• 5
• Sep 02, 2026

யூத் தடகளத்தில் தேசிய சாதனை – தமிழக வீரர் நீல் சாம்ராஜ் அசத்தல்!

பஞ்சாப் மாநிலம் லூதியானாவில் 21வது தேசிய யூத் தடகள சாம்பியன்ஷிப் போட்டிகள் நேற்று தொடங்கின. 18 வயதுக்கு உட்பட்டோருக்கான இந்த மூன்று நாள் தொடரில், தமிழகம் சார்பில் 21 வீரர்கள் மற்றும் 16 வீராங்கனைகள் என மொத்தம் 37 பேர் பங்கேற்கின்றனர்.

நேற்று நடைபெற்ற ஆண்களுக்கான 100 மீட்டர் ஓட்டப்பந்தயத்தில் தமிழக வீரர் நீல் சாம்ராஜ், 10.46 வினாடிகளில் இலக்கை எட்டி தங்கப்பதக்கம் வென்றார். இதன் மூலம் யூத் தடகளப் பிரிவில் புதிய தேசிய சாதனையையும் படைத்தார்.

இதற்கு முன்பு 2023ஆம் ஆண்டு அன்ஷு ராஜ் 10.63 வினாடிகளில் 100 மீட்டரை கடந்ததே தேசிய சாதனையாக இருந்தது.

பெண்களுக்கான 100 மீட்டர் ஓட்டப்பந்தயத்தில் தமிழகத்தின் மிர்த்திகா, 11.78 வினாடிகளில் பந்தயத்தை நிறைவு செய்து தங்கப்பதக்கம் வென்றார். இது இந்தத் தொடரின் புதிய சாதனையாக அமைந்தது.

பெண்களுக்கான 400 மீட்டர் அரையிறுதி முதல் பிரிவில் தமிழக வீராங்கனை சகாய ஜெமிமா, 55.94 வினாடிகளில் பந்தயத்தை நிறைவு செய்து மூன்றாவது இடம் பிடித்தார்.