் அவர்களுடைய சந்தேகங்களை அகற்றி, அவர்கள் வாழ்க்கையில் எங்கு பிறந்தோம், நாம் அரசு பள்ளியில் பயின்றோம், நமக்கு வசதி இல்லை, நமக்கு பின்புலம் இல்லை என்பதெல்லாம், வாழ்க்கையில் ஒரு உயர்ந்த இடத்தை அடைவதற்கு ஒரு தடை இல்லை என்பதை புரிய வைத்து, தன்னம்பிக்கை, விடா முயற்சி, கடின உழைப்புடன் தொடர்ந்து உழைத்தால் நாம் எதையும் சாதிக்க முடியும் என்பதை உணர்த்தும் வகையில் சரியான வழிகாட்டுதல் வழங்குவதே இந்த நிகழ்ச்சியின் முக்கிய நோக்கமாகும்.
மேலும் இந்நிகழ்ச்சியில் சாதனையாளர்கள், அரசு உயர் அலுவலர்கள், பிரபலங்கள் சிறப்பு விருந்தினர்களாக அழைக்கப்பட்டு, தங்களின் துறை மற்றும் பணிகள் சார்ந்த வாய்ப்புகள், படிப்புகள் மற்றும் அதற்கான திறமைகள் குறித்து மாணவர்களிடையே உரையாற்றி ஊக்கப்படுத்தி, அவர்களின் கேள்விகள் மற்றும் சந்தேகங்களை நிவர்த்தி செய்து வருகின்றனர்.
அதன்படி, இன்று நடைபெற்ற கலந்துரையாடல் நிகழ்ச்சியில் யூ- டியூப் பிரபலங்கள் திரு.கோபி மற்றும் திரு.சுதாகர் ஆகியோர் சிறப்பு விருந்தினர்களாக கலந்து கொண்டு, இந்த துறைகளில் உள்ள வாய்ப்புகள், அதற்கான படிப்புகள், தொழில்நுட்பங்கள் குறித்தும், என்னென்ன திறமைகளை வளர்த்துக் கொள்ள வேண்டும் உள்ளிட்ட மாணவ, மாணவிகளின் எண்ணற்ற கேள்விகள் மற்றும் சந்தேகங்களுக்கு பதிலளித்தனர்.மேலும், தனித்திறமையை வளர்த்துக் கொண்டு, வாய்ப்புகளை பயன்படுத்தி தனிப்பட்ட திறன் படைப்பாற்றல் மூலம் பிரபலமான தங்களின் அனுபவங்களை பகிர்ந்து கொண்டனர்.
இந்தத் துறை மட்டுமல்லாமல் மாணவர்கள் தங்களுக்கு பிடித்த எந்த துறையிலும் சாதிக்க முடியும். அதற்காக தங்களது இலக்கை நீங்கள் வகுத்துக் கொள்ள வேண்டும். அதனையே குறிக்கோளாக கொண்டு, இலக்கை அடைவதற்கான வழிகளை அறிந்து கொண்டு தொடர் முயற்சி மூலமும், தோல்விகளிலிருந்து பாடங்களை கற்றுக் கொண்டும், தொடர் தோல்விகளினால் தொய்வு அடையாமல் ஒழுக்கத்துடன் தங்களது பணியை மேற்கொள்ளும் போது அந்த துறையில் நாம் சாதிக்க முடியும். இது ஒவ்வொருவராலும் முடியும். மாணவர்களுக்கு இந்த துறையில் நிறைய வாய்ப்புகள் உள்ளன.
நமது வெற்றிக்கு தேவையான விஷயங்களை ஆர்வத்துடன் கவன சிதறல் இல்லாமல், தொடர்ந்து விடாம முயற்சியுடன் கடினமாக உழைத்தால் வெற்றி பெறலாம். மேலும் ஒவ்வொருவருக்கும் என்று தனித்திறமைகள் உள்ளன. அத்திறமைகளை வளர்த்துக் கொண்டு வாழ்வில் முன்னேற வேண்டும் என மாவட்ட ஆட்சித் தலைவர் அவர்கள் தெரிவித்தார்.முன்னதாக, இந்த நிகழ்ச்சியில் கலந்து கொண்ட யூ- டியூப் பிரபலங்களுக்கு “விரு” என்ற சாம்பல் நிற அணிலின் உருவமைப்பிலான நினைவு பரிசினை மாவட்ட ஆட்சித்தலைவர் அவர்கள் வழங்கினார்.
இந்த சந்திப்பில் மாணவ, மாணவியர்கள் உற்சாகத்துடன் கலந்து கொண்டு, இந்த நிகழ்ச்சி மூலம் எங்களுக்கு ஒரு புத்துணர்வு, ஊக்கம் அளிப்பதாகவும், எங்களுடைய கேள்விகள் மற்றும் சந்தேகங்களுக்கு மாவட்ட ஆட்சியர் அவர்களும், சிறப்பு விருந்தினர்களும் தெளிவான விடை கொடுத்ததாகவும், இந்த நிகழ்ச்சி ஏற்பாடு செய்த மாவட்ட ஆட்சித்தலைவர் அவர்களுக்கு மாணவர்கள் தங்களது நன்றிகளை தெரிவித்துக்கொண்டனர்.
0
Leave a Reply